Mais de 122.00 quilos desta ameixa branca ou cornicha vendéronse no que vai de mes na lonxa de Baiona. Unha especie que pasou de 3 a 7 euros e medio e que o consumidor está a mercar a uns 15 euros o quilo. Segundo Xosé Daniel Lorenzo, mariñeiro: "É unha ameixa moi resistente, e non fraquea, como dicimos nós, sempre está en comida. A xente estase percatando".

O ano pasado a cornicha escaseaba, pero a aparición dun banco o pasado mes de abril na costa de Baiona fixo que a meirande parte dos barcos de marisqueo a flote da ría estean a pescar agora nestas augas. Hai 30 anos ese banco foi esquilmado e agora está a sustentar ducias de familias.

O patrón David Jiménez, di que "a campaña vai ben agora, este mes estamos a ter bos prezos desde que abriu a hostalería, pero ata agora prexos moi baixos, a uns tres euros e medio. Hai que ter en conta que gañan depuradoras e intermediarios, e non nos estaban pagando ben. Pero este mes está a ser bó". E o pescador César Davila recoñece que "este ano está levando bo prezo a comparación doutras campañads, e a verdade é que compensa vir a isto este ano".

Malia as grandes vendas de cornicha, percebes, navallas e nécoras seguen a liderar as vendas nas principais lonxas da ría de Vigo.

O poxador da lonxa de Baiona Ángel Vilar di: "Este ano non nos podemos queixar despois das resticións que houbo, estamos coa poxa do percebe dende 30 a 108, 110 euros, e esperamos que siga aumentando un pouquiño mais ainda". 

A ameixa branca está a salvar o marisqueo a flote nun ano moi difícil, que este verán está a ver un pouco mais de luz.