CRTVG

Buscar

CRTVG Viva

Dous pintamonas de primeira, os actores Javier Veiga e Antonio Garrido, visitan este xoves o 'Land Rober Tunai Show'

25/11/2021

Na véspera do Black Friday, o espazo da TVG amosará en primicia que pasa coa xente que non tolea polos descontos e, ademais, entrará nas casas dos seus seguidores nunha nova entrega de "Pasa prá casa"

Dous pintamonas de primeira, os actores Javier Veiga e Antonio Garrido, visitan este xoves o 'Land Rober Tunai Show'

Santiago, 25.11.2021.-  Land Rober Tunai Show (21:55 h) recibe este xoves dous pintamonas de primeira: os actores Javier Veiga e Antonio Garrido. Veiga vai demostrar que é un verdadeiro grovense enfrontándose aos Marisquetes. A ver se descobre quen é o intruso niso de comer marisco, que ao parecer sabe moito. Por se fose pouco, os espectadores tamén verán a Javier Veiga na pel dun conselleiro e, ademais, terá unha encarga especial para a peculiar parella de protección civil do programa.

Na véspera do Black Friday, o espazo da TVG amosará en primicia que pasa con esa xente que non tolea polos descontos. Ademais, o Land Rober Tunai Show entrará  nas casas dos seus seguidores nunha nova entrega de "Pasa prá casa". Con quen vivirán?

Ademais, a audiencia e o público deben estar moi atentos, xa que poden gañar lotaría de João Simões. Isto e moito máis, esta noite, con Roberto Vilar, Eva Iglesias e Miguel Canalejo.

ler máis

A CRTVG visibiliza o Día Internacional para a Eliminación da Violencia contra as Mulleres

24/11/2021

Destaca a estrea da longametraxe documental ‘ContraAluz’ e a proxección e coloquio sobre ‘Sicixia’, filme recomendado para o fomento da igualdade de xénero

A RG cubrirá tamén os actos programados nas distintas cidades galegas e dará voz ás vítimas da violencia de xénero

A CRTVG visibiliza o Día Internacional para a Eliminación da Violencia contra as Mulleres

Santiago, 23.11.2021.-  Os medios públicos galegos remarcan ao longo desta semana o Día Internacional para a Eliminación da Violencia contra as Mulleres, coa emisión de contidos específicos nos informativos e programas, e coa estrea de producións arredor desta temática. Tamén, os medios públicos levan días emitindo a campaña institucional da Xunta de Galicia, que busca sensibilizar a sociedade nesta loita. O compromiso dos medios públicos coa muller e a igualdade abrangue os 365 días do ano, e con maior énfase na semana arredor do 25-N.

Os espazos diarios da TVG tínguense de contidos relacionados coa efeméride e os informativos darán conta dos actos e iniciativas vencelladas a este día. No caso do ‘Bos días’ entrevistarase o 25 de novembro a secretaria xeral de Igualdade da Xunta de Galicia, Susana López Abella. No mesmo informativo participarán esa xornada representantes doutras institucións públicas, así como representantes de asociacións de vítimas. O ‘Galicia noticias’, ‘Telexornal mediodía’ e ‘Telexornal serán’ ofrecerán  reportaxes sobre os pisos de acollida, testemuñas e os labores xudiciais. Mentres tanto, ‘A revista’ organiza unha mesa redonda con expertos nesta eiva social, psicólogos e representantes de asociacións e entidades. Pola súa parte, o cultural ‘ZigZag’ achegarase ao certame ‘Voces femininas’, que acollerá Ourense para conmemorar esta data, a través da voz e da música de tres destacadas artistas internacionais.

‘Quen anda aí?’ e ‘Fun polo aire’, os magazines de entretemento da tarde da canle pública, visibilizarán o xoves esta eiva social desde distintos vértices. No ‘Quen anda aí?’, unha psicóloga dará as claves actuais na loita contra a violencia machista e falará dos retos para a súa erradicación nas xeracións máis novas. O espazo dará a coñecer o papel das forzas da orde para enfrontarse a esta problemática e contará coa participación dun membro da unidade VIOGEN. Ao longo da semana, o ‘Fun polo aire’ está dando voz ás vítimas da violencia machista e pondo énfase na necesidade de denunciar calquera agresión. Achegarase tamén aos orfos da violencia machista, visitará unhas sesións de terapia con cans, coñecerá unhas rapazas ás que intentaron someter mediante o uso de drogas e asistirá a unhas charlas para concienciar os máis novos sobre o sexismo virtual, entre outros aspectos.

