CRTVG

Buscar

CRTVG Viva

Novas CRTVG

Os derbis galegos de fútbol sala feminino Burela-Ourense Envialia e Viaxes Amarelle-Poio Pescamar, esta fin de semana, na G2 e na web da CRTVG

30/09/2022

Os medios públicos tamén estarán pendentes da sexta xornada da Primeira RFEF de fútbol, cos partidos Badaxoz-Rácing de Ferrol e Deportivo-San Fernando

Os derbis galegos de fútbol sala feminino Burela-Ourense Envialia e Viaxes Amarelle-Poio Pescamar, esta fin de semana, na G2 e na web da CRTVG

Santiago, 30.09.2022.-    O fútbol sala feminino será protagonista da oferta deportiva dos medios públicos galegos para esta fin de semana. A primeira cita será o sábado ás 17.30 h, cando se disputa o derbi galego en Vista Alegre entre o C. D. Burela F. S. e o Ourense C. F. Envialia, partido da Primeira RFEF. As guerreiras laranxas non coñecen a derrota e quererán vingarse da eliminación da Copa da Xunta. Mentres, as ourensás acaban de conseguir o seu primeiro triunfo.

Os espectadores da G2 poderán ver outro partido da 1º RFEF feminina de fútbol sala o domingo ás 12.00 h: Viaxes Amaralle F. S.-Poio Pescamar F. S., novo derbi galego co que se pechará a xornada na Coruña. O equipo local intentará tumbar un dos grandes conseguindo a súa segunda vitoria da temporada. Pola súa parte, as pontevedresas, que veñen de gañarlle comodamente ao Móstoles, buscarán o triunfo para non perder o tren dos postos altos.

O outro gran foco de atención será a sexta xornada da Primeira División RFEF de fútbol, cuxas retransmisións se repartirán tamén entre o sábado e o domingo. O primeiro día de outubro será a quenda do C. D. Badaxoz-Rácing de Ferrol, que se xoga a partir das 20.00 h. Que o conxunto ferrolán recupere a súa mellor versión é o camiño máis rápido para retomar a senda da vitoria no Nuevo Vivero, onde buscará desquitarse do empate do sábado pasado en Alxeciras, para seguir sumando así o maior número de puntos.

E o domingo, ás 19.00 h, a segunda canle da Galega e a web da CRTVG retransmitirán o partido R. C. Deportivo-San Fernando C. D. Tras recuperar a primeira xornada o mércores pasado e gañarlle ao Talavera, o Dépor recibe un rival que arrancou a era Salva Ballesta cun empate na casa contra o Sanse. O equipo andaluz é 13º, a seis puntos do conxunto coruñés, que ocupa a 4ª praza da clasificación, con catro puntos menos que o líder, o Córdoba.

Ademais, este domingo regresa o programa ‘A Liga das Cidades’, que desde as 17.00 h contará co seu habitual carrusel e establecerá conexións cos encontros de Segunda Federación Bergantiños C. F.-R. Valladolid Promesas e Coruxo F. C.-C. D. Laredo.

ler máis

Sesión continua de fútbol, o domingo pola tarde na Radio Galega, cos partidos Celta-Betis, Eivissa-Lugo e Deportivo-San Fernando

29/09/2022

Pola mañá, o ‘Galicia en Goles’ retransmitirá a segunda xornada da Liga ACB, mentres que o sábado a atención estará posta na Primeira e a Segunda RFEF

Sesión continua de fútbol, o domingo pola tarde na Radio Galega, cos partidos Celta-Betis, Eivissa-Lugo e Deportivo-San Fernando

Santiago, 29.09.2022.-   As retransmisións deportivas continúan desde este venres na programación da Radio Galega. A partir das 20.30 h, Paco Santos presenta a primeira edición da fin de semana de ‘Galicia en Goles’, con atención especial ao baloncesto. Na Coruña dispútase o trofeo Teresa Herrera entre o Básquet Coruña e o Burgos, mentres en Ourense o equipo local preséntase ante a súa afección diante do Valladolid.

