CRTVG

Buscar

CRTVG Viva

Novas TVG

Ruth Lorenzo, unha das artistas máis potentes do panorama musical, convidada nun 'Bamboleo' que contará tamén coa presenza da orquestra París de Noia

15/05/2021

Ademais, estará no escenario Mekánica Rolling Band, que acaba de publicar o seu primeiro disco, ‘A rúa é nosa’, en que mesturan estilos coma o ska, o reggae ou o punkrock con toques balcánicos e tradicionais

 &a

Ruth Lorenzo, unha das artistas máis potentes do panorama musical, convidada nun 'Bamboleo' que contará tamén coa presenza da orquestra París de Noia

Santiago, 15.05.2021.-    Unha nova edición de ‘Bamboleo’ (22.05 h) chega este sábado á grella da Televisión de Galicia. O programa que presenta Xosé Manuel Piñeiro contará con actuacións estelares como a da orquestra París de Noia, o grupo galego Mekanika Rolling Band e dunha das artistas máis potentes do panorama musical: Ruth Lorenzo.

A artista murciana, que arrasou nun concurso musical estranxeiro e representou a España no Festival de Eurovisión, ten un novo traballo: ‘Crisálida’, en que recolle unha época de cambio e de metamorfose. Ruth interpretará no escenario do ‘Bamboleo’ varios temas como adianto deste novo traballo e tamén grandes éxitos do seu anterior disco, como ‘Good girls don´t lie’. Ademais, os colaboradores do programa porán a proba a Ruth Lorenzo: Tamara Pérez, no ‘Sobes ou baixas’, e Claudio Pan, nun divertido xogo musical co público do estudio de gravación.

Estará tamén en ‘Bamboleo’ Mekánica Rolling Band, banda que acaba de publicar o seu primeiro disco, ‘A rúa é nosa’, en que mesturan estilos coma o ska, o reggae ou o punkrock con toques balcánicos e tradicionais. Esta noite interpretarán ‘Romaría de defuntos’, un tema moi marchoso que alude á situación dos músicos na pandemia.

Ademais, a música da orquestra París de Noia encherá o estudio con temas que forman parte do seu novo disco, ‘Party’, e Isi volverá un sábado máis para contar outra das súas historias.

No ‘Agora ou Nunca’ cantarán Vicky Iglesias, que interpretará ‘When we were young’, de Adele, e Luís Moreta, que fará seu o tema ‘La morena de mi copla’, de Manolo Escobar. Na ‘Jrileira’, Ivi representará o Club Atletismo Serres Runners, de Muros, mentres que Rafa xogará polo Club de Fútbol Vista Alegre, de Santiago. No karaoke tocaralles cantar  ‘Campanera’, de Joselito, e a continuación acertar cantantes.

No ‘Dirtidansi’, os protagonistas serán Borja e Estefanía, unha parella de bailaríns de Biscaia que ofrecerán unha exhibición de bachata e de jive. Finalmente, na ‘ITV do Amor’ Alexa e a súa parella terán que enganar o participante do público para facerse co premio.

ler máis

Fútbol sala feminino, baloncesto LEB e a Terceira División de fútbol, protagonistas na oferta deportiva dos medios públicos galegos

14/05/2021

A G2 ofrecerá o sábado a final da Copa Galicia entre o Pescados Rubén Burela e o Ourense Envialia e o partido Ourense C. F.-S. D. Fisterra

O domingo a atención estará posta no Palacio dos Deportes de Riazor, onde se disputa o Leyma Coruña-Tau Castelló, e no encontro U. D. Ourense-A. G. Estudiantil

Fútbol sala feminino, baloncesto LEB e a Terceira División de fútbol, protagonistas na oferta deportiva dos medios públicos galegos

Santiago, 14.05.2021.-    A oferta deportiva dos medios públicos galegos para esta fin de semana comezará o sábado ás 17.00 h, coa retransmisión da final da Copa Galicia de fútbol sala feminino, que disputarán o Pescados Rubén Burela e o Ourense Envialia. As ourensás vólvense enfrontar ao que foi o seu rival máis contundente este último mes. Desde o pasado 27 de marzo ambos os dous conxuntos víronse sobre o parqué ata tres veces, con dominio absoluto das lucenses, polo que o obxectivo do Envialia será non caer nunha cuarta ocasión.

