Santa Comba segue intentando manter baixo control o gromo de coronavirus rexistrado no municipio, con 30 persoas contaxiadas. Un cento de veciños permanecen confinados. Moitos, de idade avanzada, que residen en zonas rurais e dispersas do municipio.

María José Martínez, coordinadora do servizo de axuda a domicilio de Santa Comba, explica que hai persoas maiores que viven soas e tamén dependentes que precisan o servizo.

No Concello extrémanse as medidas de prevención e refórzanse os servizos sociais, mentres continúan o seguimento e as probas aos contactos próximos dos afectados.

David Barbeira, alcalde de Santa Comba, di que todas as persoas contaxiadas ou confinadas poden poñerse en contacto co Concello para recibir axuda.

E á espera de poder recuperar a localidade como centro de reunión da mocidade da zona, gran parte dos establecementos hostaleiros e de ocio nocturno permanecen pechados.

Sanidade vixía tamén o gromo rexistrado na Pobra do Caramiñal. Alí o cribado realizado a preto de 200 empregados dunha empresa do sector conserveiro suma 15 positivos, entre traballadores e contactos dos afectados.

Tamén aumentaron nas últimas horas os contaxios relacionados co gromo de Correos en Santiago. Polo momento, hai 13 casos confirmados.

E o foco de contaxio de Melide suma 6 afectados máis, cun total de 63 casos activos.

"A poboación relaxouse demasiado, pero é importante que se volva concienciar da importancia e a gravidade que pode supoñer o virus", explica Plácido Mayán, voceiro da Sociedade Española de Medicina de Urxencias e Emerxencias.

Na área sanitaria de Santiago-A Barbanza hai 404 casos activos de coronavirus. Son 22 máis nas últimas 24 horas.