CRTVG

Buscar

CRTVG Viva

Novas CRTVG

A CRTVG busca ata o 5 de decembro a canción que lle porá a banda sonora ao Nadal galego

22/11/2022

As persoas interesadas en participar na oitava edición do concurso ‘Este Nadal canta con nós’ deben enviar os seus temas, inéditos e escritos en galego, ao enderezo canciondonadal2022@crtvg.es

A CRTVG busca ata o 5 de decembro a canción que lle porá a banda sonora ao Nadal galego

Santiago, 22.11.2022.-    A CRTVG mantén aberto ata o 5 de decembro o prazo para participar na oitava edición do certame ‘Este Nadal canta con nós’, que ten como obxectivo atopar a mellor banda sonora para acompañar os galegos e galegas este Nadal.

As cancións participantes deben de ser inéditas e orixinais, ademais de estaren escritas en lingua galega. Cada grupo ou solista presentará un só tema, cunha duración non superior aos 3 minutos, e poderá enviar un vídeo musical do mesmo. Os participantes enviarán as súas cancións, de temática libre, en formato mp3 e, en caso de presentar vídeo musical, en mp4, ao enderezo canciondonadal2022@crtvg.es.

O premio conta cunha dotación económica de 1.000 euros e, para decidir o gañador, o xurado valorará a orixinalidade, a calidade técnica e o acompañamento dun vídeo musical. Ademais do premio, a canción gañadora terá difusión na televisión e na radio públicas, así como nas redes sociais da Corporación.  

O xurado estará composto por cinco persoas designadas pola dirección da Corporación Radio e Televisión de Galicia e o 12 de decembro farase público o tema vencedor e unha lista puntuada ata o quinto posto na web www.crtvg.gal, onde tamén se poden consultar as bases do concurso.

Esta é a oitava edición deste concurso musical, que anteriormente gañaron os nenos do CEIP San Clemente de Caldas de Reis, coa súa proposta ‘Cando é Nadal’; Iván Vale, co tema ‘O meu Nadal perfecto’; Plan Siberia, con ‘Xunto a ti’; Susana Martínez, con ‘O sinal’; o CEIP Covas de Meaño, con ‘Saúde e cante o merlo’; Kiko Bea, coa canción ‘Un Nadal distinto’, e o grupo xuvenil King Kids, que se fixo coa última edición do certame grazas ao tema ‘Un bo Nadal’.

ler máis

A redactora da Radio Galega Nuria López, Premio de Xornalismo Cívico Alfredo Vicenti polo podcast 'Historias dun país en guerra'

21/11/2022

Nel recóllense testemuñas reais de distintas vítimas da guerra en Ucraína, a través dos relatos de residentes do país, persoas que tiveron que fuxir ou que teñen familia alá

Este podcast documental da RG contou con 35 capítulos que foron publicados simultaneamente en RadioGalegaPodcast.gal e nas plataformas iVoox e Spotify os pasados meses de maio e xuño

A redactora da Radio Galega Nuria López, Premio de Xornalismo Cívico Alfredo Vicenti polo podcast 'Historias dun país en guerra'

Santiago, 21.11.2022.-    A redactora e locutora da Radio Galega Nuria López Presedo, gañou esta fin de semana o Premio de Xornalismo Cívico Alfredo Vicenti 2022, organizado polo Ateneo de Santiago, pola súa serie de podcasts titulada ‘Historias dun país en guerra’, da plataforma RadioGalegaPodcast.gal.

Este podcast documental da Radio Galega contou con 35 capítulos que foron publicados simultaneamente en RadioGalegaPodcast.gal e nas plataformas iVoox e Spotify os pasados meses de maio e xuño. Nel, a xornalista recolleu testemuñas reais de distintas vítimas da guerra en Ucraína, a través dos relatos de residentes do país, persoas que tiveron que fuxir ou teñen familia alá.

‘Historias dun país en guerra’ dálles voz a ucraínos que están a sufrir o horror da guerra. A xornalista da Radio Galega Nuria López trasládalles aos oíntes estes testemuños, en primeira persoa, que expoñen as atrocidades e as duras historias persoais que está deixando tras de si o conflito. En cada entrega, este podcast sitúa no mapa un dos territorios afectados pola invasión rusa para priorizar, a continuación, o duro transo que están a vivir as familias ucraínas, a través dos relatos de cada protagonista.