A continuación, ás 19.00 h, o protagonista na segunda canle da Galega será o fútbol de Terceira División, concretamente o partido Ourense C. F.-S. D. Fisterra. O equipo local mantén o liderado do seu grupo na loita pola permanencia e intentará converter de novo O Couto nun fortín ante o conxunto revelación da categoría.

A xornada dominical comezará ás 12.30 h con baloncesto da Liga LEB, en que se medirán o Leyma Coruña e o Tau Castelló. Os coruñeses aspiran a acabar como primeiros de cara ao play off de ascenso á ACB e agardan que a presenza de público no Palacio dos Deportes de Riazor sexa un factor diferencial para conseguir a vitoria.

Pola tarde, a partir das 16.30 h, os espectadores da G2 poderán seguir en directo outro partido de Terceira División, o que enfrontará a U. D. Ourense e a A. G. Estudiantil. A xornada pasada, o conxunto ourensán conseguiu un triunfo vital antes As Pontes que lle permite achegarse á salvación.

ler máis

'Auga Seca', da TVG e a RTP, convértese na primeira serie en galego aspirante aos Premios Platino

14/05/2021

Tras o éxito da primeira temporada, A TVG estreará proximamente a súa segunda parte, gravada entre Vigo e Lisboa

A serie, unha coprodución de Portocabo e a portuguesa SPI, foi seleccionada entre máis de 600 producións de 23 países iberoamericanos

O filme ‘Cuñados’, tamén participado pola TVG, continúa a ser a película máis vista en Galicia desde a súa estrea

'Auga Seca', da TVG e a RTP, convértese na primeira serie en galego aspirante aos Premios Platino

Santiago, 14.05.2021.- A primeira temporada da serie ‘Auga Seca’, participada pola TVG, RTP e HBO, e producida por Portocabo e SP-i, vén de converterse na primeira serie en galego preseleccionada nos VIII Premios Platino do Cine Iberoamericano, pasando unha primeira fase entre máis de 600 producións de 23 países iberoamericanos. As categorías nas que destaca esta ficción son a de Mellor interpretación feminina en miniserie ou teleserie (Victoria Guerra) e a de Mellor interpretación masculina de reparto en miniserie ou teleserie (Adriano Luz).

ler máis

Rosario, Puro Relajo e a agrupación O Fiadeiro converten esta noite 'Luar' nunha festa

14/05/2021

En ‘O mellor DÉCADA casa’ compiten hoxe (21.55 h) Luís Iglesia e Fernando Romay, con éxitos da década dos 70 e dos anos 90, respectivamente

Rosario, Puro Relajo e a agrupación O Fiadeiro converten esta noite 'Luar' nunha festa

Santiago, 14.05.2021.-  Nova noite musical e de entretemento na compaña de ‘Luar’ (21.55 h) na Televisión de Galicia. Encabeza o elenco de artistas, Rosario, que regresa ao programa cun novo traballo discográfico na rúa, ‘Te lo digo todo y no te digo na’, un álbum fresco e con moita enerxía, produto dunha artista máis madura e renovada. A audiencia da Galega poderá gozar da presentación deste disco da saga Flores, que trae rumbas, baladas, blues, pop, reggae, flamenco e destacadas colaboracións especiais.

Tamén trae hoxe os mellores sons mexicanos á Galega o grupo Puro Relajo. A banda de Aibar, con 5 discos no mercado, está formada por cinco músicos amantes das rancheiras, que recuperan as cancións tradicionais dos mariachis e se atreven a versionar temas euskaldúns ao ritmo das trompetas.

E procedentes de Vigo, hoxe contarase coas actuacións da agrupación folclórica O Fiadeiro, formación etnográfica dedicada a recuperar sons e baile tradicional, que está percorrendo as localidades galegas para celebrar os seus 25 anos de traxectoria musical.

No certame ‘O mellor DECADA casa’ veranse as actuacións únicas de Luis Iglesia, que encarna a década dos 70, e de Fernando Romay, dos 90, interpretando dous referentes deses anos: ‘Cantares’ e ‘Vive a vida tola’, respectivamente. O bote do concurso telefónico segue crecendo e parte hoxe con 8.000 euros.