Pola súa parte, o ‘Vivir aquí’ ofrecerá este domingo unha reportaxe en que se afondará no silenciadas, ignoradas ou suplantadas que están as mulleres no ámbito científico ao longo da historia. Ao longo deste mes, o espazo está abordando, dunha maneira especial, a educación en igualdade e a importancia da educación para acabar coa violencia machista, asunto que tamén abordará o sábado.

O propio 25-N á noite destaca na G2 a estrea de ‘ContraAluz’, longametraxe documental dirixida por Teo Manuel Abad, que reflexiona sobre a autodefensa das mulleres para loitar contra a violencia de xénero. Abad remove conciencias a través das testemuñas de boxeadoras, que chegaron a este deporte como un modo de autoprotección e vía de fuxida ante a violencia á que as sometían os seus agresores. Ademais, o programa de cinema ‘Clac’ (na G2 , os venres á noite) emitirá a premiada ‘Sicixia’, de Ignacio Vilar, clasificada polo Ministerio de Cultura como especialmente recomendada para o fomento da igualdade de xénero, e un coloquio sobre ela. No faladoiro previo á proxección do filme, o director e a actriz principal explicarán as claves desta cinta.

Radio Galega: testemuñas e cobertura dos actos

A Radio Galega ofrece durante toda esta semana contidos nesta liña nos seus magazines diarios principais, ‘Galicia por diante’ e ‘A tarde’. Dará tamén cobertura en directo aos actos de concienciación e reivindicación nas distintas cidades galegas e contará coas testemuñas de mulleres que sufriron maltrato. A maiores, o ‘Galicia por diante’ desenvolverá un 'Miolo' sobre a violencia contra a muller no ámbito rural. Pola súa parte, o ‘Convivir Deportivo’ ofrecerá o 25-N unha edición especial sobre o deporte feminino desde A Coruña, en directo pola web e a aplicación móbil. 

Con motivo da estrea en cines esta semana de ‘María Solinha’, o ‘Diario cultural’ conversará sobre a violencia machista na época de María Solinha e na actual co director da cinta.

Finalmente, as redes sociais e a web da Corporación serán altofalantes dos contidos que ofrezan a radio e a televisión públicas.

ler máis

Teo Cardalda e Roi Méndez, dúas xeracións de músicos galegos, enfróntanse esta noite en 'Os mellores da clase'

24/11/2021

Ambos os dous deberán aplicarse para facer o mellor exame final e alzarse co trofeo do programa

Teo Cardalda e Roi Méndez, dúas xeracións de músicos galegos, enfróntanse esta noite en 'Os mellores da clase'

Santiago, 24.11.2021.-  Os mellores da clase (23:05 h) ten, nesta ocasión, un programa moi musical. Os protagonistas serán Teo Cardalda e Roi Méndez, que representan dúas xeracións de intérpretes galegos recoñecidos máis aló das nosas fronteiras.

Grazas ao espazo da TVG, mudarán as cancións polos libros e volverán á escola, a aqueles anos en que Teo era o máis moderno de Vigo e Roi todo un experto na elaboración de plans para copiar nos exames. María Mera ten unha chea de puntos para eles, pero deberán aplicarse para facer o mellor exame final e alzarse co trofeo.

ler máis

A CRTVG crea o Premio #DígochoEu para festexar os 150.000 seguidores en TikTok

23/11/2021

O equipo do #DígochoEu acudirá aos colexios a partir de xaneiro para realizar as gravacións de dez proxectos xunto co alumnado

O galardón estará dotado con 2.000, 1.000 e 500 euros para os centros dos proxectos gañadores

Con 150.000 seguidores en TikTok, o proxecto dos medios públicos consolídase como o maior dinamizador do galego entre a xente nova

A CRTVG crea o Premio #DígochoEu para festexar os 150.000 seguidores en TikTok

Santiago, 23.11.2021.-    O popular espazo de fomento do uso do galego da CRTVG #DígochoEu celebra os seus 150.000 seguidores en TikTok anunciando a creación do Premio #DígochoEu, un concurso de vídeos aberto a todos os centros escolares de Galicia, de educación Primaria e Secundaria, ou calquera de fóra de Galicia que imparta lingua galega.