Por outra parte, o xurado do premio adxudicoulle un accésit a Miguel Rodríguez Fernández e a Duarte Romero Varela polo traballo ‘Cooperativas de vivenda en cesión de uso: unha alternativa para un fogar accesible?’. A entrega do galardón, de 1.000 euros e unha peza conmemorativa, terá lugar nun acto público o vindeiro mes de decembro en Santiago de Compostela.

Con esta e outras apostas, segue a consolidarse o proxecto RadioGalegaPodcast.gal, nado a finais de 2021 e que continúa sumando contidos, con novos podcasts nativos dixitais á marxe dos patróns horarios da radio e coa vontade de alcanzar diferentes públicos niño. Así, ao pioneiro ‘Superando a ficción’ uníronse outros 40 podcasts. Entre outros, ‘Un ollo de vidro’, ‘A fin do mundo’, ‘Como que non?’, ‘Estudio 3. Desclasificados’, ‘Moito ollo’, ‘Hey, ho, let’s go!’ e ‘Os pobres si que choran’. A plataforma está tamén dispoñible en Spotify e en iTunes, co que se sitúa nos novos espazos de consumo da audiencia.

ler máis

A audiencia da CRTVG axuda a que UNICEF trate máis de 3.000 nenos con desnutrición aguda

21/11/2022

Os medios públicos galegos emitiron a semana pasada, no marco das súas AcciónsG e da XII Semana coa Infancia de UNICEF, contidos especiais para sensibilizar sobre as súas necesidades 

A audiencia da CRTVG axuda a que UNICEF trate máis de 3.000 nenos con desnutrición aguda

Santiago, 21.11.2021.-    A colaboración cidadá con UNICEF a través da Semana coa Infancia da CRTVG serviu para dotar de tratamento contra a desnutrición aguda grave 3.289 nenos e nenas durante un día.

No marco da XII Semana coa Infancia, a TVG e a Radio Galega, así como o portal web crtvg.gal e as redes sociais da Corporación axudaron a que se coñecese o impacto da guerra de Ucraína, a seca e a inflación, que deron como resultado un grave aumento da desnutrición no Corno de África, en países como Somalia ou O Sudán do Sur, ou o aumento da pobreza na Federación Rusa, Romanía e a propia Ucraína.

Coa campaña deste ano, enmarcada nas AcciónsG de Responsabilidade Social Corporativa da CRTVG, UNICEF puxo o foco na saúde mental da infancia e a adolescencia, achegando nos distintos espazos da TVG e da Radio Gaelga datos de acoso escolar e ciberacoso, en Galicia e en España, e como inflúen nos niveis de benestar emocional, integración social e satisfacción coa vida dos nenos e nenas que os sofren.

Entre outros moitos programas, ‘Bos Días’, ‘A Revista’, ‘Galicia Noticias’ e o espazo ‘Dígocho Eu’ colaboraron emitindo reportaxes e entrevistas relacionadas con esta XII Semana coa Infancia. Ademais, ‘Luar’ ofreceu o pasado venres unha edición especial en que deu a coñecer o labor de UNICEF en distintos países e se fixeron chamamentos á solidariedade da audiencia, e o espazo ‘Zigzag’ contou este domingo coa participación de nenos e nenas como presentadores e técnicos durante un día.

