EFE

A Dirección Xeral de Tráfico (DXT) lanzou unha campaña de vixilancia e concienciación no respecto aos viandantes para reducir os accidentes en beirarrúas e outros espazos peonís lembrando que son áreas exclusivas de desprazamentos a pé e que non poden circular por elas nin patinetes nin bicicletas.

A campaña, que comezou este luns e se prolongará ata o 7 de novembro, irá acompañada por un incremento da vixilancia e o control da circulación dos vehículos de mobilidade persoal como os patinetes eléctricos e as bicicletas, informa a DXT.

Desde que o pasado 2 de xaneiro entrara en vigor o real decreto polo que se modifican os regulamentos xerais de vehículos e de circulación, os vehículos de mobilidade persoal, entre os que se atopan os patinetes, son considerados vehículos para todos os efectos e por tanto os seus condutores están obrigados a cumprir as normas de circulación do mesmo xeito que o resto de coches e motos.

Isto implica por exemplo que estes vehículos non poden circular polas beirarrúas e que teñen prohibida a circulación en vías interurbanas, travesías, autoestradas, autovías e túneles urbanos.

Con todo, a DXT observou que a realidade é que non todos os usuarios respectan a norma, algúns por mero descoñecemento, e que é habitual ver patinetes circulando polas beirarrúas, un comportamento que non só xera queixas entre os cidadáns senón que ademais é perigoso para os peóns e chega nalgúns casos a provocar accidentes.

Esta acción trata de protexer os usuarios máis vulnerables non só nas calzadas senón tamén nas beirarrúas. Estes días tamén levará a cabo unha campaña específica de vixilancia que, a través das distintas policías, controlará a circulación de patinetes e bicicletas polas beirarrúas co obxectivo de denunciar e reducir esta clase de infraccións graves que levan aparelladas unha multa de 200 euros.

A DXT lembra que nos vehículos de mobilidade persoal como os patinetes só pode ir unha persoa e os seus condutores están sometidos ás mesmas taxas de alcol permitidas pola lei de seguridade viaria ao resto e teñen prohibido circular drogados e facer uso de auriculares, móbiles ou calquera outro dispositivo mentres van conducindo.