O concurso constará de dúas fases: a primeira será o envío dun guión por parte dos profesores para a gravación dun capítulo do #DígochoEu. Nunha segunda fase, entre os mellores guións, elixiranse 10 para ser realizados nos colexios entre os alumnos e o equipo do #DígochoEu, que acudirá aos centros escolares para compartir unha xornada de gravación.

Os profesores poderán inscribir os seus colexios na web digochoeu.gal xunto coas propostas de guión do alumnado. A data límite para presentar as ideas é o 12 de decembro. Os proxectos seleccionados serán emitidos en todas as canles e plataformas dixitais da CRTVG. No mes de maio de 2022, unha vez emitidos, un xurado externo elixirá os tres mellores, que levarán os primeiros Premios #DígochoEu, de 2.000, 1.000 e 500 euros.

150.000 seguidores en TikTok

O lanzamento deste concurso coincide cun novo fito para o #DígochoEu en redes sociais, o que consolida este proxecto dos medios públicos como o maior impulsor da lingua galega entre a mocidade de Galicia. Na súa conta de TikTok, unha canle dirixida eminentemente á xente nova, @digochoeu, o espazo alcanzou esta semana a cifra de 150.000 seguidores.

O #DígochoEu leva desde xaneiro de 2020 emitindo un capítulo diario para a mellora do galego e desde hai 14 meses triunfa tamén cun vídeo diario en TikTok. Actualmente, o #DígochoEu tamén está presente en Twitch, cun streaming semanal do #ApuntamentoLusófono na noite dos mércores, xunto co actor luso Rodrigo Paganelli.

ler máis

A CRTVG busca ata o 5 de decembro a canción que lle porá a banda sonora ao Nadal galego

23/11/2021

As persoas interesadas en participar na sétima edición do concurso ‘Este Nadal Canta con Nós’ deberán enviar ao enderezo canciondonadal2021@crtvg.es temas inéditos e escritos en galego

A CRTVG busca ata o 5 de decembro a canción que lle porá a banda sonora ao Nadal galego

Santiago, 23.11.2021.-    A CRTVG segue na busca da canción que lle porá a banda sonora ao Nadal e ata o 5 de decembro recibe candidatas a acompañar os galegos e galegas durante as vindeiras festas. Os temas que se presenten á sétima edición do concurso ‘Este Nadal Canta con Nós’ deben de ser inéditos e orixinais, ademais de estaren escritos en lingua galega.

Cada grupo ou solista participante presentará un só tema, cunha duración non superior aos 3 minutos, e poderá enviar un vídeo musical do mesmo. Os participantes enviarán as súas cancións, de temática libre, en formato mp3 e, en caso de presentar vídeo musical, en mp4, ao enderezo canciondonadal2021@crtvg.es.

O premio conta cunha dotación económica de 1.000 euros e, para decidir o gañador, o xurado valorará a orixinalidade, a calidade técnica e o acompañamento dun vídeo musical. Ademais do premio, a canción gañadora terá difusión na televisión e na radio públicas, así como nas redes sociais da Corporación.  

O xurado estará composto por cinco persoas designadas pola dirección da Corporación Radio e Televisión de Galicia e o 10 de decembro farase público o tema vencedor e unha lista puntuada ata o quinto posto na web www.crtvg.gal, onde tamén se poden consultar as bases do concurso.

