CRTVG

Buscar

CRTVG Viva

Programación TVG

A asasina misteriosa segue esta semana, en ‘A lei de Santos’, agardando a mellor oportunidade para rematar o traballo

23/01/2022

No cuartel están moi ocupados intentando descubrir a súa identidade e por que atacou a Santos

A asasina misteriosa segue esta semana, en ‘A lei de Santos’, agardando a mellor oportunidade para rematar o traballo

Santiago, 23.01.2022.- Os seguidores da serie ‘A lei de Santos’ (23:10 h) verán hoxe como no cuartel de Viladesantos están moi ocupados intentado descubrir a identidade da misteriosa asasina que atacou a Santos e o por que.

Debido á vinculación persoal con Santos, Uxía non pode seguir no caso, pero iso non supón que vaia quedar de brazos cruzados e comeza unha investigación pola súa conta. A súa primeira medida é falar con Peixe para coñecer o verdadeiro pasado de Santos en Serramoura.

Pola súa parte, a asasina misteriosa segue en Viladesantos agardando a mellor oportunidade para rematar o traballo. O seu plan pasa por conseguir un traballo na vila e buscar a forma de acabar con Constante.

ler máis

A cantante Shaila Dúrcal e Xabier Díaz, un dos artistas galegos máis internacionais, visitan esta noite 'Bamboleo'

22/01/2022

Música, diversión e entretemento nunha velada en que actuará tamén a orquestra Costa Dorada

A cantante Shaila Dúrcal e Xabier Díaz, un dos artistas galegos máis internacionais, visitan esta noite 'Bamboleo'

Santiago, 22.01.2022.-  ‘Bamboleo’ (22.40 h) chega coma cada sábado coa súa fantástica mestura de música, diversión e entretemento. O espazo presentado por Xosé Manuel Piñeiro recibirá a visita de dous artistas de extraordinario talento e fama internacional: Shaila Dúrcal e Xabier Díaz. Ademais, contará coas actuacións da orquestra Costa Dorada.

A filla máis nova de Rocío Dúrcal e Antonio Morales ‘Junior’ iniciou a súa carreira musical como corista da nai e despois continuou a súa carreira como solista. Tras anos de éxitos, presenta un novo sinxelo, que hoxe interpretará en ‘Bamboleo’. Ademais de cantar, Shaila compartirá divertidas anécdotas da súa traxectoria e participará nos xogos que lle traerán os colaboradores: Claudio Pan e Tamara Pérez.

Xabier Díaz é un dos artistas galegos máis internacionais. Co seu último traballo, ‘As catedrais silenciadas’, liderou a lista de vendas na categoría folk a nivel estatal. Esta noite interpretará no programa da TVG o tema ‘Unha, dúas, tres e catro’ acompañado ao acordeón por Roberto Grandal.

O baile profesional chegará da man de dous bailaríns especialistas en bachata: Tamara e Cándido, que farán dous bailes con acrobacias incribles. Os participantes do ‘Agora ou nunca’ desta noite serán Aida Mosquera e David Míguez, que subirán ao escenario para cantar os temas ‘Ni la hora’, de Ana Guerra e Juan Magán, e ‘O tú o nada’, de Pablo Abraria.   

‘A jrileira’, o karaoke para entidades deportivas, recibirá a María, do Círculo Cultural Recreativo Deportivo Perlío, un club de fútbol de Fene, e a Roberto, do Club Torre Sociedade Deportiva da Coruña. En primeiro lugar, cantarán ‘5 sentidos’, de Dvicio e Taburete, e despois terán minuto e medio para adiviñar o maior número posible de intérpretes.

