CRTVG

Buscar

CRTVG Viva

Programación TVG

Novo capítulo de 'Auga seca', con Teresa facendo demasiadas preguntas na empresa de transportes e Mauro desesperado por protexer a Silvia

22/11/2021

Mentres tanto, en Lisboa, Lázaro contrata un sicario para matar a Abel

Novo capítulo de 'Auga seca', con Teresa facendo demasiadas preguntas na empresa de transportes e Mauro desesperado por protexer a Silvia

Santiago, 22.11.2021.-    No capítulo desta noite de Auga seca (23:05 h), Teresa vai demasiado lonxe facendo preguntas na empresa de transportes responsable do traslado da maquinaria da auga seca. Pola súa parte, Mauro insiste: precisa tomar un descanso e volver á casa.

Mentres, a policía interroga a Silvia. Desesperado, Mauro busca un plan para protexela, pero suporía sacrificar a reputación de Fran, algo que sabe que lle vai traer problemas con Irene.

En Lisboa, Lázaro contrata a Nuno, un sicario, para matar a Abel. Viñas alégrase de que Teresa volva á casa, pero antes de que marche sería útil que botase unha ollada a algúns documentos da nave, talvez ela poida atopar algo. A atención de Teresa repara nun detalle, pero gárdao para si mesma.

ler máis

'Cos Pés na Terra' coñecerá esta semana as creacións dunha artesá da la e botarase ao monte cun cabreiro

21/11/2021

O espazo da TVG tamén descubrirá cultivos novos da man de tres rapaces que converteron a terra que pisan nun verxel cheo de sabor

'Cos Pés na Terra' coñecerá esta semana as creacións dunha artesá da la e botarase ao monte cun cabreiro

Santiago, 21.11.2021.-    O espazo ‘Cos pés na terra’ (23.15 h) ten este domingo unha cita con Anahí, os seus trebellos e as súas creacións. Con esta artesá da la, os espectadores descubrirán todo o que hai detrás das súas creacións feitas co tecido máis antigo que existe: o feltro.

O equipo do programa pasará tamén unha xornada en cooperativa na compaña de Simón, Martín e Harris, tres rapaces que converteron a terra que pisan os seus pés nun verxel cheo de sabor onde hai sitio tamén para cultivos novos.

Ademais, ‘Cos pés na terra’ botarase ao monte con Roberto e as súas cabras, nunha xornada en que comprobará que un can pastor é o mellor amigo do home e dos cabreiros.

ler máis

Os ritmos do grupo Efecto Pasillo e o fado da cantante María do Ceo enchen esta noite o escenario de 'Bamboleo'

20/11/2021

A música máis festiva chegará da man da orquestra Olympus, que traerá ao estudio unha mostra do seu espectáculo ‘Red Tour’

Os ritmos do grupo Efecto Pasillo e o fado da cantante María do Ceo enchen esta noite o escenario de 'Bamboleo'

Santiago, 20.11.2021.-    ‘Bamboleo’ (22.45 h), o espazo de entretemento dos sábados pola noite na Televisión de Galicia, contará nesta ocasión cos ritmos do grupo canario Efecto Pasillo, o fado da cantante María do Ceo e a música máis festiva da orquestra Olympus.

Universo’ é o título do novo sinxelo de Efecto Pasillo, un adianto do novo disco do grupo, que constitúe un canto de celebración da vida e á divulgación científica. Despois de celebrar dez anos de carreira musical cunha recompilación de éxitos e colaboracións con diversos artistas do panorama musical español, Efecto Pasillo xa está preparando un novo traballo para o ano que vén. Esta noite, os canarios interpretarán outros temas ben coñecidos, como ‘Pan y mantequilla’ e ‘Cuando me siento ben’, coa alegría e a positividade que os caracteriza.

Este sábado tamén estará no ‘Bamboleo’ a artista María do Ceo, que acaba de publicar o seu último traballo, ‘Vai de roda’, unha homenaxe á fadista portuguesa Amália Rodrigues. Pola súa parte, a orquestra Olympus traerá unha mostra do seu espectáculo ‘Red Tour’.

O tempo de baile do ‘Dirtidansi’ terá como protagonista a parella formada por Barito e Lisa, dous mozos que chegan desde a costa mediterránea para amosar o seu dominio dos ritmos urbanos e latinos.