Esta é a sétima edición deste concurso musical, que anteriormente gañaron os nenos do CEIP San Clemente de Caldas de Reis, coa súa proposta ‘Cando é Nadal’; Iván Vale, co tema ‘O meu Nadal perfecto’; Plan Siberia, con ‘Xunto a ti’, Susana Martínez, con ‘O sinal’; o CEIP Covas de Meaño, con ‘Saúde e cante o merlo’, e Kiko Bea, que se fixo coa última edición do concurso grazas á canción ‘Un Nadal distinto’.

ler máis

A serie documental ‘O compás do tempo’ achégase hoxe á figura de Cristovo Colón e á súa posible orixe galega

23/11/2021

Desde 1492, darase un salto ao século XXI, onde o descubridor de América se atopa perdido e necesita volver á súa época

A serie documental ‘O compás do tempo’ achégase hoxe á figura de Cristovo Colón e á súa posible orixe galega

Santiago, 23.11.2021.-  A serie documental ‘O compás do tempo’ (23.25 h) viaxa este martes ata 1492, o ano do descubrimento de América. Desde ese momento, o mundo cambiou para sempre. Pero talvez Colón non fose o primeiro. Din que os viquingos ou os chineses puideron chegar antes, pero o certo é que foi el quen o descubriu para o mundo occidental.

Desde esa data, o espazo da G2 dará un salto temporal ao século XXI, onde algo estraño sucede: un home di que é o mesmísimo Cristovo Colón. Asegura que viaxou no tempo, que está perdido e que necesita volver á súa época. Para iso terá que atopar a maxia de ‘O compás do tempo’ e Raúl axudarao na súa aventura.

Entre outras localizacións, esta edición de ‘O compás do tempo’, estará nos portos de Palos, La Rábida e Huelva, en Poio, en Baiona e no mosteiro da Cartuja, en Sevilla, onde se aloxou un tempo antes de partir cara a América. Ademais, formularase a eterna incógnita: era Colón galego? A versión oficial di que era xenovés, pero hai varias teorías que din que a súa orixe podería estar en Pontevedra. Certo ou non, a súa fama merece ser contada.

ler máis

Silvia sorprende en '48 horas para o si' o seu mozo Jorge cunha petición de man e a organización dunha voda 'exprés'

23/11/2021

O novo espazo da Galega achega hoxe a emocionante historia desta parella, en que a noiva o poñerá todo para dar ese importante paso na relación

Silvia sorprende en '48 horas para o si' o seu mozo Jorge cunha petición de man e a organización dunha voda 'exprés'

Santiago, 23.11.2021.-   Despois da estrea de éxito de 48 horas para o si na TVG, en que este novo espazo arredor dunha petición de man e unha voda por sorpresa conseguiu un seguimento do 16 % de cota media de pantalla, este emocionante formato de entretemento volve esta noite cunha nova proposición amorosa, a de Silvia a Jorge, unha parella que, desde que se coñeceu na festa da Barca de Muxía, leva unida oito anos e comparte vida en Santa Comba.

A actriz e presentadora do espazo, Iolanda Muíños, dará a coñecer hoxe a Silvia, unha muller de 31 anos, de Vimianzo, apaixonada da meditación, do benestar e romántica, sobre as súas motivacións para dar este importante paso. A culpable ou verdugo desta entrega quererá darlle unha gran sorpresa ao seu mozo, pero apostarao todo e dará un paso tan importante na relación para conseguir o "Si, quero". Pola súa parte, a vítima, Jorge, de 34 anos, é un obsesionado pola moda e a decoración e acode ao programa totalmente enganado pensando que vai participar nun espazo de televisión para coñecer mellor a súa parella.

O cómplice, con quen Silvia vivirá os dous días na autocaravana para levar a cabo todos os preparativos da voda, será o seu sogro Evaristo. E durante este proceso, a audiencia coñecerá tamén as familias de ambos e gozará dos momentos previos ao posible compromiso.

Conseguirá Silvia o ansiado "Si, quero" ou non? En caso contrario, sería un auténtico pau...

ler máis

Grazas ao recadado na CRTVG, Unicef vacinará máis de 6.500 nenos e nenas

22/11/2021

Co lema #PequenasSolucións, os medios públicos emitiron a semana pasada contidos especiais para sensibilizar sobre as necesidades da infancia durante a XI Semana coa Infancia

Grazas ao recadado na CRTVG, Unicef vacinará máis de 6.500 nenos e nenas

Santiago, 22.11.2021.-   Grazas á solidariedade da audiencia dos medios públicos galegos durante a semana pasada, Unicef poderá vacinar nun curto prazo 6.540 nenos e nenas contra o sarampelo.