Hai que engadir a colaboración de espazos informativos e de entretemento da Radio Galega como ‘Galicia por Diante’, ‘A Bóla Extra’, ‘A Tarde’, ‘A Crónica’, ‘Convivir’ e ‘Galicia en Goles’, e o labor do portal web e das redes sociais da Corporación. E, sobre todo, hai que salientar a colaboración dos espectadores dos medios públicos galegos que se sumaron á campaña. Grazas a todas as colaboracións dos cidadáns, oíntes e televidentes da Galega, a ONG, cumpriu un dos seus obxectivos de axuda e difusión das diferentes mensaxes ligadas aos Obxectivos do Desenvolvemento Sostible da ONU, que son tamén as bases das AcciónsG da Corporación RTVG.

ler máis

A CRTVG participa no IV Congreso de Medios de Comunicación e Igualdade de Xénero

18/11/2022

A adxunta ao director xeral da CRTVG, Rosa Vilas, representou a Corporación nunha mesa redonda: ‘As televisións, plataformas para a consecución da igualdade e a erradicación da violencia de xénero’

A CRTVG participa no IV Congreso de Medios de Comunicación e Igualdade de Xénero

Santiago, 18.11.2022.-    Rosa Vilas, adxunta ao director xeral da CRTVG, participou este venres en Santiago no IV Congreso Medios de Comunicación e Igualdade de Xénero ‘A igualdade e a violencia de xénero en tempos de guerra’, organizado pola Asociación de Periodistas de Galicia (APG) coa colaboración da Xunta de Galicia.

Vilas interveu no coloquio ‘As televisións, plataformas para a consecución da igualdade e a erradicación da violencia de xénero’, xunto coas xornalistas Ana Lorenzo, de RTVE Galicia; Eva Vázquez, delegada de Atresmedia en Galicia, e Patricia Martínez, coordinadora da delegación en Galicia de Atlas (Telecinco-Cuatro). Entre outras cuestións, debateuse tamén sobre o papel da prensa dixital na visibilización dos puntos de vista femininos.

CRTVG recibiu este mes de novembro a acreditación que a recoñece como Empresa Igual en Xénero 2022. Este Indicador ARDAN é outorgado polo servizo de información empresarial desenvolvido polo Consorcio da Zona Franca de Vigo e que se publica anualmente.  A entidade emisora salienta que a CRTVG se atopa entre o “4 % das máis de 35.000 empresas analizadas en Galicia que consegue superar os exixentes parámetros para obter estes recoñecementos”.  A CRTVG repite en 2022 a distinción que xa acadara en 2020 e 2019 e 2021 como Empresa Igual en Xénero.

ler máis

Manuel de Lorenzo, presentador do programa de Radio Galega Música 'Cara B', recibe o Premio Julio Camba de Xornalismo

16/11/2022

O xornalista e escritor ourensán foi galardoado polo seu artigo ‘Límites’, publicado en febreiro do ano pasado no diario ‘El Progreso’

Cada mércores, ás 23.00 h, conduce na emisora pública un espazo dedicado ás pequenas grandes anécdotas que enchen a historia da música

Manuel de Lorenzo, presentador do programa de Radio Galega Música 'Cara B', recibe o Premio Julio Camba de Xornalismo

Santiago, 16.11.2022.-    O xornalista e escritor ourensán Manuel de Lorenzo, presentador do programa de Radio Galega Música ‘Cara B’ e colaborador do espazo ‘Galicia por Diante’, resultou onte gañador, no transcurso dun acto celebrado en Madrid, do XLIII Premio Internacional Afundación de Xornalismo Julio Camba. De Lorenzo recibiu o galardón polo artigo ‘Límites’, publicado en febreiro do ano pasado no xornal ‘El Progreso’, co que lle rende homenaxe á súa nai tras o seu falecemento.

Ao galardón presentáronse nesta ocasión 118 traballos enmarcados no xénero do xornalismo literario ou de opinión. Os outros finalistas desta edición foron Esther Baeza Navarro (Rosa Palo), polo seu artigo ‘Ex’, publicado en todas as cabeceiras rexionais do Grupo Vocento, e Alberto Olmos, por ‘Cuando hasta la nieve nos la tomamos personalmente’, en Elconfidencial.com. O xurado estivo formado por Alfredo Conde, como presidente; Cristina Sánchez-Andrade, Bibiana Candia, Ramón Pernas e Gervasio Posadas, como vocais, e Isaac González Toribio, que exerceu de secretario.

