Santiago, 01.06.2023.-    O mes xuño comeza con emocións fortes na programación deportiva da Radio Galega. O venres, desde as 20.30 h, a primeira edición do ‘Galicia en Goles’ contará os terceiros partidos das eliminatorias de baloncesto e hóckey a patíns. O Básquet Coruña xoga en San Sebastián ante o Guipúscoa coa necesidade de gañar para forzar o cuarto encontro, que se disputaría o domingo na cancha vasca, nos cuartos de final polo ascenso á Liga ACB. Mentres, o Liceo visita o Calafell coa vantaxe de dous triunfos e coa opción de clasificarse para a final de Liga se consegue o terceiro, desta volta na cancha catalá.

O sábado, a partir das 15.00 h, a atención estará posta en Balaídos, onde o Celta B inicia o camiño de ascenso á Segunda División Profesional ante o Eldense. Mentres, o Rácing de Ferrol disputa en Amorebieta a ida da final de campións da Primeira RFEF. Ademais, o Vilalbés visita o La Calzada rioxano, no desenlace do ascenso á Segunda RFEF. O fútbol feminino terá cobertura co Granada-Deportivo, na ida da final de ascenso á Primeira División Profesional. As ligas de balonmán en Cangas e de fútbol sala en Burela, Poio e Padrón completarán a oferta de retransmisións do día.

O proxecto #GaliciaEnXogo terá presenza con varias entregas durante o día. Ás 13.00 h, Alfonso Pardo difundirá o Club Hípico de Baralla. A partir das 15.15 h, os xogos electrónicos chegarán ao público máis novo. E na última hora haberá tempo para a actualidade do motor e a información olímpica.

O domingo, a edición matinal comezará ás 12.00 h co seguimento do fútbol base en Vilagarcía de Arousa. Desde as 15.00 h, o ‘Galicia en Goles’ despregará as mellores coberturas para os partidos decisivos da temporada. Primeiro en Riazor, co partido de ida da semifinal de ascenso á Segunda División Profesional entre o Deportivo e o Castellón. Logo chegará en Balaídos o definitivo Celta-Barcelona, no peche da Primeira División. O equipo vigués continúa dependendo de si mesmo, pero de non derrotar o xa campión terá que estar pendente dos resultados noutros campos, especialmente do que faga o Valladolid no José Zorrilla ante o Xetafe. A partir das 23.00 h, os oíntes poderán escoitar os adestradores na sala de prensa e os especialistas de ‘Ao Contraataque’, que debaterán sobre o sucedido nos estadios galegos.

Santiago, 01.06.2023.-    O director de Proxección Social da CRTVG, Xaime Arias, recolleu esta noite o Premio CIRCOM 2023 outorgado á serie da Televisión de Galicia ‘Motel Valkirias’, recoñecida no apartado de entretemento e ficción. Esta coprodución da TVG e a RTP acada así o décimo premio internacional para a canle pública galega, todos eles logrados desde 2012. Arias estivo acompañado por Ghaleb Jaber Martínez, director da produtora CTV.

Santiago, 01.06.2023.-    A 39ª Conferencia Anual de CIRCOM, a asociación das televisións rexionais públicas europeas, acolle este xoves e venres en San Sebastián os casos de estudo máis destacados elixidos entre case 250 canles de toda Europa. Neste marco a CRTVG foi convidada a presentar o seu novo estudio multimedia, en que converxen radio, televisión e canles dixitais con calidade broadcast en todas as canles.

No seu relatorio dentro do panel ‘Innovación e tendencias’, Carlos García Verdugo, coordinador de operacións da Corporación, explicou no auditorio do Kursaal, ateigado de profesionais de medios de toda Europa, a funcionalidade e versatilidade deste estudio, e expuxo exemplos de formatos e producións en que se combinan os recursos dos estudios da Radio Galega cos medios da Televisión de Galicia e as canles dixitais. Con máis de 100 horas de contido semanal para as distintas canles da CRTVG, este estudio multimedia da emisora consolidouse no último ano como un dos principais activos de produción da Corporación.

Representantes de medios de toda Europa analizan esta semana en San Sebastián os retos do audiovisual baixo o lema ‘We Talk, We Listen, We Share’ e abordan temas clave como a transformación dixital e o achegamento ao público máis novo. CIRCOM Regional reúne preto de 250 canles de televisión públicas rexionais de 30 países europeos. Este ano elixiu España para a súa conferencia anual e a gala dos Premios CIRCOM, que serán entregados esta noite en San Sebastián nunha gala en que será premiada a serie da TVG ‘Motel Valkirias’.

Santiago, 01.06.2023.-    Cun 11,3% de cota media, o dato máis alto neste 2023, e un 11,5% de media no prime time, a Galega pecha un mes de maio marcado polo liderado informativo, segundo o informe do medidor independente Kantar Media coñecido este xoves.

Con este resultado a TVG acada o seu mellor mes de maio desde 2011 e é a canle autonómica que máis medra.

Amplo liderado informativo: crecen os sete días da semana

Santiago, 29.05.2023.-    A Televisión de Galicia foi este domingo electoral a canle con maior cota de pantalla de toda España, tanto no conxunto da xornada coma no prime time. A Galega, cun 17,2 % de media do día, foi, xa que logo, líder tamén entre as canles autonómicas, seguida pola vasca ETB2 (16 % no conxunto do día). Ao longo da xornada, 1.004.000 galegos formaron parte da audiencia da TVG.

