EFE

O uso de máscara na rúa deixará de ser obrigatorio en Portugal a partir do próximo luns, xa que a medida está en vigor ata este domingo e non se presentou ningunha proposta no Parlamento para prorrogala.

A maioría dos partidos, incluído o gobernante Partido Socialista, xa comunicaran publicamente que non ían propoñer a renovación da lei. Este mércores realizouse a reunión da conferencia de líderes do Parlamento para decidir que temas serán debatidos no arranque do ano lexislativo e o uso da máscara "non foi abordado", explicou posteriormente a xornalistas a portavoz, Maria da Luz  Rosinha, o que terminou de confirmar o fin da medida.

A medida estaba en vigor desde finais de outubro de 2020 e obriga a usar máscara na rúa sempre que non sexa posible manter a distancia social aconsellada. A principal autoridade sanitaria do país, a Dirección Xeral de Saúde (DGS), mostrouse hoxe a favor do fin da medida, aínda que segue recomendando o seu uso en determinadas situacións onde o risco de contaxio de coronavirus é maior, como eventos, aglomeracións ou nos recreos das escolas.

"Cada un debe, a pesar de todo, seguir levando encima unha máscara e en caso de necesidade debe colocarlla", dixo a directora xeral de Saúde, Graça Freitas, nunha audición parlamentaria. Aínda así, a retirada da medida non recibiu apoio unánime no país, e desde a Asociación Nacional de Médicos de Saúde Pública manifestaron que sería "conveniente" que o uso de máscara na vía pública seguise sendo obrigatorio.

Baixa a incidencia e avanza a vacinación

A fin da máscara na rúa chega nun momento en que a pandemia está estabilizada no país e coa incidencia á baixa, á vez que avanza o proceso de vacinación. Segundo o boletín máis recente da  DGS, a incidencia a 14 días sitúase en 259,6 casos por 100.000 habitantes, tras baixar máis de 40 puntos na última semana.

Este mércores notificáronse 1.778 contaxios e dez mortes, e o número de hospitalizados con covid−19 caeu a 621 persoas, das que 135 están en coidados intensivos. Desde que empezou a pandemia, Portugal, con 10 millóns de habitantes, suma 1.050.719 casos confirmados e 17.826 mortes.

O último informe de vacinación da DGS, con datos ata o pasado domingo, recolle que o 78 % da poboación total do país ten a pauta completa e o 85 % recibiu polo menos unha dose.