CRTVG

Buscar

CRTVG Viva

Novas TVG

'Galicia bonita' afronta hoxe a recuperación de dúas construcións comunitarias en Manzaneda

22/05/2022

Os veciños da parroquia de Rozavales solicitarán a axuda do programa para restaurar un antigo forno e un lavadoiro en moi mal estado de conservación

'Galicia bonita' afronta hoxe a recuperación de dúas construcións comunitarias en Manzaneda

Santiago, 22.5.2022.-  No programa ‘Galicia bonita’ (23:15 h) desta noite, a arquitecta Rosa Facal e os seus axudantes dirixiranse cara á parroquia ourensá de Rozavales, no concello de Manzaneda, coa encarga de recuperar dúas construcións comunitarias. A veciñanza solicitará axuda á líder do ‘Galicia bonita’ para restaurar un antigo forno e un lavadoiro en moi mal estado de conservación.

Aínda que a obra deste domingo non semella dun gran volume, o equipo terá que facer fronte a unha baixa de última hora, que dificultará a entrega no prazo acordado máximo dunha semana.


ler máis

Os playoff de ascenso de 2ª RFEF e Terceira División, protagonistas esta fin de semana na oferta deportiva dos medios públicos galegos

20/05/2022

O sábado ofrecerase o partido Ourense C. F.-A. D. Llerenense e, o domingo, o SCR Peña Deportiva-Coruxo F. C.

Ademais, os espectadores poderán ver o derbi da 1ª RFEF entre o Celta B e o Rácing de Ferrol e o encontro da División de Honra Prata de balonmán C. B. Cisne-Barcelona B

Os playoff de ascenso de 2ª RFEF e Terceira División, protagonistas esta fin de semana na oferta deportiva dos medios públicos galegos

Santiago, 20.05.2022.-    As fases finais dos playoff de ascenso nas categorías inferiores do fútbol español serán protagonistas esta fin de semana nas emisións deportivas dos medios públicos galegos.

Pero a primeira cita será co balonmán. O sábado ás 19.00 h xógase, en directo na G2, o partido C. B. Cisne Los Sauces-F. C. Barcelona B, da División de Honra Prata. Trátase do compromiso máis importante da temporada para o equipo pontevedrés, xa que pode significar o seu regreso á máxima categoría nacional. O Cisne precisa que o Pavillón Municipal de Pontevedra sexa un fervedoiro que dificulte o xogo dun rival que non é o máis cómodo para certificar un ascenso á Asobal.

Á mesma hora ofrecerase, en directo a través da web da CRTVG (en diferido, o domingo ás 11.00 h na G2) outro encontro crucial para un equipo galego: o Club Ourense Baloncesto, que se xoga o ascenso á LEB Ouro ante un Básket Navarra que busca o mesmo premio. O conxunto dirixido por Guillermo Arenas chega a este partido de volta do playoff con oito puntos de vantaxe.

O fútbol chegará ás 20.30 h coa retransmisión do R. C. Celta B-Rácing de Ferrol. Case dous meses despois, o Celta B regresa a Balaídos para disputar o seu penúltimo partido de Liga, unha cita decisiva en que defenderán o seu posto de promoción de ascenso contra un dos mellores equipos da Primeira Federación.

Ás 22.15 h será a quenda do fútbol de Terceira División coa final do playoff de ascenso entre o Ourense C. F. e a A. D. Llerenense, a cita máis agardada do ano para o conxunto ourensán, a última eliminatoria da fase de ascenso á 2ª RFEF. Para chegar á final nacional, os pacenses derrotaron na primeira eliminatoria territorial o Xerez e, na final, o Moralo. Pola súa parte, o Ourense C. F. gañoulle ao C. D. Barco na final do playoff rexional, tras impoñerse nas semifinais ao Fabril.

