A Generalitat ordenou o peche ao público de discotecas, salas de baile e salas de festas con espectáculo en toda Cataluña para tratar de frear a transmisión do coronavirus. Tamén quedan suspendidas en toda Cataluña as actividades musicais con pistas de baile ou espazos habilitados fóra dos establecementos e obrígase a pechar ás doce da noite os salóns de xogo, casinos e salas de bingo.

Ademais, nos municipios onde se detectaron maior número de contagios de COVID-19 nos últimos días establécese tamén o horario de peche a medianoite de restaurantes, bares, terrazas, chiringuitos e bares musicais. O prazo de duración das medidas establécese en 15 días e esta resolución entrará en vigor mañá, sábado 25 de xullo.

O ascenso dos contaxios de coronavirus fai aumentar as restricións ao ocio nocturno e á hostalería en xeral. Limitacións horarias e control e recorte da acollida, co obxectivo de evitar aglomeracións de xente, en especial dos máis novos.
 

Aragón notificou 315 novos casos, un terzo deles asintomáticos, e máis de dous terzos detectados en Zaragoza. Os ingresos hospitalarios rozan os 200 na comunidade e xa se despregou un hospital de campaña no auditorio da capital, por se fose necesario.

O Goberno aprobou ademais unha orde de medidas urxentes para a contratación dos temporeiros agrarios. Con ela pretende obter información dos contratados e planificar a xestión co fin de previr brotes como os das semanas pasadas.

1.500 probas ao día por segunda xornada consecutiva en Mendillorri, Navarra, que suma novos positivos. Mantén activo o dispositivo especial para o cribado da mocidade cun comportamento exemplar acudindo ás probas. Os mozos defenden que son os mesmos que loitan polo progreso dun barrio novo e de futuro.

Resignación en Totana na primeira xornada da Fase 1 da desescalada que afectan 32.000 persoas. Hai rexistrados 30 novos contaxios e uns 85 afectados, mentres continúan as probas PCR.

En Valencia comezan a dispararse os casos. O último brote nun hospital de Manises deixa polo menos 20 afectados.

Madrid informou de dous novos brotes con 15 casos e medio cento de contactos en seguimento, asociados a locais de ocio. A comunidade suma en total nove focos de coronavirus.

En Asturias hai dous casos positivos relacionados con contaxios en Navarra e Cantabria, ambos con síntomas leves que permanecen en illamento domiciliario.