A comisión de Asuntos Xurídicos do Parlamento Europeo aprobou este martes o informe que pide levantar a inmunidade europarlamentaria do expresidente de Cataluña Carles Puigdemont, tal e como solicitou o Tribunal Supremo á Eurocámara para poder xulgar o político independentista en España.

A adopción dos informes saíu adiante con 15 votos a favor, oito en contra e dúas abstencións, anunciou o presidente da comisión parlamentaria, Adrián Vázquez (Ciudadanos), en declaracións á prensa na sede do Parlamento Europeo.   

Este é o primeiro paso para que a institución europea responda formalmente ás autoridades españolas, aínda que a decisión definitiva non se coñecerá ata que o mesmo informe sexa sometido ao voto do próximo pleno do Parlamento Europeo, previsto para a semana do 8 de marzo.   

Ademais de dar o seu visto e prace ao suplicatorio de Puigdemont, a comisión de Asuntos Xurídicos aprobou igualmente os informes que avalan a suspensión da inmunidade dos dous exconsellers de  Puigdemont que fuxiron con el a Bélxica e ocupan agora un escano na Eurocámara, Toni Comín e Clara Ponsatí.