Xa o domingo, a partir das 16.30 h, os espectadores poderán ver o partido da France Ligue, disputado o sábado, entre o PSG F. C. e o Metz F. C., un duelo que dará por rematada a competición francesa.

Finalmente, ás 19.30 h ofrecerase a semifinal polo ascenso a Primeira RFEF que disputarán a SCR Peña Deportiva e o Coruxo F. C. O equipo da localidade eivisenca de Santa Eulalia será o primeiro atranco que o conxunto vigués terá que superar se quere ascender á terceira categoría do fútbol español. A escuadra balear finalizou en terceira posición a fase regular do grupo III, só por detrás do Espanyol B e do Numancia. Pola súa parte, o Coruxo pasou de estar na zona de descenso a finais de decembro a escalar ata o cuarto lugar da clasificación.

ler máis

Na véspera do Día das Letras Galegas, a TVG estrea a película 'Cuñados'

16/05/2022

Esta comedia de enredo, ópera prima do ourensán Toño López e rodada integramente en Ourense, ten como protagonistas a Xosé A. Touriñán, Miguel de Lira e Federico Pérez

Na véspera do Día das Letras Galegas, a TVG estrea a película 'Cuñados'

Santiago, 16.05.2022.-  Na véspera do Día das Letras Galegas, o cinema galego será protagonista no prime time da TVG, que hoxe estrea a película ‘Cuñados’ (23.20 h), a ópera prima do ourensán Toño López, unha comedia de enredo para escachar coa risa, con Xosé A. Touriñán, Miguel de Lira e Federico Pérez como protagonistas.

‘Cuñados’ conta as peripecias delituosas deste trío inigualable de cuñados, unidos polo azar. Os tres, embarcados nun plan disparatado, terán ao seu carón algunhas das profesionais máis recoñecidas e queridas do noso audiovisual, como Mela Casal, María Vázquez, Iolanda Muíños e Eva Fernández, entre outras.

A trama comeza con Eduardo (Miguel de Lira) e o seu cuñado Sabonis (Xosé A. Touriñán) en apuros, xa que precisan moitos cartos tras meter a zoca nun dos seus negocios. Sabonis será quen atope a solución ao problema secuestrando a Modesto (Federico Pérez), cuñado de Alicia Zamora, a empresaria que os enganou e deixou tirados. Só hai un pequeno problema: Alicia non pensa pagar nin un euro polo seu cuñado. Con todo, é o propio Modesto quen pensa un novo plan co que Eduardo e Sabonis poderán salvar a adega familiar. Estes tres cuñados téñeno todo para fracasar, pero como diría Sabonis, malo será.

O guión é obra de Araceli Gonda e o equipo técnico está integrado por Jaime Pérez, na dirección de fotografía; Lu Rodríguez, na montaxe; Santi Jul e Iván Laxe, na música orixinal, e Andrea Pozo, na dirección artística, entre outros. Amais da participación da TVG, conta coa participación de RTVE e coa subvención da Axencia Galega das Industrias Culturais (Agadic). Rodada integramente en Ourense, en 'Cuñados' colaboraron tamén a Deputación de Ourense e a D. O. Ribeiro.

ler máis

O programa 'Bamboleo' ofrece este sábado as actuacións do cantante arxentino Coti e do grupo Tanxugueiras

14/05/2022

Música, humor, xogos e festa serán os eixes dun espectáculo que será animado pola orquestra Los Players

O programa 'Bamboleo' ofrece este sábado as actuacións do cantante arxentino Coti e do grupo Tanxugueiras

Santiago, 14.05.2022.-  Música, humor, xogos e festa serán os eixes sobre os que ‘Bamboleo’ (22.45 h) artellará o espectáculo de hoxe. O espazo presentado por Xose Manuel Piñeiro contará con convidados como o cantante e compositor arxentino Coti, o grupo Tanxugueiras e a orquestra Los Players.