Paco e Pepe e o dúo formado por Pedro Brandariz e Fran Rei achegarán unha boa dose do seu mellor humor. Por outra parte, Xosé Ramón Gayoso, Patricia F. Santana e Rocío Rodríguez darán paso a unha nova edición do certame de talentos ‘Recantos’, en que competirán Yago Martínez, en representación de Terras de Pontevedra, e Chiña, de Noia-A Barbanza.

ler máis

'Land Rober Tunai Show' recibe este xoves os actores Javier Gutiérrez, Vicky Luengo e Mónica Regueiro

13/05/2021

O programa (21.55 h), ao que volve Felipe II, contará tamén coa presenza da xogadora galega de baloncesto Blanca Millán e ofrecerá novas entregas de ‘Casados ou Divorciados’ e ‘Xubilados VS Milenials’

'Land Rober Tunai Show' recibe este xoves os actores Javier Gutiérrez, Vicky Luengo e Mónica Regueiro

Santiago, 13.05.2021.-    O programa ‘Land Rober Tunai Show’ recibe este xoves o actor Javier Gutiérrez, que chegará moi ben acompañado de dúas colegas, Vicky Luengo e Mónica Regueiro, compañeiras na obra ‘Principiantes’, coa que están de xira. O espazo da TVG contará tamén coa visita da xogadora galega de baloncesto Blanca Millán.

O desta semana será un ‘Land Rober’ especial, xa que volve Felipe II, que regresa do inframundo porque ten unha cita para levar a vacina. Tamén se ofrecerá unha nova entrega de ‘Casados ou Divorciados’ e os convidados do programa terán que andar con tino para acertar. Ademais, volve o xogo interxeracional por excelencia: ‘Xubilados VS Milenials’. Quen conseguirá o liderado?

ler máis

O actor portugués Rodrigo Paganelli ficha polo #DígochoEu da CRTVG en Twitch

12/05/2021

O #DígochoEu terá dúas emisións semanais en Twitch ás 22.00 horas: ‘O reto do #DígochoEu’, os luns, e o ‘#Apuntamento lusófono’, os mércores, coa colaboración do actor luso Rodrigo Paganelli 

O luns 17, o convidado ao primeiro reto será o presentador do ‘Malicia noticias’ Brais Doval

O actor portugués Rodrigo Paganelli ficha polo #DígochoEu da CRTVG en Twitch

Santiago de Compostela, 12.05.2021.- A CRTVG emitirá, desde a semana que vén, dous programas semanais, ás 22.00 h en twitch.tv/crtvg. Despois da estrea en Twitch deste mércores, nunha sesión en streaming en que participaron centros escolares de toda Galicia, os seguidores de #DígochoEu poderán gozar destas dúas citas semanais os luns e mércores pola noite. 

ler máis

A movida dos 80 e a música tradicional enfróntanse en 'A miña familia pola túa' con dous modos de vida opostos

12/05/2021

Intercambian as familias Sonia, que traballa como ‘sandadora’ e tarotista, e Begoña, amante do deporte e da natureza, en cuxa casa fabrican instrumentos de modo artesanal

A movida dos 80 e a música tradicional enfróntanse en 'A miña familia pola túa' con dous modos de vida opostos

Santiago, 12.05.2021.-  Dúas familias opostas. Uns, amantes da música dos 80, e outros, da música tradicional galega. Así son os protagonistas desta semana do programa da TVG ‘A miña familia pola túa’ (22.25 h).

Begoña vive co seu fillo Miguel e a súa parella Eduardo en Ponteareas. Eduardo traballa nun obradoiro de gaitas, onde fabrica de modo artesanal estes instrumentos, ao igual que o fixeron o seu avó e o seu pai, e véndeos a través de Internet. Para esta familia, a música tradicional galega forma parte da súa vida diaria. Tanto Begoña como Eduardo son moi aventureiros, namorados do deporte e do contacto coa natureza e practican todo tipo de deportes de risco. Como será a convivencia cunha muller á que lle produce pánico levantar os pés do chan? Que pasará cando descubran que a ‘nova nai’ que os visita non é en absoluto tradicional?

