CRTVG Viva
Directivos de televisións públicas rexionais de 25 países comezan en Santiago un cumio do sector audiovisual europeo
Á 31ª Conferencia Anual de CIRCOM Regional, a rede europea de televisión, asisten, entre outros, directivos da BBC, Euronews, SVT, RTBF, RTP ou FORTA
A reunión, organizada pola Televisión de Galicia leva por lema “The Way Forward” (O camiño a seguir). Haberá debates sobre o papel das TV rexionais na sociedade, a aplicación das redaccións integradas e as solucións á crise económica desde os medios
Santiago, 07.05.2013.- Directivos de televisións públicas de 25 países europeos asisten desde hoxe martes en Santiago ás reunións previas da 31ª Conferencia Anual de CIRCOM, a asociación europea da televisión rexional que terá lugar este xoves e venres. A cita está organizada pola emisora pública Televisión de Galicia (TVG), baixo o lema "O camiño a seguir" (The Way Forward), facendo honra á cidade meta do Camiño de Santiago.
As sesións de traballo do auditorio na Facultade de Comunicación de Santiago serán emitidas en streaming pola internet (www.crtvg.é/crtvg/canles-tematicas/circom). Os debates principais estarán centrados nos temas de xestión estratéxica, produción de televisión, xornalismo e futuras tecnoloxías da comunicación. Os executivos dos medios tamén estudarán proxectos de coprodución e cooperación, actividades de capacitación e as oportunidades que se presentan para o futuro da televisión rexional. A mellora das prácticas nas redaccións integradas para produtos de televisión, radio e internet tamén serán obxecto de estudo durante a conferencia. Paralelamente, organízanse dous cursos de formación especializados.
O evento de tres días abrirase coa Gala Prix CIRCOM, mañá miercoles no Hostal dos Reis Católicos. Os premios teñen unha cuantía de 30.000 euros, e están divididos en 10 categorías, así como un premio final, o Grand Prix, que se dará a coñecer na Gala. Están considerados os galardóns máis prestixiosos de Europa para os programas de televisión rexional. Na pasada edición en Mälmoe (Suecia) a Televisión de Galicia levou o premio á mellor serie de ficción europea por “Matalobos”. A gala será retransmitida en vivo pola TVG e streaming a través da internet (www.crtvg.é/crtvg/canles-tematicas/circom).
CIRCOM Regional é a rede das emisoras de TV rexionais públicas en Europa e conta con máis de 250 estacións asociadas en 34 países.
Para máis información sobre CIRCOM:
www.circom-regional.eu
Para máis información sobre a Conferencia Anual:
http://conference.circom-regional.eu/
Noticias sobre a Conferencia, en Facebook:
http://www.facebook.com/events/285664978197537/
Na foto superior, reunión do comité executivo de Circom na Facultade de Ciencias da Comunicación en Santiago de Compostela.