O sábado, a partir das 15.00 h, a atención estará posta no fútbol da RFEF. A Primeira presenta o Badaxoz-Rácing de Ferrol, no Vivero, e o Mérida-Pontevedra, no estadio Romano. Mentres, na Segunda, o Ourense C. F. visita o Oviedo Vetusta e na Terceira hai dúas citas: o Estradense-Fabril e o Bouzas-Barco.
    
A partir das 23.00 h, o programa abrirá unha ventá ao motor na sección ‘#GaliciaEnXogo’ co resumo do rally Rías Baixas e tamén atenderá a información sobre os deportistas galegos que preparan os Xogos Olímpicos de París 2024.

O domingo, a edición matinal principia ás 11.45 h e prolongarase ata as 14.30 h coa retransmisión da segunda xornada da Liga ACB de baloncesto. O Breogán de Lugo recibe no Pazo o Fuenlabrada, mentres o Obradoiro visita a pista do Real Madrid. O Linense-Celta B, xunto aos encontros da Segunda e Terceira RFEF, completan a primeira función.

A partir das 15.00 h, a sesión da tarde comezará en Balaídos co Celta-Betis, continuará en Riazor co Deportivo-San Fernando e rematará en Can Misses co Eivissa-Lugo. Sesión continua de fútbol ata as 23.00 h, hora en que pasarán consulta, ata as 01.00 h, os especialistas de ‘Ao Contraataque’ no último treito.

A emisión do ‘Galicia en Goles’ chega á audiencia a través da FM, TDT, radiogalega.gal e tamén se pode ver na canle de Youtube da Radio Galega e no Mira RG pola aplicación para o móbil e a páxina web. Ademais, a retransmisión do Celta-Betis poderase seguir nas canles de audios do operador televisivo, Movistar.

Ademais das retransmisións, a Radio Galega reserva os sábados ás 13.00 h unha hora de emisión deportiva dentro do proxecto ‘#GaliciaEnXogo’. O premiado ‘Convivir Deportivo’ visita esta semana Portomarín para presentar a iniciativa do equipo de fútbol da vila.

ler máis

A CRTVG retransmite, en directo de xoves a sábado, o IV Foro La Toja, centrado nas consecuencias da guerra en Ucraína

28/09/2022

A G2 e a web emitirán integramente a totalidade dos relatorios e os informativos da TVG e a Radio Galega conectarán co evento e ofrecerán entrevistas coas personalidades máis destacadas

O ‘Telexornal Serán’ deste xoves realizarase desde a illa da Toxa, con motivo da xornada inaugural, en que intervirá o rei Filipe VI

A CRTVG retransmite, en directo de xoves a sábado, o IV Foro La Toja, centrado nas consecuencias da guerra en Ucraína

Santiago, 28.09.2022.-    O IV Foro La Toja-Vínculo Atlántico, que se desenvolverá na illa da Toxa do 29 de setembro ao 1 de outubro, poderase seguir en directo e de xeito íntegro pola TVG. Os medios públicos galegos poñen novamente o foco informativo neste espazo para a reflexión e o debate que xa se converteu nunha cita ineludible para a análise dos retos sociais e económicos actuais.

A totalidade dos relatorios retransmitirase pola G2 e a web g24.gal. A cobertura da canle pública comezará o xoves ás 16.30 h cun adianto informativo pola primeira canle que transmitirá a chegada do rei Filipe VI, quen inaugurará o evento. No marco desta sesión inaugural, farase entrega do II Premio Foro La Toja, que se lle outorga ao pobo ucraíno. Ademais, este xoves o ‘Telexornal Serán’ emitirase desde a illa da Toxa, presentado por Marcos Sueiro. E a primeira canle realizará durante os seguintes días unha cobertura con conexións en directo, noticias e entrevistas nos distintos espazos informativos, ao igual que a Radio Galega.

