CRTVG

Buscar

A Garda Civil impide que un veciño de Arteixo venda un crocodilo disecado por Internet

Publicado o 25/11/2019 18:34
A Garda Civil impide que un veciño de Arteixo venda un crocodilo disecado por Internet

O equipo do Seprona da Garda Civil da Coruña impediu este luns a venda dun crocodilo disecado que estaba anunciado en Internet por parte dun veciño do municipio de Arteixo. Diso informou o Instituto armado nun comunicado, en que lembra que esta especie en concreto está ameazada e que a súa comercialización está regulada.

A Garda Civil indicou que a investigación se iniciou cando o corpo de seguridade detectou a publicación dun anuncio do crocodilo disecado nunha páxina web para a venda de artigos de segunda man. O propietario da especie non achegou documentación que acreditase a tenza legal do animal, así que o corpo de seguridade levantou acta por presunta infracción administrativa á Lei de represión do contrabando. Así, o crocodilo disecado foi depositado na Dependencia Provincial de Aduanas e Impostos Especiais da Coruña.

A comercialización destas especies está regulada pola lexislación CITES, de aplicación en España, que prohibe a importación, exportación, comercio, tenencia ou circulación deste tipo de animais se non se dispón da documentación necesaria.

O veciño de Arteixo, presunto autor do delito, pode enfrontarse a penas de prisión, multas e xa se procedeu ao comiso do ben en concreto. A Garda Civil enmarcou as actuacións desenvolvidas no Plan de acción español contra o tráfico ilegal e o furtivismo internacional de especies silvestres.