Pola súa parte, Sonia e o seu marido, Ángel, defínense a si mesmos como dous tolos da música da década dos 80 e así intentan transmitirllo á súa pequena de tres anos, Betsabé, ensinándolle as cancións e organizando coa nena festas temáticas con disfraces no salón. Ángel é músico de profesión e foi guitarrista do grupo que acompañaba o cantante Tino Casal; na súa casa aínda conserva moitos recordos daquela época. Pola súa parte, Sonia gaña a vida como ‘sandadora’ e tarotista, é unha muller moi sensitiva que practica distintas técnicas de meditación. Aceptará Begoña estas rarezas? Conseguirá converter esta familia tan especial en tradicional? Poderá convencer este músico da Movida para que aprecie o son das gaitas?

ler máis

A CRTVG estrea canle en Twitch este mércores cun encontro de #DígochoEu con escolares de toda Galicia

11/05/2021

A primeira sesión será este mércores 12 de maio, coa participación de escolares e profesores de centros educativos 

A estrea pode seguirse en twitch.tv/crtvg, ás 12:00h

A CRTVG estrea canle en Twitch este mércores cun encontro de #DígochoEu con escolares de toda Galicia

Santiago de Compostela, 11.05.2021.- A CRTVG estrea este mércores canle en Twitch, a plataforma de vídeos en directo, cunha primeira sesión de #DígochoEu en streaming ás 12 do mediodía e coa participación de centros escolares de toda Galicia.

ler máis

'Cousas da casa' axudará esta semana unha influencer de Vigo e unha youtuber de Cambre a reorganizar os seus espazos

11/05/2021

Ademais, na casa dunha familia viguesa, Vanesa Travieso descubrirá unha cociña chea de aparellos eléctricos, unha despensa ateigada e unha neveira a punto de estoupar

'Cousas da casa' axudará esta semana unha influencer de Vigo e unha youtuber de Cambre a reorganizar os seus espazos

Santiago, 11.05.2021.-  Hoxe, en ‘Cousas da Casa’ (22.25 h), a experta en orde Vanesa Travieso terá que afrontar tres novos retos en que poñer en práctica as teorías de Marie Kondo, a gurú xaponesa da organización, para acadar harmonía no nosa contorna.

O primeiro caso levará o programa ata Ponteareas para coñecer a influencer Lara Rodríguez, que aos seus 22 anos é a imaxe dun centro comercial da cidade de Vigo. Lara recibe roupa que as marcas lle envían para que a amose nas súas redes sociais. O resultado deste goteo de pezas é un armario que chegou ao límite e un canapé repleto a máis non poder. Aínda que Lara é unha rapaza moi ordenada, ten un problema: non consegue desprenderse de nada.

En Vigo, Vanesa coñecerá a familia González, unha parella con tres fillos e unha cociña caótica por mor do afán de Laura de coleccionar aparellos eléctricos que lle faciliten as tarefas nos fogóns. Vanesa descubrirá nesta cociña unhas despensas ateigadas e unha neveira a punto de estoupar, pero o verdadeiro exame para a experta en orde, será o de poñer en verea os gatos da familia, acostumados a utilizar a cociña como o seu salón de xogos.

A última parada da ‘coach da orde’ será en Cambre, onde a espera Isa Villanueva, youtuber e nai dunha nena de seis anos á que queren sorprender cunha nova reorganización do seu cuarto. Isa e Vanesa traballarán cóbado a cóbado para descartar e reorganizar o espazo da pequena. A sorpresa virá cando Vanesa descubra que neste cuarto a nai ten moitos obxectos e recordos dos que é difícil desprenderse.

Unha vez máis, Vanesa convencerá os protagonistas de que poñer orde nas ‘Cousas da Casa’ conseguirá encher o seu fogar de enerxía positiva e deixará espazo para que outros obxectos marabillosos poidan entrar nas súas vidas.

ler máis

CRTVG, a primeira autonómica de España en lanzar unha canle integramente a través de Youtube

10/05/2021

O sinal TVG Europa poderase ver en directo as 24 h, a través do maior distribuidor do mundo

A CRTVG continúa a desenvolver a súa estratexia de creación de canles dixitais e alcance global

CRTVG, a primeira autonómica de España en lanzar unha canle integramente a través de Youtube

Santiago de Compostela, 10.05.2021.-   A Corporación Radio Televisión de Galicia inicia este luns a emisión ininterrompida do seu sinal internacional a través da plataforma YouTube, converténdose na primeira autonómica e unha das primeiras televisións xeneralistas de España en ofrecer contido en YouTube as 24 horas do día, os 7 días da semana e en directo.

ler máis