A programación terá como condutor principal o xornalista Jesús Fontenla, co apoio dos analistas María Bastida e Xosé Antonio Vázquez Taín desde un set instalado na sede do foro, en que serán entrevistados participantes como, entre outros, o presidente do Foro, Josep Piqué; o presidente do Real Instituto Elcano, José Juan Ruíz; o presidente do Consello Económico e Social, Antón Costas, e o secretario xeral iberoamericano, Andrés Allamand.

A cobertura do venres día 30 iniciarase ás 09.30 h e incluirá, entre outras intervencións, unha conferencia do presidente do Partido Popular, Alberto Núñez Feijóo (10.30 h); unha conversa entre os expresidentes do Goberno Felipe González e Mariano Rajoy (13.00 h), e a mesa ‘Ciberseguridade: da necesidade á urxencia’ (16.30 h), coas intervencións da exvicepresidenta do Goberno Soraya Sáenz de Santamaría, da secretaria de Estado de Dixitalización, Carmen Artigas, e do presidente de Mapfre, Antonio Huertas. Os espectadores tamén poderán seguir o debate entre os presidentes autonómicos Alfonso Rueda, Juanma Moreno, María Chivite e Ximo Puig (19.00 h), centrado no reto demográfico e na cohesión territorial.

Na xornada do sábado, 1 de outubro, desde ás 09.00 h, cómpre salientar a mesa ‘O renacer do vínculo atlántico’ (10.30 h), coa participación do vicepresidente da Comisión Europea, Josep Borrell. Á clausura, ás 12.15 h, asistirá o presidente do Goberno, Pedro Sánchez.

Esta cuarta edición do foro centrarase en analizar a realidade xeopolítica actual, tras o inicio da guerra de Ucraína e as súas consecuencias en ámbitos como a seguridade enerxética ou a evolución da globalización. Tamén se falará da situación económica mundial cos índices de inflación disparados.

ler máis

Escolares de Lugo, Ourense e A Estrada recibiron os premios do certame de curtas en galego 'Nós tamén creamos!'

28/09/2022

As 25 pezas participantes, elaboradas en stop-motion por profesorado e alumnado de Infantil e Educación Primaria, emitiranse na G2 e poden verse na web crtvg.gal

Os proxectos gañadores recolleron os seus premios este mércores en Santiago: ‘Sopa verde’, do CEIP Albeiros, Lugo; ‘O camiño’, do CEE Miño de Ourense; e ‘Un conto cheo de lobos’, do CEIP Manuel Villar Paramá da Estrada

 

Escolares de Lugo, Ourense e A Estrada recibiron os premios do certame de curtas en galego 'Nós tamén creamos!'

Santiago, 28.09.2022.-    Os tres centros gañadores da X edición do certame de curtas en galego 'Nós tamén creamos!' recolleron os seus premios este mércores nun acto celebrado en Santiago. Son os proxectos ‘Sopa verde’, presentado por alumnos de Educación Infantil do CEIP Albeiros de Lugo; ‘O camiño’, vídeo realizado por alumnado de 1º e 2º de Primaria do CEE Miño de Ourense, e ‘Un conto cheo de lobos’, peza creada por alumnos de 3º e 4º de Primaria do CEIP Manuel Villar Paramá da Estrada.

O secretario xeral de Política Lingüística, Valentín García, e a directora xeral de Ordenación e Innovación Educativa, Judith Fernández, participaron na entrega de galardóns ás escolas premiadas nesta edición dos premios a curtas de animación en galego elaboradas no marco do programa de dinamización lingüística Nós tamén creamos! da Secretaría Xeral de Política Lingüística e da Dirección Xeral de Ordenación e Innovación Educativa, en colaboración coa Corporación Radio e Televisión de Galicia e OQO editora. No acto tamén interviñeron Marta Fernández, xefa de Comunicación Corporativa e RSC da CRTVG, e Borja Guerrero, responsable da área audiovisual de OQO Editora.

ler máis

Intenso outono para 'Diario cultural', con programas especiais desde os festivais de cine de Ourense e Santiago e o de teatro de Carballo

