CRTVG

Buscar

Ningún falecido con Covid-19 nunha xornada de forte baixada de casos activos en Santiago e Vigo

Publicado o 12/06/2020 21:02

• Só quedan hospitalizados 8 pacientes con positivos en COVID-19, ningún na UCI

• A incidencia do virus na comunidade redúcese ata 357 casos activos

Ningún falecido con Covid-19 nunha xornada de forte baixada de casos activos en Santiago e Vigo

Os hospitais galegos non comunicaron ao longo deste venres ningunha nova vítima mortal relacionada coa pandemia de coronavirus na comunidade. Polo tanto, a cifra de falecidos con Covid-19 en Galicia mantense nas 619 persoas, logo de que o mércores se rexistrara a última vítima mortal, un home de 83 anos ingresado no CHUVI.

Ademais, nas últimas 24 horas, o Sergas rexistrou unha forte baixada de casos activos de coronavirus en Galicia, 108 menos, co que o número total baixa ata os 357.

O descenso débese, en gran parte, á acusada redución da incidencia na área de Santiago e, en menor medida, tamén na de Vigo. Nas residencias permanecen 14 usuarios afectados e 11 traballadores.

A distribución dos casos é a seguinte:

• Vigo: 148 (-36).

• A Coruña: 105 (=).

• Santiago: 34 (-58).

• Ourense: 28 (-3).

• Lugo: 22 (-7).

• Ferrol: 12 (-1).

• Pontevedra: 8 (-3).

Só quedan hospitalizados 8 pacientes, ningún deles na UCI, e a cifra de curados increméntase en 114 persoas, ata as 10.470.

O número de PCR realizadas é de 156.036.