Cinco meses despois da súa retirada do Celta con todos os honores, Sergio Álvarez fala do seu novo papel no club. E tamén de como ve o equipo na súa primeira temporada fóra do vestiario. O de Catoira é optimista a pesar do mal comezo.

"Custou arrincar, que iso sempre é difícil. Cando non comezas ben dende fóra sempre hai dúbidas. Con esas dúas vitorias consecutivas xa hai un pouco máis de tranquilidade malia a derrota desta semana e penso que o equipo vai ter unha semana tranquila", comentou Sergio.

Seguramente a noticia está xustamente na portería. A irrupción de Dituro sorprendeu gratamente ó celtismo e tamén chama a atención de Sergio. Isto comentaba o pasado domingo no Twitch do 'En xogo':

"Está a ser determinante en xogadas moi decisivas onde ten moita influencia o porteiro, os penaltis. Coudet coñecíao, deulle ese punto de tranquilidade e el ven dunha madurez que lle axudan a afrontar este tipo de situación".

A formación dos porteiros do Celta estará supervisada por Sergio Álvarez. Presentouse a escola de porteiros que leva o seu nome e estivo ben acompañado no seu primeiro día na Madroa.

"É un orgullo, a idea é axudar aos nenos e nenas a formarse".

A artrose no seu xeonllo retirouno aos 35 anos, pero a súa experiencia e traxectoria impecable sempre ligada o Celta ponse ao servizo dos máis novos.