26/09/2022

O programa da Radio Galega leva este martes os seus micrófonos ao OUFF e o día 7 de outubro estará no FIOT, unha das citas máis importantes das artes escénicas

'Diario cultural zeta', a versión deste espazo para a xente nova, achegarase o 5 de outubro ao certame compostelán Curtocircuíto

Intenso outono para 'Diario cultural', con programas especiais desde os festivais de cine de Ourense e Santiago e o de teatro de Carballo

Santiago, 26.09.2022.-    O espazo da Radio Galega 'Diario cultural' afronta durante os vindeiros días unha intensa axenda en exteriores, co obxectivo de dar conta da ampla oferta cultural do outono en toda Galicia e con especial atención aos eventos de cine e teatro.

Así, o programa ofrecerase este martes desde o OUFF, a XXVII edición do Festival Internacional de Cine de Ourense. Desde a cidade das Burgas, 'Diario cultural', que se emitirá de 17:00 a 18:00 h, presentado por Belén Regueira e Vituco Neira, contará coa presenza de distintos convidados para dar conta de toda a actualidade do certame e do seu programa de proxeccións e actividades. Así, o programa falará, entre outros, con Pepe Coira sobre a  reconstrución que está facendo de 'Canto de emigración' (1934), o desaparecido filme de Antonio Román, e coa  actriz do filme 'O corpo aberto' Elena Seijo.

Xa a semana que vén, o martes 5 de outubro, os micrófonos da Radio Galega trasladaranse a Santiago para estaren presentes na 19ª edición do Festival Curtocircuíto. Desde alí realizarase unha nova edición de 'Diario cultural zeta', a versión do programa dirixida á xuventude, presentada por Lucía Junquera, que se emitirá na fin de semana e que se lanzará tamén en RadioGalegaPodcast.gal.

E o 7 de outubro, o 'Diario cultural' acudirá á 31ª edición do FIOT, o Festival Internacional Outono de Teatro de Carballo, que ofrece un programa comprometido coas artes escénicas e cos proxectos de máis prestixio do teatro actual. Baixo a batuta de Belén Regueira e Vituco Neira, este programa especial ofrecerase de 17:00 a 18:00 h e contará coa presenza dos membros de Mofa e Befa, compañía que celebra alí o seu 30º aniversario estreando a obra 'Pirolíticos'.

ler máis

A CRTVG participa en catro novos proxectos cinematográficos, dentro das accións de apoio ao sector audiovisual galego

26/09/2022

Dúas son coproducións con Portugal: ‘Ariel’, longametraxe de cinema de autor, dirixida por Lois Patiño e Mathias Piñeiro; e o documental ‘A procura da estrela’, dirixido por Carlos Martínez-Peñalver

As outras dúas longametraxes apoiadas pola Corporación son dúas comedias: ‘Un pasado por diante’, dirixida por Olga Ossorio, e ‘Amigos ata a morte’, dirixida por Javier Veiga

A CRTVG participa en catro novos proxectos cinematográficos, dentro das accións de apoio ao sector audiovisual galego

Santiago, 26.09.2022.-    A CRTVG acordou este luns a súa participación en catro novos  proxectos cinematográficos, tres deles longametraxes e un documental. Despois da avaliación realizada pola Comisión Directiva de Avaliación de Proxectos de Apoio á Produción Cinematográfica da CRTVG, que analizou as distintas propostas presentadas, determinouse a participación dos medios públicos nesta selección de proxectos, dentro do coñecido como o cumprimento do 6 %.
    
A selección inclúe dúas coproducións con Portugal: ‘Ariel’, unha longametraxe de cinema de autor con mirada propia, dirixida por Lois Patiño e Mathias Piñeiro, e ‘A procura da estrela’, documental cunha importante carga metafórica dirixido por Carlos Martínez-Peñalver, que foi seleccionado xa en importantes festivais.