Coti foi o creador de importantes composicións que xa forman parte da historia da música pop como ‘Nada fue un error’ ou ‘Antes que ver el sol’. Esta noite en ‘Bamboleo’ interpretará grandes éxitos da súa carreira musical e participará nos xogos que os colaboradores do programa lle teñen preparados. Ademais ofrecerá un adianto do seu novo disco: o tema ‘La chica de la esquina rosada’.

O grupo Tanxugueiras ofrecerá o tema ‘Midas’. Nel, Olaia, Sabela e Aida afástanse dos seus anteriores traballos, exploran novas sonoridades e fan unha aproximación aos ritmos urbanos.

A orquestra Los Players traerá a ‘Bamboleo’ as súas propias versións de temas moi actuais, mentres que a parella de baile de Redondela formada por David e Lidia fará dúas exhibicións de bachata no ‘Dirtidansi’.   

Laura Rey e Michaël González participarán na sección ‘Agora ou Nunca’ interpretando os temas ‘Fue difícil’, de Rodrigo Tapari, e ‘Break my heart’, de Finneas. No karaoke de ‘A Jrileira’ para entidades deportivas participarán Rosa, polo Club de Patinaxe Artística Brincadeira da Coruña, e Manola, pola Sociedade Deportiva A Baña, cantando o tema ‘Llamando a la tierra’, de M-Clan, e acertando intérpretes de cancións. Ademais, a ‘ITV do Amor’ porá a proba unha parella de namorados que intentará despistar o participante do público para que non se faga co premio.  

Non faltará á cita do sábado ‘o furacán de Arca’: Isi, co que as risas serán soadas. Completarán o equipo Tamara Pérez e Claudio Pan, xunto con Javi Varela e Damián Cortés.

ler máis

Uxía e Javier Ruibal, Malvela, A Roda e Lucía Pérez, e Hydn presentan en 'Luar' as súas novas propostas musicais

13/05/2022

Na antesala do Día das Letras Galegas, o musical festexa a efeméride tamén cos sons de Noelia Solleiro, a orquestra Los Satélites, Karla Lima e a Asociación Cultural Donaire

Uxía e Javier Ruibal, Malvela, A Roda e Lucía Pérez, e Hydn presentan en 'Luar' as súas novas propostas musicais

Santiago, 13.5.2022.-  Os sons da nosa terra son protagonistas absolutos nesta edición festiva do musical da TVG, dedicado hoxe a celebrar a efeméride do Día das Letras Galegas. Neste senso, ‘Luar’ (22.00 h) arranca o venres coas novas propostas de Uxía Senlle e o gaditano Javier Ruibal, recoñecidos artistas cunha ampla experiencia musicando poetas, que uniron agora o seu bo facer para publicar o disco conxunto ‘De tu casa a la mía’, onde homenaxean a poesía a través dos versos e a alma de dúas figuras universais, como son Rosalía de Castro e Federico García Lorca.

Outras mulleres que recorren ás letras de Rosalía nas súas cancións son as integrantes de Malvela. O grupo de cantareiras de Mos acode tamén cun novo traballo discográfico, ‘O benquerer’, que presenta coincidindo co vinte aniversario do lanzamento do seu primeiro álbum, ‘Que o pano non me namora’.

A compositora e intérprete viguesa Noelia Solleiro, gañadora da última edición do certame da CRTVG ‘A canción do verán’, realizará nesta ocasión a súa achega máis especial cun tema dedicado ás Letras Galegas.

Desde Vigo chegará esta noite tamén o grupo de música tradicional A Roda que, nunha das súas intervencións, compartirá escenario con Lucía Pérez para ofrecer ‘Aí o vén’, canción dedicada ao Xacobeo, composta por A Roda no ano santo de 1999, agora con novos arranxos e coa interpretación da cantante do Incio.

O público de ‘Luar’ coñecerá este venres a Hydn, artista galega antes coñecida como Sandra Guedev e excompoñente do grupo Inland Valley, que acaba de comezar o seu camiño en solitario co seu novo sinxelo ‘Drowning Fire’.