Ademais da súa actividade como articulista e escritor, Manuel de Lorenzo conduce desde a temporada 2019-2020 o programa ‘Cara B’, que se emite os mércores ás 23.00 h en Radio Galega Música. Este espazo, dedicado ás pequenas grandes anécdotas que enchen a historia da música, amosa a cara descoñecida das cancións, artistas e álbums, explicando a letra pequena da historia. Porque a historia da música tamén conta con letra pequena, con momentos únicos que, ocultos entre os demais, adoitan pasaren desapercibidos para o gran público, pero que constitúen relatos apaixonantes que tamén merecen ser contados. As distintas entregas de ‘Cara B’ están dispoñibles na plataforma RadioGalegaPodcast.gal.

ler máis

A saúde mental na adolescencia, protagonista da campaña de UNICEF e CRTVG

13/11/2022

TVG, Radio Galega e os medios dixitais emitirán desde o luns 14 ata o domingo 20 de novembro, Día Mundial da Infancia, contidos especiais relacionados coa protección da infancia

A audiencia poderá colaborar con UNICEF mediante o envío de SMS solidarias coa palabra AXUDA ao 28028. Co custo dunha mensaxe, 1,2 €

A campaña contará coa participación de cativos en programas como o ‘ZigZag’ ou 'Galicia en Goles'

A saúde mental na adolescencia, protagonista da campaña de UNICEF e CRTVG

Santiago, 11.11.2022.-  No marco da súa política de Responsabilidade Social Corporativa, a CRTVG únese un ano máis a UNICEF na XII Semana coa Infancia, que se desenvolverá desde o luns 14 ata o domingo 20 de novembro.

Ao longo de toda a semana, os programas informativos da TVG e da Radio Galega ‘Telexornal Mediodía’, ‘Telexornal Serán’, ‘Bos Días’, ‘A Revista’, ‘Galicia Noticias’ ‘Galicia por Diante’, ‘A Bóla Extra’, ‘A Tarde’, ‘A Crónica’, ‘Convivir’, ou mesmo o espazo ‘#DígochoEu’ colaborarán emitindo contidos e entrevistas relacionados co impacto das Tecnoloxías da Relación, a Información e a Comunicación (TRIC) na saúde mental da adolescencia; a educación en dereitos e a figura do coordinador de benestar e protección nos centros educativos; a privación material infantil e o impacto dos Presupostos Xerais do Estado na infancia ou como exercen os rapaces e rapazas o dereito á participación no X Foro de Participación Infantil e Adolescente no Parlamento de Galicia.

Así, o ‘Bos días’ do luns contará con Myriam Garabito, presidenta de UNICEF Galicia, o do venres con Gabriel González-Bueno, especialista en políticas de infancia de UNICEF España, e o sábado con Óscar Belmonte, de UNICEF Educación. ‘A revista’ emitirá o xoves unha entrevista en directo con Blanca Carazo, responsable de programas de UNICEF España, e ao longo da semana darase conta do X Foro de Participación Infantil e Adolescente no Parlamento de Galicia e visitarase un colexio de Poio (Pontevedra) recoñecido como referente na educación en dereitos.

Xa o domingo 20 de novembro, Día Mundial da Infancia, a CRTVG promoverá que a infancia e a adolescencia teñan voz, polo que se convidará nenos e nenas de varios municipios de Galicia a converterse, durante uns minutos, en xornalistas. Os máis pequenos serán os protagonistas do programa cultural ‘ZigZag’, compartindo tarefas de presentación con María Solar.

Un ano máis, ‘Luar’ ofrecerá, o venres 18, unha edición especial en que se coñecerá o labor de UNICEF para paliar o grave aumento da desnutrición derivado da inflación, a seca e o conflito de Ucraína ou como a organización promove a nutrición, a saúde e o dereito á auga, á hixiene e ao saneamento da infancia máis vulnerable.

Na Radio Galega, entre outros contidos, o ‘Galicia en Goles’ do domingo 20 dará de novo voz á infancia. Julia, 9 anos, de Redondela, entrevistará, xunto ao xornalista Tony López García, a Susana Rodríguez Gacio, médica e campioa paralímpica de tríatlon. A estas accións cómpre engadir a colaboración do portal web e as redes sociais da CRTVG, que apoiarán a campaña co cancelo #SemanacoaInfancia e visibilizarán a importancia de promover os dereitos da infancia recollendo as entrevistas, noticias e reportaxes nunha canle temática en www.crtvg.gal.