Ariel’ é unha aposta experimental para abordar a Shakespeare e a súa obra de teatro ‘A tempestade’ cun guión que mestura de forma máxica metáforas onde a paisaxe e atmosfera dos Azores acaban configurando un personaxe máis que servirá de fío condutor á viaxe da protagonista en busca de Ariel. O proxecto é unha coprodución de Filmika Galaika coa produtora portuguesa Bando Aparte, e conta coa axuda de AGADIC e do ICA portugués.

A procura da estrela’ é un documental, premiado co Mentoring Projects do festival L´alternativa (Barcelona), axudas como a de Talento de Agadic e outros apoios económicos como os dos concellos da Serra da Estrela. O proxecto foi seleccionado como work in progress en diferentes festivais de posprodución e presenta unha importante carga metafórica en que o director ofrece un relato poético que pon o foco no mundo rural que se move entre a tradición pastoral e o futuro turístico.
 
As outras dúas longametraxes apoiadas pola CRTVG son ‘Un pasado por diante’, unha comedia de aventuras, opera prima da directora Olga Ossorio, e ‘Amigos ata a morte’, unha adaptación da obra de teatro de Javier Veiga levada ao cine por el mesmo como director.

Un pasado por diante’, producida por Vaca Films, parte dunha idea orixinal da directora e vertébrase sobre as viaxes no tempo. Orientada ao público familiar, esta comedia conta a historia de Óscar e Teo, de 12 e 10 anos, dous irmáns moi distintos entre si que lidan cada un ao seu xeito coa desaparición da súa nai, unha prometedora científica que morre de accidente mentres investigaba os buratos do verme. A película conta tamén co apoio do ICAA, Amazon Prime e RTVE, e as axudas de Media e AGADIC.

E a cuarta produción, ‘Amigos ata a morte’, é unha historia universal baseada en valores como a amizade, a xenerosidade ou as segundas oportunidades. Trátase tamén dunha comedia que arranca dunha forma desenfadada partindo dun triángulo amoroso. María, Nacho e Suso achéganse á corentena. Os tres viviron moitas cousas xuntos e de repente, na metade da vida, vailles tocar enfrontarse a algo inesperado que poñerá a proba a súa amizade e as súas prioridades na vida. Trátase dunha coprodución internacional con México que conta cos apoios da Deputación de Ourense e do Hub Audiovisual da AGADIC e vai da man de Amazon Prime Video para a súa estrea nesta plataforma.

Favorecer o sostemento dun sector audiovisual galego que busque tamén a mellora da sociedade e apoiar na creación neste eido unha identidade propia conforman algúns dos criterios que se seguen neste proceso de selección de proxectos.

ler máis

O espazo de fomento do galego #DígochoEu chega aos 1.000 programas

26/09/2022

Presentado por Esther Estévez, emite desde xaneiro de 2020 un capítulo diario desde a televisión e as redes sociais da CRTVG e consolidouse xa como o maior impulsor da lingua galega entre a mocidade

O proxecto dos medios públicos ten en marcha a segunda edición dos Premios #DígochoEu, cuxo prazo de inscrición está aberto para os centros de Primaria e Secundaria ata o 28 de outubro

O espazo de fomento do galego #DígochoEu chega aos 1.000 programas

Santiago, 26.09.2022.-    #DígochoEu está de noraboa. O popular espazo de fomento do uso do galego da CRTVG, presentado por Esther Estévez, chega esta luns ás 1.000 entregas, consolidado xa como o maior impulsor da lingua galega entre a mocidade de Galicia.

O seu seguimento entre os máis novos propiciou iniciativas como os Premios #DígochoEu, cuxa segunda edición se puxo en marcha estes días. Ao igual que o ano pasado, estes galardóns están abertos ata o 28 de outubro aos ciclos de educación Primaria e Secundaria de todos os centros escolares de Galicia, así como a calquera de fóra de Galicia que imparta lingua galega. Este concurso escolar xa acadou un grande éxito durante o curso pasado, en que participaron 200 centros das catro provincias, rematando na gran festa de entrega de premios na Cidade da Cultura de Santiago no mes de xuño.