Finalmente, en ‘A ITV do amor’ un concursante do público terá que adiviñar cal é a parella de Roi en función das respostas das posibles mozas: Esther, Iria e Adalía.

ler máis

Bertín Osborne presenta novo disco en 'Luar', onde tamén sobresae a música de Xil Ríos, Davide Salvado e a orquestra Cinema

21/01/2022

No que respecta ás intervencións humorísticas, gozarase coas divertidas propostas de Pedro Brandariz, Fran Rei, Campos, Crespo, Marcos Pereiro e Lucía Veiga

Bertín Osborne presenta novo disco en 'Luar', onde tamén sobresae a música de Xil Ríos, Davide Salvado e a orquestra Cinema

Santiago, 21.01.2022.-   Xosé Ramón Gayoso e Trisha Fernández danlle a benvida en Luar (21:50 h) este venres a Bertín Osborne, que acaba de publicar novo disco, 40 años no son nada. O versátil artista ofrecerá algunhas das cancións inéditas, que recolle neste traballo desenvolvido durante o confinamento, co gallo de conmemorar catro décadas de traxectoria musical.

Da música do cantante andaluz a toda unha lenda da cultura galega: Xil Ríos. O cantautor e compositor moañés interpretará tamén algún dos seus temas máis recentes, como é o caso de "Engaiolar".

Outra das actuacións destacadas da noite corresponderalle ao marinense Davide Salvado, artista de música tradicional que compartiu escenario con Xosé Manuel Budiño e Ugía Pedreira, entre outros, e mesmo se achegou a xéneros como o cabaré.

Os ritmos da coruñesa orquestra Cinema e os cantos e danzas do Grupo de música e baile tradicional Trébede completan o elenco musical desta edición.

No que respecta ás intervencións humorísticas, o programa gozará coas divertidas propostas dos Ramistas, grupo artístico formado por Pedro Brandariz e Fran Rei, do dúo Campos e Crespo e tamén de Lauren (Marcos Pereiro) e Sabela Folgueiras (Lucía Veiga).

Finalmente, no certame "Recantos" competirán Rubén Darío (Ourense central) e Jennifer Cambón (Terras de Ordes), mentres que o concurso telefónico disporá dun bote acumulado de 5.000 euros. Cómpre salientar, ademais, que nesta edición dedicada ao Morrazo algúns dos contidos e convidados estarán relacionados con esta comarca pontevedresa.


ler máis

O compostelán Roi Méndez dará boa mostra do seu sentido do humor e do seu talento no 'Land Rober Tunai Show'

20/01/2022

O programa da Galega recibirá, amais, as destacadas visitas da raíña Isabel II e da alcaldesa máis disparatada

O compostelán Roi Méndez dará boa mostra do seu sentido do humor e do seu talento no 'Land Rober Tunai Show'

Santiago, 20.01.2022.-  Este xoves chega á TVG un dos triunfitos máis queridos, o compostelán Roi Méndez, quen asiste coas ganas de revolucionar o estudio do ‘Land Rober Tunai Show’.

O equipo do programa vai comprobar esta noite canto sabe o artista galego do talento que hai en Galicia, nunha nova entrega de ‘Vexo voces’ e porá a proba a relación cos seus excompañeiros dun xeito ben peculiar...

Esta edición contará tamén coa destacada visita da raíña Isabel II. Os espectadores verán como a reciben na casa real. E chega, ademais, a alcaldesa máis disparatada cunha subvención debaixo do brazo! A cousa cheira mal!

Isto e máis, con Roberto Vilar, Eva Iglesias, Víctor Fábregas e Miguel Canalejo, este xoves, a partir das 21.50 h, na Televisión de Galicia.


ler máis

Novo reto para os cinco famosos de 'Comando G', esta semana coa cantante Lucrecia como artista convidada

19/01/2022

O programa (23:00 h) converterá a Paloma Lago en percebeira; a Lucía Rodríguez, en ximnasta; a Alberto Comesaña, en pasteleiro; a Trisha Fernández, en xogadora de fútbol gaélico, e a Patricia Pérez, en peiteadora de animais

Novo reto para os cinco famosos de 'Comando G', esta semana coa cantante Lucrecia como artista convidada

Santiago, 19.01.2022.-  Xosé Manuel Piñeiro, Xosé Luís Blanco Campaña e a artista convidada, Lucrecia, serán esta noite os encargados de valorar as experiencias que terán que superar esta semana os famosos de Comando G, ademais das súas actuacións musicais no escenario, en que versionan cancións moi coñecidas.