Saúde mental e impacto da guerra

    Este ano, UNICEF pon o foco na saúde mental da infancia e a adolescencia. Achegaranse os datos de acoso escolar e ciberacoso, en Galicia e en España, e como inflúen nos niveis de benestar emocional, integración social e satisfacción coa vida dos nenos e nenas que os sofren. Outra das temáticas será tratar como previr e actuar ante casos de violencia desde o ámbito educativo. Farase fincapé na importancia da implantación da figura do coordinador de benestar e protección nos centros educativos, tal e como establece a Lei Orgánica de Protección Integral á Infancia e á Adolescencia fronte á Violencia (LOPIVI). Analizarase tamén o impacto da guerra de Ucraína, a seca e a inflación, que deron como resultado un grave aumento da desnutrición no Corno de África, en países como Somalia ou Sudán do Sur, ou o aumento da pobreza na Federación Rusa, Romanía e a propia Ucraína.

A audiencia poderá colaborar con UNICEF mediante o envío de SMS solidarias coa palabra AXUDA ao 28028. Co custo dunha mensaxe, 1,2 €, UNICEF poderá proporcionar tratamento durante un día a un neno con desnutrición aguda grave. Tamén poderá promover os dereitos da infancia na páxina unicef.es. Con 10 euros ao mes durante un ano, UNICEF pode dar tratamento durante un día contra a desnutrición a 100 nenos.

IMPORTE DO SERVIZO DE SMS 1,2 € ÍNTEGROS PARA UNICEF. Movistar, Vodafone, Orange, Amena, Euskaltel e Yoigo. Operado por UNICEF. N.atn.clte: 900 907 500, Información legal e protección de datos: www.unicef.es

ler máis

A CRTVG obtén o Indicador ARDAN 2022 de empresa igual en xénero

04/11/2022

A Zona Franca de Vigo comunicou que a Corporación está, por cuarto ano consecutivo, entre o “4 % das máis de 35.000 empresas analizadas” que acadan os criterios para obter este distintivo

Recoñece as empresas “que presentan altos valores de igualdade desde unha perspectiva de xénero no eido laboral medida en tres dimensións: igualdade de funcións, igualdade de retribucións e igualdade por actuacións"

A CRTVG obtén o Indicador ARDAN 2022 de empresa igual en xénero

Santiago, 04.11.2022.-    A CRTVG recibiu este venres a acreditación que a recoñece como Empresa Igual en Xénero 2022. Este Indicador ARDAN é outorgado polo servizo de información empresarial desenvolvido polo Consorcio da Zona Franca de Vigo e que se publica anualmente.

A entidade emisora salienta que a CRTVG se atopa entre o “4 % das máis de 35.000 empresas analizadas en Galicia que consegue superar os exixentes parámetros para obter estes recoñecementos”(...) “É un orgullo para nós contar na nosa terra con empresas como  a súa que, en circunstancias como as actuais, onde os retos globais e a incerteza engaden unha enorme complexidade á xestión empresarial, son capaces de obter estes resultados tan sobresaíntes”, destaca o texto.
        
A CRTVG, comprometida coa Igualdade
    
O indicador Empresa Igual en Xénero recoñece as empresas “que presentan altos valores de igualdade desde unha perspectiva de xénero no eido laboral medida en tres dimensións: igualdade de funcións, igualdade de retribucións e igualdade por actuacións”. A CRTVG repite en 2022 a distinción que xa acadara en 2020 e 2019 e 2021 como Empresa Igual en Xénero.

Desde a CRTVG, tanto de forma interna como externa, difúndese o máximo respecto á igualdade entre homes e mulleres, tanto na programación coma nas políticas de recursos humanos. A CRTVG foi a primeira canle pública de España en contar cunhas Recomendacións para o Tratamento da Violencia Machista, emanadas do seu Consello de Administración.

