Santiago, 17.11.2012.- As televisións rexionais europeas integradas na asociación Circom Regional decidiron que o vindeiro congreso anual a celebrar o mes de maio en Compostela terá como eixo central analizar o importante papel que este colectivo xoga na sociedade, segundo acordaron na xuntanza do seu Consello Europeo celebrado hoxe na Facultade de Comunicación de Santiago.

Santiago, 16.11.2012.- Unha representación de directivos de Circom Regional (Asociación Europea de Televisións Rexionais) mantivo hoxe un encontro co presidente da Xunta de Galicia. Nel, o presidente de Circom, Jacques Briquemont e  Alberto Núñez Feijóo estiveron de acordo en que, nestes tempos de recursos máis escasos, a cooperación e o intercambio entre televisións rexionais é unha oportunidade para ser máis eficientes. Na recepción, que tivo lugar en San Caetano, estiveron presentes o presidente da plataforma europea, Jacques Briquemont; o director xeral da CRTVG, Alfonso Sánchez Izquierdo, e o vicepresidente de Circom, Fernando R. Ojea (CRTVG), entre outros membros da directiva de Circom.

Santiago, 11.11.2012.- Os máximos representantes de Circom Regional (Asociación Europea de Televisións Rexionais), organismo que abrangue 260 estacións de televisión de 34 países europeos, terán un encontro na capital galega os próximos días venres 16 e sábado 17 do presente mes de novembro, organizado pola CRTVG.

Santiago, 11.09.2012.-        A quinta tempada da serie “Matalobos” está a piques de chegar á Televisión de Galicia, pero antes da emisión dos novos capítulos, a canle autonómica ofrecerá tres especiais cos que os espectadores terán a oportunidade de lembrar algúns dos mellores momentos da ficción producida por Voz Audiovisual.

O primeiro especial, que se ofrecerá esta noite, rememorará as dúas primeiras tempadas da serie. Baixo o título “Ano 1: a familia”, este capítulo afondará nas conflitivas relacións familiares que se atopan no particular universo dos Matalobos.

Deste xeito, os espectadores poderán recordar a loita dos Viaño por apartar a súa filla do mundo do narcotráfico, a maltreita relación entre Arturo e Sara Campos, o tráxico final de Iván Matalobos e o duro enfrontamento entre os dous irmáns Matalobos, Marcos e Carmelo. Un enfrontamento que servirá para por de manifesto que, en Sardiñeira, os negocios sempre estiveron por riba de calquera lazo familiar.

Cómpre salientar que coa emisión dunha nova tempada de “Matalobos”, a Televisión de Galicia continúa apostando e ofrecéndolle a súa audiencia producións con selo galego, unha ficción que pouco a pouco está a ser recoñecida tanto a nivel nacional como internacional. Proba disto é a distinción que recibiu a serie “Matalobos” como Mellor Ficción de Televisión en Europa, un galardón polo que competían preto de 200 producións procedentes de 23 países, que aspiraban a 10 categorías. O premio foi entregado o pasado mes de maio nunha gala celebrada no marco do Congreso Anual das Televisións Públicas Europeas, agrupadas na asociación Circom, e organizado pola canle sueca SVT.