Os partidos da oposición plantaron o conselleiro de Medio Rural, José González, que este martes reclamou no Parlamento de Galicia o apoio de socialistas e nacionalistas na negociación co Goberno español da Política Agrícola Común (PAC) para o período 2021-2027.

Na súa intervención a petición propia nunha sesión plenaria, González só conseguiu o apoio do seu partido, que ten maioría, e requiriu en varias ocasións un consenso das demais formacións políticas, que amosaron rexeitamento e reservas.

Segundo dixo, tras conseguir un compromiso conxunto co Principado de Asturias, Cantabria e Euskadi, na defensa dos intereses do sector na cornixa cantábrica, e o apoio dalgunhas organizacións agrarias e cooperativas galegas, a súa ambición era ampliar o consenso ao conxunto do Parlamento.

González salientou a existencia de "moitos puntos" de converxencia, especialmente coa posición do BNG, e asugurou que algúns dos aspectos que propón están baseados en estudos elaborados por académicos e investigadores das universidades galegas.

O conselleiro indicou que o próximo 11 de xuño está prevista unha reunión das comunidades autónomas co Goberno central para abordar as negociacións coa fin de establecer unha postura de España ante a próxima PAC, na que aspira a mellorar a posición das 26.000 persoas dedicadas á agricultura e á gandería en Galicia.

Nese sentido, expresou a vontade de que os criterios de atribución dos 205 millóns de euros da PAC, 170 millóns de axudas directas, se establezan en base a un sistema de participación "de abaixo arriba" en que primen as especificidades das comunidades autónomas e reclamoulle ao Goberno central aumentar a transparencia.

Rexeitamento da oposición

Con todo, o deputado do PSdeG Martín Seco e a parlamentaria do BNG Carme Aira reprocháronlle que falara con organizacións ou comunidades autonómicas pero presente as súas conclusións ao Parlamento cando faltan un par de semanas para a negociación.

Segundo o socialista, mentres reclama a Madrid un sistema de decisión de abaixo cara arriba, en Galicia aplicou unha postura ao revés, e indicou que "unha cousa é explicar e outra negociar", ao insinuar que a Xunta pretende simplemente que as demais partes adopten as súas posturas.

Airas tamén lamentou que a Xunta recorra, como tamén fai o PP, á "confrontación e desgaste" co Goberno central, "aínda que non o faga agora", en alusión ao ton máis conciliador mostrado por González nesta ocasión.

A parlamentaria do BNG reprochoulle ao PP que, malia gobernar durante décadas en Galicia e periodicamente no Executivo central, os seus dirixentes "non fixeron moito polo rural galego", pero dixo a González que "se o fai agora terá a felicitación do BNG".

Máis crítico foi Seco, quen considerou a postura da Xunta e do PPdeG como unha "tomadura de pelo". Ademais, acusou a esa formación de xestionar os fondos da PAC nas últimas décadas con "continuos incumprimentos" e ata "atrasos" que conlevaron a perda de parte deles, ademais do "desvío" dalgunhas partidas a obxectivos que se apartaron da finalidade da UE.

Seco sinalou que non é alleo á postura doutras comunidades do norte de España en que gobernan os socialistas e expresou a vontade do PSdeG para mellorar a postura dos agricultores e gandeiros galegos, pero acusou ao PPdeG de "desmantelar" ese sector durante os seus 34 anos de goberno en Galicia.

Nese sentido, o parlamentario do PSdeG distanciouse de prestar apoio ao PPdeG e exhortou ao conselleiro para cumprir a súa "obriga" de "negociar ben".

Apoio do PPdeG

A deputada do PPdeG Elena Candia apoiou a postura do conselleiro e lanzou particularmente ataques á formación nacionalista galega ao indicar que "hai que sacar esa careta de teatro que está a facer constantemente o BNG".

Candia confesou acoller con "decepción" a postura do BNG, que cualificou de "incoherencia e falta de responsabilidade" polo carácter "dubitativo á hora de votar" dos seus integrantes.