Un ano común, este este 11 de novembro na carballeira de Francos en Teo, amencería repleta de xente. Alí, desde 1557, celébrase a feira cabalar do San Martiño, considerada a máis antiga de Galicia. Pola contra o aspecto que presentaba esta mañá é ben distinto. Baleira, en silencio e sen o arrecendo a polbo e churrasco, dous dos ingredientes clásicos desta cita.

Os veciños espertaban hoxe co corazón un pouco máis encollido, e con morriña dunha festa que é sinal de identidade da parroquia. Din os maiores do lugar que non lembran que se suspendera nunca a feira. Hai que retrotraerse ata o ano 1918 en que hai documentada a única cancelación por mor doutra pandemia a da gripe española.

O Concello organizou actividades para nenos e familias durante todo o mes mantendo as medidas sanitarias. Hoxe permitiu a instalación de postos de venda de polbo para levar en varios puntos da localidade. Unha maneira de manter o arrecendo e sabor típicos da feira.

Mentres, os veciños de Teo poñen xa a ollada e as esperanzas no ano que vén e a conta atrás para a feira do San Martiño de 2021.