#DígochoEu é o proxecto da CRTVG para achegar o galego dunha forma dinámica e entretida a todo o mundo e, sobre todo, aos máis novos. Emite, desde xaneiro de 2020, un capítulo diario para a mellora do galego desde a televisión e as redes sociais da canle pública. Pode seguirse na web crtvg.gal, en g24.gal, no Telexornal da TVG, así como nas contas de Instagram (@digochoeu.tvg), Twitter (@DigochoEuTVG), Facebook (facebook.com/digochoeu.tvg), Youtube (youtube.com/tvg) e TikTok (tiktok.com/@digochoeu), onde xa ten máis preto de 200.000 seguidores. E pode seguirse no streaming semanal en Twitch na noite dos mércores, xunto co actor portugués Rodrigo Paganelli.

Recoñecementos ao #DígochoEu

Neste 2022, #DígochoEu acadou o premio Mestre Mateo ao mellor programa de televisión e Esther Estévez, a súa presentadora, foi recoñecida como mellor comunicadora de televisión. O espazo xa gañara antes o Premio Deleite á Promoción da Lingua no marco do mesmo certame. E ao longo do pasado 2021, #DígochoEu recibiu o Premio Paraugas de Comunicación e Marketing, na categoría de Mellor Execución de Idea; o Premio Mil Primaveras da Coordinadora de Traballadores/as de Normalización da Lingua, na categoría de Mellor Comunicación e Impacto, e o Premio da Cultura Galega, galardón co que a Xunta de Galicia recoñece a excelencia creativa, a capacidade de intercambio, a experimentación e a proxección da construción cultural de Galicia.

ler máis

A película 'O home e o can', participada pola TVG, inaugura o Festival Internacional de Cine de Ourense

23/09/2022

Ademais, o espazo da Radio Galega ‘Diario Cultural’ emitirase o martes 27 desde o OUFF para dar conta de todo o seu programa

Os programas culturais da TVG e a Radio Galega fan seguimento especial da XXVII edición do certame, que se celebra ata o 1 de outubro

No marco do OUFF serán tamén estreadas a película ‘O corpo aberto’ e o primeiro capítulo da serie ‘Motel Walkirias’, producidas co apoio da CRTVG

A película 'O home e o can', participada pola TVG, inaugura o Festival Internacional de Cine de Ourense

Santiago, 23.09.2022.-    A película ‘O home e o can’, dirixida por Ángel de la Cruz e participada pola Televisión de Galicia, estrearase este venres na xornada inaugural da XXVII edición do Festival Internacional de Cine de Ourense (OUFF). O director de Proxección Social da CRTVG, Xaime Arias, asistirá ao acto de inauguración do festival, que se desenvolverá ata o 1 de outubro. Ademais, o espazo da Radio Galega ‘Diario Cultural’ emitirase o martes 27 desde o OUFF, para dar conta de toda a actualidade do seu programa de proxeccións e actividades.

ler máis

A TVG estrea 'Atmosféricos', espazo diario presentado por Sevi Martínez con todas as claves da información arredor do clima

19/09/2022

Coas achegas de divulgadores de referencia, ofrecerá contidos relacionados co medio natural, o cambio climático e as súas consecuencias e asuntos relativos aos sectores primarios directamente dependentes do tempo

A TVG estrea 'Atmosféricos', espazo diario presentado por Sevi Martínez con todas as claves da información arredor do clima

Santiago, 19.09.2022.-    A transcendencia social dos contidos relacionados coa meteoroloxía e co medio natural é cada vez maior. En coherencia co interese crecente sobre un asunto capital na vida dos cidadáns, a Televisión de Galicia amplía esta temporada os espazos dedicados á información do tempo e estrea hoxe o programa ‘Atmosféricos’.

Este novo espazo divulgativo, que se ofrecerá de luns a venres ás 13.30 h, será  presentado por Sevi Martínez e ofrecerá 15 minutos diarios de contidos relacionados co medio natural, o cambio climático e as súas consecuencias e asuntos relativos aos sectores primarios directamente dependentes do tempo. Para isto, contará coas achegas diarias de expertos divulgadores de referencia para explicar as claves meteorolóxicas de cada momento.