Amais, gozarase co tema ‘Sigo sen control’ da cantante galega Karla Lima; coa espectacular posta en escena da orquestra Los Satélites e coas actuacións da Asociación Cultural Donaire.   

Finalmente, Xosé Ramón Gayoso e Trisha Fernández darán paso unha nova edición de ‘Recantos’, con Celtia Buján (Terras de Lugo) e Miki Fernández (Noia-A Barbanza) en competición. O dúo Campos e Crespo achegará os números de humor da velada, mentres que o bote do concurso telefónico parte hoxe con 12.500 euros.


ler máis

Esta semana en 'Clac', poderase ver 'Doentes', o único filme filmado a partir dun texto de Roberto Vidal Bolaño

13/05/2022

Para falaren desta longametraxe, visitan o programa o seu director, Gustavo Balza, e o actor Antonio Durán ‘Morris’, un dos protagonistas

Esta semana en 'Clac', poderase ver 'Doentes', o único filme filmado a partir dun texto de Roberto Vidal Bolaño

Santiago, 13.05.2022.- ‘Clac’ presenta hoxe na G2 (22.55 h) a única longametraxe cinematográfica que se filmou a partir dun texto de Roberto Vidal Bolaño. En 2010, adaptouse a obra teatral ‘Doentes’, que se representara nos escenarios dez anos atrás, pouco antes do pasamento do dramaturgo e actor. O filme rodouse en Compostela e levou cinco premios Mestre Mateo, incluído o de mellor película.

‘Doentes’ é case un esperpento valleinclanesco, con influencias de ‘A Esmorga’ de Blanco Amor. Ambientada na escura Galicia da posguerra, a película é a crónica de amizade de dous sobreviventes marxinais, radicalmente distintos, pero iguais. Un deles é un militante antifranquista tísico e o outro un cura carlista que simula levar chumbo no corpo tras participar supostamente na guerra de Marrocos.

Cando da noite á mañá se desmonta o Hospital Real de Compostela para crear o Parador, os dous protagonistas de ‘Doentes’, encarnados por Antonio Durán ‘Morris’ e Xosé Olveira ‘Pico’, sen teito, quedan vagando pola cidade, buscando a vida. Pero xorde un problema ou unha oportunidade: Franco e a súa muller chegan á cidade ao día seguinte. Eles pretenden que esa visita sexa o salvoconduto contra a intemperie, a cambio de entregarlles a escultura dunha santa de madeira que levan con eles.

Para falaren de 'Doentes', visitan hoxe ‘Clac’ o director, Gustavo Balza, cineasta venezolano que traballa en Galicia desde hai dúas décadas, e o actor Antonio Durán ‘Morris’, que interpreta o antifranquista tísico, un papel polo que levou o Mestre Mateo. O director volverá anos atrás para explicar o xermolo deste proxecto de adaptación dunha obra de Vidal Bolaño, con claras reminiscencias ao mundo de Valle Inclán. Pola súa parte, ‘Morris’ enxalzará a fortaleza da película e lembrará o pracer de traballar con Xosé Olveira ‘Pico’.

ler máis

Documentais, entrevistas, cinema galego e música para celebrar o Día das Letras arredor de Florencio Delgado Gurriarán

12/05/2022

Documentais diarios, cinema galego de estrea, o Concerto das Letras do Consello da Cultura Galega ou a ‘Tanxuverbena’ son as principais propostas da TVG

A Radio Galega ofrecerá monográficos e entrevistas en profundidade arredor do autor homenaxeado e lanza o podcast ‘Florencio, o poeta de Valdeorras’, mentres que na mañá do 17 de maio, a web g24.gal retransmitirá o pleno da RAG desde Córgomo

Documentais, entrevistas, cinema galego e música para celebrar o Día das Letras arredor de Florencio Delgado Gurriarán

Santiago, 12.05.2022.-    A CRTVG desenvolverá unha cobertura global sobre a figura e a obra de Florencio Delgado Gurriarán, o autor homenaxeado este ano no Día das Letras Galegas, e ofrecerá contidos especiais en todas as canles, así como a emisión na mañá do 17 de maio do pleno da Real Academia Galega desde Córgomo, en Vilamartín de Valdeorras (Ourense), na web g24.gal.

