Santiago, 04.03.2015.-  O 31 de marzo remata en España o proceso de liberación de frecuencias radioeléctricas no chamado dividendo dixital. Tras esta data, as vellas frecuencias das canles que actualmente emiten en simulcast (no sinal antigo e novo ao mesmo tempo)  apagaranse definitivamente, polo que só poderán seguir véndoas que teña as súas antenas adaptadas. 

Este proceso afecta as emisións de TVG e tvG2 na zona norte da provincia da Coruña e en zonas da provincia de Ourense.  Nestes territorios, os usuarios/as que teñan antenas ou sistemas de conexión individuais e perdan estas canles despois do 31 de marzo, deberán resintonizar o televisor co mando do aparello. 

Lixeiramente máis complicado é para os usuarios/as que reciben o sinal a través dunha instalación colectiva con amplificadores monocanle ou centraliñas programables, xa que se non queren perder as canles da Galega deberán contactar canto antes cun instalador autorizado, se non o fixeron xa, para que adapte as devanditas antenas. Unha vez realizada a nova antenización poderase resintonizar de novo o televisor. O instalador pode ademais axudar a xestionar a subvención do Ministerio para este cambio.

Nalgunhas zonas da provincia de Ourense e do sur de Lugo o simulcast xa se apagou o pasado día 8 de febreiro, debido a necesidades de coordinación do dividendo dixital co proceso similar que está a suceder en Portugal.

Máis información en www.crtvg.es/crtvg/canles-tematicas/dividendo-dixital/guia-para-manter-a-recepcion-de-tvg-e-tvg2