A CRTVG leva a cabo accións ao longo de todo o ano, e especificamente arredor do Día Internacional para a eliminación da Violencia de Xénero e do 8 de marzo, Día Internacional da Muller. Tamén as campañas de Responsabilidade Social Corporativa da CRTVG, as #AcciónsG, teñen a igualdade de xénero como un eixe transversal. A última, neste pasado mes de abril, levou por título #FaiClic. Foi unha campaña arredor do Día Internacional das Nenas nas TIC, coa que a CRTVG levou a cabo unha #AcciónG en colaboración coa entidade Executivas de Galicia para dar a coñecer as mulleres sobresaíntes das TIC en Galicia e que así poidan servir de exemplo para as cativas. A campaña pode verse aquí.

ler máis

TVG lidera cun 16,3%, a cota máis alta desde 2020

04/11/2022

O ‘Telexornal Mediodía’ acadou este xoves o 24 % e o informativo de proximidade ‘Galicia Noticias’ chega ao 29 % de cota de pantalla

‘Land Rober Tunai Show’ rexistrou unha cota do 21,8 %, sendo o programa de maior audiencia da TVG en toda a xornada

A Galega acada a cota máis alta do día dos últimos 28 meses

TVG lidera cun 16,3%, a cota máis alta desde 2020

Santiago, 04.11.2022.-     Televisión de Galicia foi a canle líder de audiencia en Galicia este xoves, nunha xornada en que tanto os informativos como o entretemento do prime time lograron o respaldo masivo da audiencia en Galicia.

A franxa informativa do mediodía, entre as 13:30 e as 15:30 horas, co ‘Galicia Noticias’ seguido do ‘Telexornal Mediodía’, foi amplamente a máis seguida polo público e obtivo unha cota de pantalla do 24,6 %, superando o competidor máis próximo en 7,3 puntos. Dentro desa franxa están os informativos ‘Galicia Noticias’, que acadou un 29 % de cota, con picos do 31 %, e o ‘Telexornal Mediodía’ que alcanzou un 24,2 %, con 160.000 galegos diante dos seus receptores.

A proposta do prime time con ‘Land Rober Tunai Show’ logrou unha cota do 21,8 %, sendo o programa de maior audiencia da TVG en toda a xornada. Durante a súa emisión, a Televisión de Galicia acadou 6,7 puntos máis que Antena 3 (cunha cota do 15 %).

Despois de pechar o mellor mes de outubro desde 2013, cun 10,7 % de cota de pantalla, mes no que foi a canle pública máis vista de Galicia, a Galega acumula tres meses seguidos á alza en canto a audiencias, destacando tamén como un dos motores do grupo de FORTA. Na xornada de onte a TVG bateu o récord de audiencia nun día dos últimos 28 meses,  o anterior rexistro, de 16,3 %, data de xullo de 2020.

ler máis

A CRTVG consolidará o 100 % do seu cadro de persoal

02/11/2022

Alfonso Sánchez Izquierdo, director xeral da CRTVG, presentou esta tarde no Parlamento o orzamento para 2023, que será de 126 millóns de euros. Afrontarase o maior proceso de consolidación de emprego da historia da Corporación con 270 prazas

 

A CRTVG consolidará o 100 % do seu cadro de persoal

Santiago, 02.11.2022.- O director xeral da CRTVG, Alfonso Sánchez Izquierdo, compareceu esta tarde no Parlamento de Galicia para presentar o orzamento da Corporación correspondente a 2023, orzamento por importe de 126 millóns de euros.

ler máis

A TVG e G2 pechan o mellor mes de outubro desde 2013

01/11/2022

A audiencia da Galega sobe case un punto respecto do mes pasado, situándose no 10,7 %. Os informativos da TVG acadan a cota máis alta e chegan a máis de un millón e medio de galegos maiores de 4 anos.

 

 

A TVG e G2 pechan o mellor mes de outubro desde 2013

Santiago, 01.11.2022.-       A audiencia da TVG segue a medrar neste final de ano acadando marcas históricas. Este mes de outubro foi o mellor desde o 2013 cun 10,7 % de cota de pantalla no conxunto do día. O informe mensual do medidor independente Kantar Media sinala a traxectoria ascendente da audiencia da canle galega por terceiro mes consecutivo e que supera a do mes de setembro en case un punto.

ler máis