‘Atmosféricos’ emitirase pola primeira canle e tamén polo portal web e as redes sociais de ‘O Tempo’: Instagram, Twitter e Facebook. Ao igual que os espazos de ‘O Tempo’, o programa estará dotado de novas narrativas audiovisuais apoiadas na tecnoloxía para ofrecer un relato máis dinámico e gráfico.

ler máis

En marcha a segunda edición dos Premios #DígochoEu da TVG

19/09/2022

Está aberto o prazo de inscrición na web digochoeu.gal, ata o vindeiro 28 de outubro, para os centros de Primaria e Secundaria

#DígochoEu está a piques de chegar aos 200.000 seguidores en TikTok

Volve #ApuntamentoLusófono, a conversa semanal en directo en Twitch entre Esther Estévez e Rodrigo Paganelli (mércores, 22:00 h)

Os dous presentarán todas as novidades da nova temporada no ‘Land Rober Tunai Show’&

En marcha a segunda edición dos Premios #DígochoEu da TVG

Santiago, 19.09.2022.-    Tras o éxito da primeira, a CRTVG pon en marcha a segunda edición dos Premios #DígochoEu. Ao igual que o ano pasado, os premios están abertos aos ciclos de educación Primaria e Secundaria de todos os centros escolares de Galicia, así como a calquera de fóra de Galicia que imparta lingua galega.

“Fala cos colegas, argalla unha idea de guión e que os vosos profesores nos envíen a proposta”, di Esther Estévez, presentadora do espazo nas plataformas da CRTVG, a todos os rapaces interesados no proxecto. “A primeira fase é o envío deste guión. E logo, entre todos os recibidos, elixiranse 14 para ser gravados nunha xornada na que nos desprazamos a cada colexio”, explica. Os docentes poden consultar as bases e facer as inscricións na web digochoeu.gal ata o vindeiro 28 de outubro. Na primeira edición destes galardóns, que persegue promover o uso do galego entre a mocidade, participaron 200 centros das catro provincias.

Este concurso escolar xa acadou un grande éxito durante o curso pasado coas visitas aos colexios, rematando na gran festa de entrega de premios na Cidade da Cultura de Santiago no mes de xuño.

#DígochoEu segue crecendo nas redes sociais

#DígochoEu é o proxecto da CRTVG para achegar o galego dunha forma dinámica e entretida a todo o mundo e, sobre todo, aos máis novos. Emite, desde xaneiro de 2020, un capítulo diario para a mellora do galego desde a televisión e as redes sociais da canle pública. Pode seguirse na web crtvg.gal, en g24.gal, no Telexornal da TVG, así como nas contas de Instagram (@digochoeu.tvg), Twitter (@DigochoEuTVG), Facebook (facebook.com/digochoeu.tvg), Youtube (youtube.com/tvg) e TikTok (tiktok.com/@digochoeu), onde xa ten máis preto de 200.000 seguidores. E pode seguirse no streaming semanal en Twitch na noite dos mércores, xunto co actor luso Rodrigo Paganelli.  

Nova temporada de #ApuntamentoLusófono

Despois do verán, os seguidores do #DígochoEu poden xa gozar outra vez de novas entregas de #ApuntamentoLusófono, a conversa semanal en directo que manteñen en Twitch Esther Estévez e o actor portugués Rodrigo Paganelli, en que ela trata de aprender portugués e el, galego.

Para presentar os Premios #DígochoEu e as novidades do #ApuntamentoLusófono, Esther e Rodrigo acudirán este xoves ao ‘Land Rober Tunai Show’, onde falarán da primeira canción do espazo ‘Falsos amigos’, que xa acumula máis de 40.000 reproducións nas redes sociais e que xoga con termos en galego e portugués que levan a confusión (falsos amigos).

ler máis