Paloma Lago viaxará moi cedo ata A Guarda para converterse nunha valente percebeira. Pepi Mariño será a encargada de que a modelo e presentadora sexa unha compañeira máis da confraría. Unha semana máis, demostrará que cada experiencia é unha oportunidade para coñecer un novo oficio e poñer todo da súa parte para cumprir o reto con sobresaínte.

Lucía Rodríguez sempre se queixa de que é arrítmica, así que esta semana sairá da súa zona de confort para formar parte do Club Maniotas de Vigo, de ximnasia rítmica. Unha experiencia dura e inesquecible en que a presentadora se esforzará moito para realizar un adestramento e aprender un anaco da coreografía que as ximnastas levaron ao Campionato de España. Aiala Ortiz será a encargada de que, polo menos, o intente.

Pola súa parte, Alberto Comesaña terá que presentarse a unha oferta de traballo dunha pastelería. Alba Pahino será a súa xefa durante toda unha xornada en que terá que aprender o oficio e sacar adiante todos os pedidos. Con bastantes dificultades, o cantante de Amistades Peligrosas traballará duro para que o contraten.

Mentres, Trisha Fernández vivirá esta semana unha das súas experiencias máis duras. Xunto a Diego Fernández, coñecerá o fútbol gaélico, un deporte semellante ao rugby, que require estar moi en forma. Os espectadores verán a presentadora levar o seu físico ao límite, nun xogo de equipo pouco coñecido pero cunha grande antigüidade.

E Patricia Pérez entrará por primeira vez nun salón de peiteado de animais. Terá que converterse nunha empregada máis e atender varios clientes, que non lle porán o traballo nada doado. Aínda así, a presentadora demostrará a súa paixón e habilidade cos animais.

ler máis

O exconcursante dun reality, protagonista en '48 horas para o si' da petición de man desta semana

18/01/2022

A historia de amor deste martes comezou arredor da televisión hai máis de sete anos, cando Miriam se fascinou con Daniel ao velo intervir nun concurso para atopar parella

O exconcursante dun reality, protagonista en '48 horas para o si' da petición de man desta semana

Santiago, 18.01.2022-   A historia desta noite de 48 horas para o si naceu na televisión e, se a sorte segue do seu lado, a parella podería poñer o ramo e celebrar o seu gran día tamén neste medio. Este martes acode ao programa coa intención de casar Daniel, que disporá de 48 horas para levar a cabo os preparativos da petición de man e a posible celebración da súa voda con Miriam. Para este cometido, contará coa axuda dun cómplice, o seu amigo David Pedre. Ademais, Alba, estilista da Coruña, e Rubén e Fer, dous organizadores de vodas coruñeses asentados en Marín, contribuirán a facer realidade o soño de Daniel.

Os protagonistas desta semana, Daniel Iglesias e Miriam Conejo, coñecéronse hai máis de sete anos tras o paso do mozo por un programa de telerrealidade cuxa finalidade era conseguir parella. Miriam, unha gran fan dese programa, ao quedar fascinada co rapaz, comezou a escribirlle vía Twitter. Despois de conectar e falar a diario durante catro meses, Daniel decidiu ir coñecela en persoa a Huelva. Todo saíu de marabilla e, finalmente, Miriam decidiu hai dous anos instalarse en Galicia por amor. Establecéronse en Narón e hai pouco mercaron unha casa.

