A Fiscalía pide penas de entre oito e 41 anos de prisión para os tres presuntos membros da célula terrorista responsable dos atentados de Barcelona e Cambrils, Tarragona, o 17 de agosto de 2017. Nestes atentados morreron 16 persoas e 140 foron feridas.

Segundo o escrito de acusación, a Fiscalía pide 41 anos de cárcere para Mohamed Houli, supervivente da explosión no chalé da célula en Alcanar, Tarragona, e 36 anos para Driss Oukabir, irmán dun dos terroristas mortos, por delitos de integración en organización terrorista, fabricación, posesión e depósito de substancias explosivas e estragos de carácter terrorista.

Para o terceiro procesado, Said Ben Iazza, a Fiscalía solicita oito anos de cadea por colaboración.

Ningún destes acusados foi procesado como responsable dos falecidos e feridos, xa que os presuntos autores morreron abatidos polos Mossos d'Esquadra ou na explosión de Alcanar, e a Audiencia Nacional rexeitou ampliarlles o procesamento como coautores dos asasinatos, aínda que deixou a porta aberta ás acusacións que os propuxeron para podelos acusar por eses delitos. A Asociación de Vítimas do Terrorismo xa anunciou que así o fará.