Co lema #PequenasSolucións, a TVG e a Radio Galega, así como o portal web crtvg.gal e as redes sociais da Corporación, axudaron a que se coñecese o labor de sensibilización de Unicef relacionado co dereito á saúde -física e mental-, facendo especial fincapé na vacinación de rutina, que se viu reducida pola covid-19; co dereito a unha contorna dixital segura, na loita contra o acoso escolar e o ciberacoso, e co dereito á participación real e efectiva que sitúe as necesidades da infancia na primeira liña.

Entre outros moitos programas, ‘Bos Días’, ‘A Revista’, ‘Quen Anda Aí?’, ‘Sabadeando’, ‘Malicia Noticias’ e o espazo ‘Dígocho Eu’ colaboraron ofrecendo reportaxes e entrevistas relacionadas con esta XI Semana coa Infancia. Ademais, ‘Luar’ ofreceu o pasado venres unha edición especial en que deu a coñecer o labor de Unicef en distintos países e se fixeron chamamentos á solidariedade da audiencia.

Hai que engadir a colaboración dos espazos informativos e de entretemento da Radio Galega como ‘Galicia por Diante’, ‘A Bóla Extra’, ‘A Tarde’, ‘A Crónica’ e 'Galicia en Goles', e o labor do portal web e das redes sociais da Corporación. E, sobre todo, salientar a colaboración dos espectadores dos medios públicos galegos que se sumaron á campaña.

ler máis

Novo capítulo de 'Auga seca', con Teresa facendo demasiadas preguntas na empresa de transportes e Mauro desesperado por protexer a Silvia

22/11/2021

Mentres tanto, en Lisboa, Lázaro contrata un sicario para matar a Abel

Novo capítulo de 'Auga seca', con Teresa facendo demasiadas preguntas na empresa de transportes e Mauro desesperado por protexer a Silvia

Santiago, 22.11.2021.-    No capítulo desta noite de Auga seca (23:05 h), Teresa vai demasiado lonxe facendo preguntas na empresa de transportes responsable do traslado da maquinaria da auga seca. Pola súa parte, Mauro insiste: precisa tomar un descanso e volver á casa.

Mentres, a policía interroga a Silvia. Desesperado, Mauro busca un plan para protexela, pero suporía sacrificar a reputación de Fran, algo que sabe que lle vai traer problemas con Irene.

En Lisboa, Lázaro contrata a Nuno, un sicario, para matar a Abel. Viñas alégrase de que Teresa volva á casa, pero antes de que marche sería útil que botase unha ollada a algúns documentos da nave, talvez ela poida atopar algo. A atención de Teresa repara nun detalle, pero gárdao para si mesma.

ler máis

'Cos Pés na Terra' coñecerá esta semana as creacións dunha artesá da la e botarase ao monte cun cabreiro

21/11/2021

O espazo da TVG tamén descubrirá cultivos novos da man de tres rapaces que converteron a terra que pisan nun verxel cheo de sabor

'Cos Pés na Terra' coñecerá esta semana as creacións dunha artesá da la e botarase ao monte cun cabreiro

Santiago, 21.11.2021.-    O espazo ‘Cos pés na terra’ (23.15 h) ten este domingo unha cita con Anahí, os seus trebellos e as súas creacións. Con esta artesá da la, os espectadores descubrirán todo o que hai detrás das súas creacións feitas co tecido máis antigo que existe: o feltro.

O equipo do programa pasará tamén unha xornada en cooperativa na compaña de Simón, Martín e Harris, tres rapaces que converteron a terra que pisan os seus pés nun verxel cheo de sabor onde hai sitio tamén para cultivos novos.

Ademais, ‘Cos pés na terra’ botarase ao monte con Roberto e as súas cabras, nunha xornada en que comprobará que un can pastor é o mellor amigo do home e dos cabreiros.

ler máis