CRTVG

Buscar

Desde este sábado permítese a pesca de recreo nos peiraos galegos, agás en 15

Publicado o 06/08/2021 14:19
Desde este sábado permítese a pesca de recreo nos peiraos galegos, agás en 15
EP

O Diario Oficial de Galicia (DOG) publica este venres a resolución pola que se levanta a prohibición da pesca marítima de recreo en superficie en zonas de servizo portuarias, que só queda vetada, finalmente, en 15 portos autonómicos. A norma aproba tamén o procedemento de declaración responsable para a práctica da pesca de recreo en portos dependentes da comunidade. De feito, a resolución produce efectos a partir deste sábado e ábrese o prazo de presentación de declaracións responsables a partir dese día, que quedará aberto.

En total, 28 portos quedan libres para a realización desta práctica e en 79 estará permitido pero en determinadas zonas sinaladas. Os 15 portos en que seguirá prohibida a pesca de recreo en superficie son os de Redes (Ares), San Pedro de Visma (A Coruña), Quenxe (Corcubión), Testal (Noia), Ribeira, Carril (Vilagarcía), O Xufre (A Illa de Arousa), Sanxenxo, Raxó (Poio), Corbaceiras (Pontevedra), Beluso (Bueu), Aldán (Cangas), Moaña, Santa Cristina de Cobres (Vilaboa) e A Pasaxe (A Guarda).

Nun apartado, a resolución recolle o réxime de prohibicións, entre as que destaca que non se permitirá a práctica da pesca marítima recreativa de superficie desde peiraos durante as operacións de atracada ou desatraque ou mentres permanezan embarcacións nos peiraos, nin entre embarcacións. Tampouco se permitirá cando poida afectar o normal tránsito e atracada de embarcacións de calquera índole dentro da dársena ou a súa seguridade. Non se permitirá o acceso a embarcadoiros, nin a embarcacións, nin a manipulación de embarcacións atracadas, nin a limpeza da pesca nos peiraos, entre outras cuestións.

 

Noticias web

06/08/2021