A presentadora Iolanda Muíños recibirá hoxe en 48 horas para o si a Daniel, un mozo moi tradicional do Ferrol, de 35 anos, que traballa no exército, e quere dar o paso de casar e ter fillos co amor da súa vida. Pola súa parte, Miriam, de 28 anos, xerocultora e natural de Palos de la Frontera, acode totalmente enganada ao espazo da Galega, xa que pensa que vai participar no concurso Que parellas!, consistente en demostrar que se coñecen á perfección como parella.

El arriscarao todo para conseguir o ansiado "Si, quero", pero, cal será a reacción de Miriam? A resposta, esta noite, nunha nova entrega do programa 48 horas para o si, a partir das 23:00 horas.

ler máis

Os espectadores de 'Cos pés na terra' poderán introducirse este luns no mundo dos bonsais

17/01/2022

O programa tamén ten unha cita cunha gandeira nova afeita a todo tipo de máquinas e cos promotores dun proxecto de restauración onde sempre se serven produtos naturais

Os espectadores de 'Cos pés na terra' poderán introducirse este luns no mundo dos bonsais

Santiago, 17.01.2022.-   Cos pés na terra (23:05 h) vaise meter hoxe no mundo dos bonsais da man de Alberto, un auténtico experto, co que o equipo do programa aprenderá a darlles forma, a limpalos e ata a colocalos na casa.

Os espectadores de bo dente están de sorte, xa que o proxecto de restauración de Carmen e Jose vai facer as delicias dos máis larpeiros. O espazo da TVG ten reserva para o seu restaurante, alí onde sempre se serve produto cen por cento natural e da casa.

A audiencia coñecerá tamén a Andrea, unha gandeira nova afeita a moverse en todo tipo de máquinas, grandes e pequenas. Esta rapaza leva o orgullo de gandeira ata no teléfono móbil.

ler máis

En 'A lei de Santos' preocupa o estado de saúde de Santos e que a asasina volva para rematalo no hospital

16/01/2022

Un premio de lotaría atrae un estafador á vila disposto a sacar tallada

En 'A lei de Santos' preocupa o estado de saúde de Santos e que a asasina volva para rematalo no hospital

Santiago, 16.01.2022.-    Na entrega de ‘A lei de Santos’ (23.05 h) que a TVG ofrece esta noite, toda a vila está pendente do estado de Santos despois do ataque que sufriu a mans dunha asasina misteriosa contratada para matalo. Santos segue ingresado no hospital, pero, mentres loita por saír adiante, comeza a soñar unha vida alternativa en que Rivas está viva e Pancho quere axustar contas por asuntos do pasado.  

Na vida real, a Garda Civil compaxina a investigación para atopar a responsable do ataque coa custodia do cuarto en que está Santos, pois sospeitan que a misteriosa asasina pretende rematar o traballo.

Ao mesmo tempo, Lourenzo está inmerso na posta en marcha dun novo negocio para Viladesantos. O premio da lotaría supón un apoio moi importante, pero tamén atrae moitos problemas: un estafador aparece na vila disposto a sacar tallada.

ler máis

Gran festa no 'Bamboleo' deste sábado, coas actuacións de Raúl, Pili Pampín e a orquestra Marbella

15/01/2022

Coma cada semana, o programa presentado por Xosé Manuel Piñeiro contará coas súas seccións habituais e coa participación dos colaboradores Tamara Pérez, Claudio Pan e Isi

Gran festa no 'Bamboleo' deste sábado, coas actuacións de Raúl, Pili Pampín e a orquestra Marbella

Santiago, 15.01.2022.-    ‘Bamboleo’ (22.40 h) preséntase esta noite ante os seus seguidores e toda a audiencia da Televisión de Galicia cunha gran festa. Hoxe está convidado ao programa o cantante vitoriano Raúl. Despois de 20 anos sobre os escenarios, continúa cunha célebre carreira musical, en que destacan temas como ‘Sueño su boca’ ou ‘As de corazones’. Hoxe Raúl presentará temas novos e compartirá diversión no programa cunha estrela da  canción galega: Pili Pampín.