No ‘Agora ou Nunca’, Adriana Grille e David Castro cantarán os éxitos ‘Daría’, de La Quinta Estación, e ‘Imposible’, de Luís Fonsi. No karaoke de ‘A Jrileira’ mediranse o Club de Fútbol Mandiá de Ferrol e o Barro C. F.

Mentres Claudio Pan e Tamara Pérez poñen a proba os convidados cos seus xogos, Isi contará as súas vivencias persoais máis divertidas. E para acabar xogando, chegará a proba máis picante e sexy do Bamboleo: ‘A ITV do Amor’.

ler máis

O 'Luar' especial a favor da Semana coa Infancia de Unicef contará coa música de Jeanette, Mojinos Escozíos, Son Trío e María Fumaça

19/11/2021

Tamén pasarán hoxe polo escenario a orquestra Finisterre, a Asociación Cultural e Musical da Laracha, a Agrupación Folclórica Antaruxas e Sorteiros e a Banda de Caldas de Reis, entre outros

O 'Luar' especial a favor da Semana coa Infancia de Unicef contará coa música de Jeanette, Mojinos Escozíos, Son Trío e María Fumaça

Santiago, 19.11.2021.-   O programa ‘Luar’ (21.55 h) súmase hoxe á XI Semana coa Infancia de Unicef cunha edición especial en que se coñecerá o seu labor para promover a saúde física e mental, a protección e o benestar da infancia. Xosé Ramón Gayoso e Trisha Fernández darán paso a contidos específicos sobre esta campaña e realizarán chamamentos á solidariedade da audiencia. Os espectadores/as poden colaborar con Unicef chamando ao 900 907 530, na páxina pequeñassoluciones.es, e tamén enviando SMS solidarias coa palabra AXUDA ao 28028, co custo cada mensaxe de 1,2 €.

No capítulo musical, o espazo da TVG recibirá a visita de Jeanette, cantante e compositora hispano-británica que se deu a coñecer a finais da década dos 60. É unha das embaixadoras máis perdurables da música española por todo o planeta e a súa máis perdurable icona pop. Esta noite interpretará algunhas das súas míticas cancións, como ‘Soy rebelde’.

Tamén están convidados a este ‘Luar’ especial os Mojinos Escozíos, grupo de hard rock e heavy metal que destaca, sobre todo, polas letras das súas cancións, humorísticas e irreverentes.

Outra das actuacións deste venres será a de Son Trío, formación integrada por Su Garrido Pombo, Susanna Blanco e Katerina Linke. A música do trío, que se define como unha rusa e dúas galegas namoradas da súa terra, caracterízase pola súa elegancia e contemporaneidade, cun estilo propio cheo de matices e suxestións. Os seus estudos e influencias pasaron pola música clásica, o jazz, o folk, o cantautor ou a bossa, e contan ademais con varios premios ao longo da súa carreira.

Nun programa especial entregado coa infancia non podía faltar unha proposta musical específica para os máis pequenos como é a da María Fumaça, cuxo tren musical é un canto á vida que no outono de 2012 traspasou os muros dunha casa para percorrer os teatros galegos.

Polo escenario tamén pasarán hoxe a orquestra Finisterre, a Asociación Cultural e Musical da Laracha, a Agrupación Folclórica Antaruxas e Sorteiros, da Fonsagrada, e a Banda de Caldas de Reis. Ademais, o humorista Oswaldo Digón ofrecerá un monólogo sobre os 30 anos de ‘Luar’.

Finalmente, non faltará unha nova entrega do concurso de talentos musicais ‘Recantos’, que desta volta contará coas actuacións de Ara Nieto, procedente da Costa da Morte, e de Iván Pérez, representante da comarca Ourense Sur.

ler máis

A coñecida presentadora e xornalista Mariló Montero revoluciona esta noite o 'Land Rober Tunai Show'

18/11/2021

O equipo do programa (21.55 h) vai poñer a proba o seu sentido do humor e as súas calidades interpretativas nas distintas seccións e sketchs desta edición

A coñecida presentadora e xornalista Mariló Montero revoluciona esta noite o 'Land Rober Tunai Show'

Santiago, 18.11.2021.-  Este xoves chega ao estudio do ‘Land Rober Tunai Show’ unha muller que non deixa indiferente a ninguén, a mesmisima Mariló Montero. Ver para crer! A presentadora e xornalista acode revolucionar o show esta noite e o equipo do programa vai poñela a proba nos distintos sketchs desta edición, coma nun caso de parellas, onde todo o mundo sabe que é unha experta no tema!