A Televisión de Galicia inaugurou o 1 de maio o mes das Letras coa emisión diaria das micropezas ‘Polos vieiros de Florencio’, contido cedido pola RAG en que diferentes persoeiros da cultura reflexionan sobre a traxectoria e a obra de Delgado Gurriarán. E durante os vindeiros días, a Galega vai ofrecer programas especiais, documentais, cinema galego ou a ‘Tanxuverbena’ como principais propostas dunha programación que tamén emitirá o ‘Concerto das Letras’, organizado polo Consello da Cultura Galega.

Xa para o domingo 15, o programa ‘Vivir Aquí’ prepara o especial ‘O galego está de moda’, en que se abordará esta festa das Letras Galegas atendendo á actualidade da nosa lingua e ao viva que está na sociedade, mesmo mais alá das nosas fronteiras. O cinema galego tamén será protagonista nesta celebración coa estrea na TVG, o luns 16 de maio (23.00 h.), da comedia de enredo ‘Cuñados’, ópera prima do ourensán Toño López, e protagonizada por Xosé A. Touriñán, Miguel de Lira e Federico Pérez.

O propio 17 de maio, ademais da cobertura informativa do Día das Letras, ofrecerase ao mediodía ‘Hashtag Gurriarán’, un documental que reivindica esta figura discreta da cultura galega a través da investigación, a escritura e o xornalismo e que amosa como un grupo de rapazas e rapaces galegos poñen en valor a Gurriarán na contorna dixital. Na sobremesa emitirase, pola primeira canle, un Especial Letras de ‘Zigzag’, presentado por María Solar, que afondará na vida e obra de Delgado Gurriarán.

E esa noite, no prime time, a Galega convidará os espectadores á ‘Tanxuverbena’, un evento musical artellado arredor das Tanxugueiras, formación que puxo en valor e tamén de moda a lingua e a tradición galegas. A esta festa están convidados músicos como Andrés Suárez, Rozalén, Boyanka Kostova, Grande Amore, Xoana, Familia Caamagno e La Quinkillada. Poñendo orde no evento estará a comunicadora do momento, Esther Estévez, presentadora do espazo da CRTVG sobre a lingua #DígochoEu.

Documentais cada día da semana e máis cine galego na G2

Na G2 tamén haberá unha ampla proposta de contidos relacionados con Florencio Delgado Gurriarán. O luns 16 emitirase o documental ‘A Casa da Palabra’, que fai un percorrido histórico polos avatares da RAG. O martes 17 ofrecerase o ‘Concerto das Letras’, organizado polo Consello da Cultura Galega, que se celebra no Barco de Valdeorras e que se formula como un punto de encontro entre a música e a poesía, entre México e Galicia e entre Florencio e un dos poetas da súa xeración que máis o inspiraron: o hilozoísta Amado Carballo.

Ao día seguinte, en ‘A Noite de Florencio’, os espectadores poderán ver os cinco capítulos da web serie documental ‘Florencio Delgado Gurriarán. O soño da Galicia infinda’, realizada pola RAG, que pretende achegarlle ao público a traxectoria literaria e de activismo cultural no exilio do autor. A proposta para o 19 de maio é ‘Aquel sol do verán’, unha longametraxe documental sobre o lado máis humano do escritor, político, ensaísta, director cultural e xornalista Carlos Casares. Para rematar a semana das Letras Galegas, o venres, no programa ‘Clac’, proxectarase ‘O lapis do carpinteiro’, unha película de Antón Reixa realizada sobre a obra homónima de Manuel Rivas.