O especial ‘Eleccións 28M’, presentado polos xornalistas Marta Darriba, Carlos Amado e Alberto Mancebo e emitido entre as 19:45 h e a 1:10 da madrugada, foi o programa de maior audiencia da xornada, cunha cota de pantalla do 26 %. Durante a súa emisión acadou un pico de cota superior ao 39 %, (ás 22:08, 39,2%).

O ‘Telexornal Mediodía’ foi o segundo programa de maior audiencia na xornada, cunha cota do 19,3 %, e ‘Galicia Noticias’, o terceiro, cunha cota do 21 %.

A proposta dos medios públicos para esta xornada electoral, cun amplo despregadura no territorio e programación especial na tarde e noite, acadou unha vez máis o respaldo da cidadanía galega, que elixe a CRTVG como o seu referente entre os servizos públicos de comunicación de Galicia.

Santiago, 23.05.2023.-    A CRTVG comeza a procura da canción do verán, do tema que será a súa banda sonora durante os vindeiros meses. Un ano máis, os medios públicos abren a convocatoria do certame ‘Este verán canta con nós’, que ten como obxectivo apoiar a música en galego e descubrir novos talentos, e que premiará con 1.000 euros un tema inédito e orixinal escrito e cantado en lingua galega.

Os intérpretes e grupos interesados en participar na sétima edición do concurso teñen ata o 16 de xuño para enviar as súas propostas, que non deberán exceder dos tres minutos de duración e que poderán ir acompañadas dun vídeo musical. As cancións deberán enviarse en formato mp3 a canciondoveran2023@crtvg.gal, nun correo onde consten os datos das persoas participantes (nome, apelidos, DNI, teléfono e enderezo completo, tanto do intérprete como do compositor e/ou letrista), e remitilas en formato mp4, no caso de presentar un videoclip.

Unha vez rematado o prazo de entrega, levarase a cabo o proceso de selección do tema gañador do concurso, que será escollido por un xurado composto por cinco persoas designadas pola dirección da CRTVG, que valorará a orixinalidade, a calidade técnica e o acompañamento dun vídeo musical. No veredicto, que se coñecerá o 20 de xuño, incluirase tamén unha lista puntuada ata o quinto posto.

Todos os participantes no concurso cédenlle á CRTVG o dereito de reprodución e de comunicación pública por televisión en todos os sistemas, así como a través de Internet, da canción e do seu vídeo, de ser o caso. As bases do certame poden consultarse aquí.

A apegadiza electrocumbia ‘Corazón de toxo’, de Rotce, Adri Coyote e La Quinkillada foi a canción do verán da pasada edición e resultou gañadora tras convencer o xurado pola súa ledicia, por ser moi ‘verbeneira’ e moi galega e por contar con todos os elementos para triunfar.

Santiago, 19.05.2023.- A Xunta Electoral Central deu traslado na mañá do venres do seu acordo  sobre o último recurso que quedaba por resolver ante o Plan de Cobertura Electoral da CRTVG para as eleccións do 28 de maio.

Santiago de Compostela, 16.05.2023.-  Os  II Premios DígochoEu da CRTVG xa teñen gañadores. Na tarde deste martes, nunha gran gala celebrada na Cidade da Cultura, anunciáronse os centros escolares premiados na edición deste curso escolar 2022-2023. A gala será emitida este mércores pola mañá na TVG, ás 12:00 horas.

Santiago, 16.05.2023.-    Escoitamos Teatro é o certame de obras dramáticas en galego para radio e podcast en que colaboran a Fundación SGAE e a Radio Galega, e co que se fomenta a creación teatral en galego a través do impulso aos seus autores, e a produción e difusión das súas obras. Na véspera do Día das Letras Galegas, a Fundación SGAE anunciou este martes os textos gañadores do premio ‘Escoitamos Teatro 2023’.

Entre os orixinais presentados, todos eles inéditos, os gañadores son estes tres relatos: ‘Encerrado’, de José Luis Baños de Cos; ‘Interior dun coche fúnebre’, de Eva María Gontad; e ‘Última chamada’, de Francisco Peleteiro. O concurso está dotado con 3.000 euros en premios achegados pola Fundación SGAE e a Radio Galega. Así, cada un dos tres gañadores desde certame recibirá un premio de 1.000 euros. As obras resultantes, en formato de radioteatro/podcast, serán divulgadas nas plataformas dixitais da Fundación SGAE e a Radio Galega vainas programar este outono en horario de ampla audiencia e tamén as difundirá nas súas plataformas dixitais, en RadioGalegaPodcast.gal.

En xuño comezará no estudio da Fundación SGAE en Santiago de Compostela a dramatización, gravación e produción das obras por un equipo profesional.

As obras seleccionadas:

Santiago, 13.05.2023.-     A Corporación Radio e Televisión de Galicia fará un intenso despregamento para ofrecerlle á cidadanía toda a información das diferentes opcións políticas que concorren ás eleccións municipais do 28 de maio en Galicia. Á marxe dos espazos electorais nos diferentes informativos, a CRTVG emitirá sete debates, un por cada unha das grandes cidades de Galicia, desde este luns 15 de maio, ás 10:00 horas.