A Sala do Penal da Audiencia Nacional absolve o maior dos Mossos e tres ex-altos cargos da policía autonómica por entender que actuaron co obxectivo de "minimizar danos", malia que iso supuxese permitir a celebración do referendo do 1-O.

A sentenza descarta que houbese pasividade policial e non ve probado que houbese colaboración cos líderes do procés. Exculpa a Josep Lluís Trapero do delito de sedición, polo que se enfrontaba a dez anos de cárcere, e do de desobediencia. 

O conselleiro do interior catalán celebra a decisión da Audiencia Nacional que absolveu o ex-maior dos Mossos d’Esquadra, Josep Lluís Trapero, dos delitos de sedición e desobediencia, por entender que a actuación policial "minimizou danos". 

A sentenza conta co voto en contra da maxistrada Concepción Espejel, favorable á condena do maior por sedición, ao entender que "puxo os medios" para o referendo ilegal. Nese extenso voto particular, de 400 folios, podería apoiarse a fiscalía para recorrer contra a sentenza.