Novo podcast na Radio Galega

Na Radio Galega, o ‘Galicia por Diante’ do día 17 será monográfico desde Córgomo, a vila natal de Delgado Gurriarán, e pola tarde emitirase, de 19.00 a 20.00 h, o programa especial ‘A viaxe de Florencio Delgado Gurriarán’, realizado por Belén Regueira, que analizará a súa vida e obra. Ademais, ao longo da semana das Letras Galegas, a emisora pública contará con entrevistas en profundidade arredor do escritor con especialistas, editores e persoas que o trataron, así como coa emisión de fragmentos de voz do autor, recuperados do Arquivo Sonoro da RG, e de poemas seus na voz de locutores/as da RG.

Así mesmo, a Radio Galega estreará o podcast ‘Florencio: o poeta de Valdeorras’, realizado por Lucía Junquera e Silvia López; colaborará no IV Concurso de Podcast Radio na Biblio, emitindo o 17 de maio e os días posteriores os oito podcasts gañadores, e a web diariocultural.gal contará cunha páxina específica das Letras Galegas que acubillará entrevistas, reportaxes e programas monográficos.

ler máis

O actor e cantante Fran Perea acode esta noite a pintar a mona ao 'Land Rober Tunai Show'

12/05/2022

Comprobará o talento que hai en Galicia en "Dando a nota" e, ademais, volve o xogo máis perigoso do programa, o "Mira quen chama"

O actor e cantante Fran Perea acode esta noite a pintar a mona ao 'Land Rober Tunai Show'

Santiago, 12.05.2022.-    O Land Rober Tunai Show (22:00 h) ponse hoxe nostálxico coa visita dun artista moi querido: o actor e cantante Fran Perea, que se deu a coñecer nunha das series de máis éxito dos anos 2000 e que esta noite vai comprobar o talento que hai en Galicia en "Dando a nota", onde non faltará o ritmo de orquestra.

Ademais, volve o xogo máis perigoso do programa, o "Mira quen chama". Teléfonos sobre a mesa e conta, porque calquera pode chamar a Víctor Fábregas, Miguel Canalejo, Eva Iglesias e Roberto Vilar.

Por se fose pouco, os integrantes de Protección Civil veñen cunha nova misión, e a alcaldesa de Traspazos terá esta semana un bo apuro.

ler máis

'A Sariña busca pretendentes' comeza outra rolda do concurso e recibe dúas novas parellas de concursantes

11/05/2022

‘Os Gandereteiros’, unha parella de amigos, e ‘Os Charritos’, un feliz matrimonio, chegán para disputarlles ás ‘Dispostas’ a clasificación para a gran final

'A Sariña busca pretendentes' comeza outra rolda do concurso e recibe dúas novas parellas de concursantes

Santiago, 11.5.2022.-   ‘A Sariña busca pretendentes’ (23.10 h) inicia esta semana nova rolda de concurso dándolle a benvida a dúas parellas. ‘Os Gandereteiros’ son amigos e chegan con ánimo de traballar moito e tocar a pandeireta, un equilibrio imposible de manter, que lle dará mais dun problema a este par de concursantes.

Con eles veñen tamén ‘Os Charritos’, un matrimonio de felices namorados que porá a proba a súa relación entre masas, picos e palas. Ademais, como parella veterana desta rolda, estarán ‘As Dispostas’, que loitarán por sétima semana consecutiva pola ansiada clasificación para a gran final.

Coma sempre, os avances na obra serán de vital importancia para gañar a chave que entrega o capataz e, mentres que dúas parellas traballan no interior, acometendo a reforma do dormitorio infantil e o despacho, a terceira en discordia fará o propio na fachada posterior da casa.