Á festa sumarase a orquestra Marbella, que traerá unha coidada selección da música máis verbeneira. E baile moi profesional será o que traerán Pedro e Noelia, unha parella de Vigo, que levan dous anos triunfando alén das nosas fronteiras.

Como cada sábado, os colaboradores porán a proba os convidados no ‘Sobes ou baixas’ cos vídeos de Tamara Pérez e os orixinais xogos que trae Claudio Pan. Estará tamén o furacán de Arca, Isi, que contará unha nova e divertida anécdota.   

Eva Serantes e José Manuel Varela serán os participantes no ‘Agora ou nunca’. Interpretarán os temas ‘When we were young’, de Adele, e ‘Galilea’, de Sergio Dalma. No karaoke de ‘A jrileira’ para entidades deportivas participarán o Amio Sociedade Deportiva e o Club de Baloncesto Allariz. Primeiramente, deberán cantar o tema ‘Si por mi fuera’, de Beret, e posteriormente terán que adiviñar o maior número de intérpretes en minuto e medio.

Finalmente, a ‘ITV do amor’ porá a proba a unha parella de namorados que queren gañar o premio que hai en xogo e para iso terán que enganar un participante de público. É a proba máis picante do programa, en que colaboradores, público e a xente da casa saca as súas propias conclusións.    

ler máis

Lucía Pérez, Serafín Zubiri, Orquestra M-3 e o rapeiro XMaseda enchen de música e emoción o 'Luar' deste venres

14/01/2022

Os Trabazos, a Asociación Cultural Rosalía de Castro, Os Coribantes de Buchabade e os regueifeiros Lupe Blanco e Suso de Xornes completan a oferta musical da noite, xunto ás intervencións dos concursantes de ‘Recantos’
 

Lucía Pérez, Serafín Zubiri, Orquestra M-3 e o rapeiro XMaseda enchen de música e emoción o 'Luar' deste venres

Santiago, 14.01.2022.-    Xosé Ramón Gayoso e Trisha Fernández traen un venres máis o mellor entretemento para gozar do tempo de lecer na compaña da Galega. Esta noite volverá subir ao escenario de ‘Luar’ (21.55 h) todo un exemplo de superación e de emoción en cada unha das súas interpretacións, o cantante Serafín Zubiri.

A nosa representante galega en Eurovisión 2011, Lucía Pérez, regresa tamén a ‘Luar’ para presentar ‘Na miña pel’, un canto ás mulleres da súa vida, co que amosa unha imaxe máis renovada pero sen esquecerse das súas raíces. Este novo sinxelo da artista do Incio, serve de antesala ao que será o seu oitavo disco de estudio.

Neste programa dedicado ás Terras de Caldelas, algúns dos contidos e convidados da noite estarán relacionados con esta comarca ourensá, como é o caso da actuación do grupo Os Trabazos.

A música da nosa terra seguirá soando no espazo nas intervencións do rapeiro de Viveiro XMaseda, Xosé Maseda Calvo, que presentará ‘Paparrexo’, unha sentida homenaxe ao seu avó coa que está arrasando nas redes sociais; da Orquesta M-3, grupo formado por seis mulleres, con grandes voces, que abrangue todos os estilos musicais; da Asociación Cultural Rosalía de Castro; dos Coribantes de Buchabade, de Ponte Caldelas, e dos regueifeiros Lupe Blanco e Suso de Xornes.

No que respecta ás intervencións humorísticas, o programa gozará coas divertidas propostas dos Ramistas, grupo artístico formado por Pedro Brandariz e Fran Rei, e do dúo Campos e Crespo.

Finalmente, no certame ‘Recantos’ competirán David Gallego (Ourense oriental) e Celtia Buján (Terras de Lugo), e o concurso telefónico disporá dun bote acumulado de 4.500 euros.

ler máis