Mariló Montero tamén participará nunha voda un tanto revirada no pazo de Meirás. Iso si, non vai faltar detalle neste evento de clase alta. Por se fose pouco, tamén vai ir a cousa sobre pelotas... seica Mariló é unha crack no deporte!

Isto e máis con Roberto Vilar, Eva Iglesias, Miguel Canalejo e Víctor Fábregas este xoves, a partir das 21.55 horas, na Televisión de Galicia.

ler máis

Moncho Borrajo e Patricia Pérez revivirán os seus tempos de escola nunha nova entrega de 'Os mellores da clase'

17/11/2021

Ambos os dous lembrarán cousas esquecidas, divertiranse e, sobre todo, loitarán cos seus equipos por acadar o trofeo do programa

Moncho Borrajo e Patricia Pérez revivirán os seus tempos de escola nunha nova entrega de 'Os mellores da clase'

Santiago, 17.11.2021.-    Moncho Borrajo representa a época ye-yé e Patricia Pérez a movida viguesa dos 80. Como era a escola neses anos? E eles, eran bos ou malos alumnos? Todas estas preguntas terán resposta esta noite na Televisión de Galicia cunha nova entrega do programa Os mellores da clase (23:05 h).

Moncho Borrajo revivirá a fascinación que tiña polas películas de Marisol, e Patricia Pérez, as cancións de Michael Jackson que soaban no radiocasete do seu cuarto. Moncho e Patricia lembrarán cousas esquecidas, divertiranse e, sobre todo, loitarán cos seus equipos por acadar trofeo do programa.

ler máis

Emoción e moito amor agardan a audiencia da Galega coa estrea esta noite de '48 horas para o si'

16/11/2021

Este novo formato retrata, en 48 horas, unha petición de man e a organización dunha voda sorpresa, no caso dunha resposta favorable
 
Sara, co apoio da súa nai, porá hoxe toda a súa relación en xogo por casar con Santi

Emoción e moito amor agardan a audiencia da Galega coa estrea esta noite de '48 horas para o si'

Santiago, 16.11.2021.- Esta noite chega á Televisión de Galicia 48 horas para o si (23:05 h), unha divertida proposta de entretemento que fará as delicias dos espectadores e, sobre todo, do público máis romántico. A diferenza doutros programas de amor e enlaces, nesta estrea, un dos membros da parella xogarao todo, xa que deberá preparar en 48 horas unha petición de man e unha voda sorpresa. Pero para chegar a isto, un deles deberá conseguir o ansiado "Si, quero". Emoción, amor, nervios, sorpresas e diversión son os ingredientes principais deste novo formato, que a audiencia poderá vivir cada martes á noite na Galega.

Neste novo espazo de telerrealidade, presentado pola coñecida actriz Iolanda Muíños, haberá un verdugo, que é a persoa que solicita estar no programa e quere dar o paso de casar, e unha vítima, a súa parella, que participa totalmente enganada. O culpable ou verdugo vivirá estes dous días nunha autocaravana, onde, co apoio dun cómplice, un amigo ou membro da familia, deberá levar a cabo todos os preparativos da voda. Durante estas corenta e oito horas, os culpables deberán conseguir a voda perfecta e que a outra persoa lle dea o si. Mentres tanto, a vítima estará enganada pensando que vai participar nun programa de televisión para coñecer mellor a súa parella. E durante este proceso, a audiencia coñecerá tamén as familias de ambos e gozará dos momentos previos ao posible compromiso.

En cada unha das entregas coñeceranse parellas moi variadas, que engancharán os espectadores coas súas curiosas historias. E entre elas, algunhas darán o paso máis importante das súas vidas nunha fermosa localización galega, como é o Pazo Baión.

Sara e Santi, os protagonistas desta noite

ler máis

Esta noite, en 'Auga Seca', despois de enterrar o seu fillo, Mauro reúnese con Lázaro para afianzaren os seus acordos

15/11/2021

Allea á operación, Irene céntrase en honrar a súa memoria, mantendo ao seu carón unha fráxil Silvia

Esta noite, en 'Auga Seca', despois de enterrar o seu fillo, Mauro reúnese con Lázaro para afianzaren os seus acordos

Santiago, 15.11.2021.-    Nun novo capítulo da serie Auga Seca (23:10 h), que a semana pasada comezou a súa segunda temporada na TVG, os espectadores verán como, despois de enterrar o seu fillo, Mauro se reúne con Lázaro para afianzaren os seus acordos.