Ademais, tocará conquistar os veciños, rifar un pouco, chorar moito e tamén rir a gargalladas. O resultado de tantos desvelos verase no tramo final do programa, onde non faltarán as sorpresas. E é que en ‘A Sariña busca pretendentes’ só hai un premio e non se lle vai dar a calquera.
 
A continuación, a TVG achegará unha nova entrega de 'Sempre nos quedará a Sariña', onde cinco veciños de Coristanco debaterán sobre os mellores momentos da emisión desta noite.


ler máis

A CRTVG e a Universidade de Vigo presentan 'Sinxelo', o seu proxecto conxunto de accesibilidade

10/05/2022

Desde febreiro, os medios públicos achegan un vídeo informativo, diario, en formato de ‘lectura sinxela’ a persoas con discapacidade

No marco da mesa redonda ‘Tradución multimedia, inclusión social e lectura fácil’,  Xaime Arias explicou este martes en Vigo a orixe e proceso de produción desta acción enmarcada na RSC da Corporación

A CRTVG e a Universidade de Vigo presentan 'Sinxelo', o seu proxecto conxunto de accesibilidade

Santiago, 10.05.2022.-    Xaime Arias, director de Proxección Social da CRTVG, participou este martes na xornada sobre accesibilidade da Universidade de Vigo, Tradución multimedia, inclusión social e lectura fácil. A Facultade de Filoloxía e Tradución acolleu unha mesa redonda en que tamén participaron Maribel Doval, vicerreitora en funcións de Responsabilidade Social, Internacionalización e Cooperación; Sonsoles Facal, especialista en Lectura Sinxela e adaptadora do programa ‘Sinxelo’ da CRTVG e a UVigo, e Laura Feyto, xefa da Unidade de Accesibilidade de RTVE.

Na súa intervención, Xaime Arias explicou o proxecto ‘Sinxelo’, que desde febreiro achega un vídeo diario en formato de ‘lectura sinxela’ a persoas con discapacidade no marco das accións de RSC dos medios públicos e desde as canles dixitais da Corporación. “Tivemos que crear todo de cero porque ninguén fixera nada parecido”, explicou Arias, salientando a importancia de implicar nestes proxectos os colectivos afectados. “Como televisión pública, somos un escaparate máis para todo este tipo de iniciativas, pero este ten que ser un tema de país”, recalcou Arias, quen aproveitou para demandar o financiamento necesario para seguir avanzando nestas cuestións.

En febreiro, a CRTVG e a Universidade de Vigo uníronse para crear o proxecto ‘Sinxelo’, que achega vídeos diarios en formato de ‘lectura sinxela’ a persoas con discapacidade. Con esta ‘Acción G’ de Responsabilidade Social Corporativa, os medios públicos ampliaron a súa accesibilidade para difundir información audiovisual en galego nun formato baseado na ‘lectura sinxela’. Os vídeos difúndense a través da web G24.gal e as canles dixitais YouTube, Facebook, Instagram e TikTok da Corporación.

A CRTVG é o primeiro medio audiovisual en aplicar este nivel de comunicación con este formato aos seus contidos. Os vídeos son realizados polos Servizos Informativos da TVG en colaboración co Departamento de Tradución e Lingüística da Universidade de Vigo, quen verifica, valida e intervén tamén na adaptación dos contidos e formatos para cumprir cos estándares da ‘lectura sinxela’.

‘Sinxelo’ segue os criterios de ‘lectura sinxela’, método que aplica pautas e recomendacións á redacción de textos, ao ritmo das imaxes ou ao deseño e maquetación de documentos, sempre coa finalidade de facer accesible a información ás persoas con dificultades de comprensión lectora, fundamentalmente, aínda que non só, a persoas con síndrome de Down. A voz do vídeo está xerada mediante intelixencia artificial e a súa velocidade está regulada ao fin correspondente. Os parámetros dentro dos que se move o proxecto están tamén marcados pola asociación Inclusion Europe, apoiada pola Unión Europea, e levarán o logo Easy-to-read.

ler máis