A pesar de que máis da metade das rexións italianas teñen restricións de nivel alto ou moi alto, os novos contaxios diarios, lonxe de frear, aceléranse. Trinta e cinco mil nas últimas 24 horas, tres de cada dez na Lombardia.

Comparte o máximo nivel de restricións en vigor para frear a pandemia co Piamonte, Val de Aosta, Calabria e a provincia autónoma de Bolzano. Os falecidos por covid-19 na última xornada en Italia foron 580, a cifra máis alta nun só día desde o 15 de abril. 

En Francia, as autoridades non queren que a poboación se relaxe e reforzan os controis para que se cumpra o confinamento vixente. Nos hospitais os enfermos covid superan os 31.000 e achéganse ao pico da primeira onda. Nun próximo a Bordeos, o persoal trata de gañar espazo e utiliza cada oco dispoñible para os coidados intensivos.

"Actualmente a situación é tensa, pero aínda está controlada. En críticos reforzamos a nosa oferta e estamos ao 50% de capacidade".

Eslovaquia intensificou a súa campaña de probas para localizar infectados e illalos. A pasada fin de semana fixéronse tests nas rexións con maior número de contaxio, case a metade do país, e o resultado foi un 0,63 por cento de positivos.