A familia atópase desfeita pola perda, e Irene, allea á operación en curso, céntrase en honrar a memoria do seu fillo mantendo ao seu carón unha fráxil Silvia. Atormentada pola culpa, Silvia visita a Leo no cárcere e chama a atención da policía sobre ela.

Pola súa parte, Teresa visita a Irene na Fundación, unha desculpa para coarse no despacho de Magdalena na busca de evidencias do envío da auga seca. A investigación continúa e Viñas segue os pasos de Fran ata unha nave, xa que a policía sospeita que as armas tamén estiveron alí.

ler máis

'Cos Pés na Terra' amosará como sacar o mellor rendemento das plantas e como deseñar xoias naturais

14/11/2021

Os espectadores verán tamén como progresa Adrián, apaixonado do fútbol e gandeiro de recente incorporación que ten conta dunhas vacas cachenas

'Cos Pés na Terra' amosará como sacar o mellor rendemento das plantas e como deseñar xoias naturais

Santiago, 14.11.2021.-   O equipo de ‘Cos Pés na Terra’ (23.15 h) coñecerá hoxe a Gonzalo, un rapaz cunha teima: que as plantas que cultiva non só sexan bonitas, senón que tamén lles axuden ás hortas a dar o mellor rendemento.

O programa da TVG ten tamén unha cita con Nerea, unha artesá que é unha auténtica xoia. Tal é así que lle vai dar forma con ela a algunha das xoias naturais que deseña co que lle agasalla a súa contorna.

Ademais, os espectadores verán como progresa Adrián, apaixonado do fútbol e gandeiro de recente incorporación que ten conta dunhas vacas cachenas, que ás veces poñen 'os partidos' ben difíciles.

ler máis

Os grupos Sweet California e A Banda da Balbina actúan esta noite no programa 'Bamboleo'

13/11/2021

A orquestra convidada é Fania Blanco Show, unha formación que celebra os seus 30 anos de historia na verbena presentando o seu espectáculo para esta temporada

Os grupos Sweet California e A Banda da Balbina actúan esta noite no programa 'Bamboleo'

Santiago, 13.11.2021.-  A festa do ‘Bamboleo’ (22.40 h) chega esta noite cun gran cóctel de música, diversión e entretemento. Xosé Manuel Piñeiro recibe nesta ocasión a visita do trío musical Sweet California. As mozas deixan atrás a súa imaxe anxelical e presentan dous temas novos, ‘Whisper’ e ‘Bet on me, adianto do seu próximo álbum de estudio. Na súa visita ao espazo da TVG, Sonia, Alba e Tamy cantarán ademais un dos seus grandes éxitos: ‘Vuelvo a ser la rara’.

Como é habitual, Claudio Pan e Tamara Pérez chegarán coas súas probas para os convidados, mentres Isi comparte aventuras e vivencias co seu inconfundible toque  humorístico.

Estará así mesmo en ‘Bamboleo’ A Banda da Balbina, que interpretará o seu último sinxelo: ‘E fagho ben’. Esta composición, con certa retranca e picaresca, foi creada durante o confinamento e está dedicada á muller galega.

A orquestra convidada ao programa de hoxe é Fania Blanco Show, unha formación que celebra os seus 30 anos de historia na verbena presentando o seu espectáculo para esta temporada. No que ao baile profesional se refire, a parella formada por Kenz e Juli traerá desde Madrid dúas fantásticas bachatas.

No ‘Agora ou Nunca’ cantarán Tania Queiruga e Ana Sánchez. As dúas exhibirán os seus dotes para a canción e levarán cadanseu disco de ouro. Dúas entidades deportivas participarán en ‘A Jrileira’: o Club Herdeiros de Dhais, de Lalín, e a Asociación Baloncesto Xinzo, que chega da Limia.

Finalmente, na ‘ITV do Amor’, a proba máis picante do ‘Bamboleo’, un concursante do público xogará contra unha parella e os seus amigos. En xogo hai moita diversión e un gran premio.

ler máis