CRTVG

Buscar

CRTVG Viva

Novas TVG

A historia de Elena e Luís, un amor contra vento e marea, será protagonista no 'Casamos!' desta semana

06/12/2022

Desde o comezo tiveron que facer fronte aos dixomedíxomes, pero souberon seguir adiante e agora, tras seis anos de relación, daranse o si quero nunha voda por todo o alto (23.05 h)

A historia de Elena e Luís, un amor contra vento e marea, será protagonista no 'Casamos!' desta semana

Santiago, 06.12.2022.-    O traballo uniu os camiños e as vidas de Elena e Luís, a parella protagonista do ‘Casamos!’ deste martes. Axiña xurdiu a química entre eles e de seren compañeiros pasaron a ser algo máis. Luís estaba inmerso nun proceso de separación da súa exparella e Elena axudouno nese camiño, que non foi nada doado.

Entre confidencias e confesións chegou o primeiro bico e, tras uns meses vivindo o seu amor en segredo, decidiron facer pública a súa relación. Pero xa desde o comezo a parella tivo que facer fronte aos dixomedíxomes. Por iso pasárono moi mal, pero souberon seguir adiante e agora, tras seis anos de relación, daranse o sí quero nunha voda por todo o alto.

ler máis

O mellor novembro da última década para o prime time da TVG

02/12/2022

A audiencia da Galega na franxa de máis consumo televisivo alcanza os mellores datos desde 2012, cun 12,3%

Os informativos da TVG acadan a cota máis alta na franxa do mediodía, cun 19,5% de luns a venres

Os servizos informativos da TVG chegaron neste mes a 1.594.000 galegos

Crecen todas as franxas horarias: as mañás medran un 2,2% e as tardes, un 1,3%

O mellor novembro da última década para o prime time da TVG

Santiago, 02.12.2022.-    Os datos de Kantar Media do mes de novembro refrendan os coñecidos onte tamén polo outro medidor de audiencias de referencia en España, o Estudo Xeral de Medios (EXM).

Así, os datos de consumo de televisión ofrecidos por Kantar Media reflicten que a TVG viviu o seu mellor mes de novembro desde 2011, cun 11,7% de cota de pantalla. Se falamos de forma específica da franxa do prime time -a de máis consumo do día-, a TVG rexistrou o seu mellor dato desde 2012 cun 12,3% de audiencia, é dicir, o mellor dato da década nun mes de novembro. Con este, son catro meses seguidos de traxectoria ascendente, que confirman a positiva acollida por parte da cidadanía á proposta da canle para este outono, en que coincide ademais a emisión do Mundial de Fútbol noutras canles e plataformas.

A franxa informativa do mediodía, co ‘Galicia Noticias’ e ‘Telexornal Mediodía’, logra un 19,5% de luns a venres, e lidera con máis dun punto por riba do seguinte competidor, A3. Os informativos da Galega chegan a unha audiencia total de máis dun millón e medio de galegos, o 61% da poboación maior de 4 anos.

Éxito do prime time e o day time

Pese á competencia, a TVG mantén a súa estratexia de información en directo e entretemento tamén en directo ao longo de toda a grella, e todo feito en Galicia. Así, os venres, por exemplo, a TVG supera as 15 horas de directo e o xoves móvese en algarismos semellantes.

Os produtos elaborados polo sector audiovisual galego (programas, series, cinema…) están competindo con solvencia e facendo medrar as súas franxas de audiencia. No mes de novembro o prime time da TVG medrou en catro dos sete días da semana: martes, mércores, xoves e domingos, nun mes en que destaca o liderado na noite dos sábados con ‘Bamboleo’. ‘Land Rober’, ‘Atrápame se podes’, ‘Malicia Noticias’ ou ‘Luar’ seguen a ser apostas seguras para a audiencia galega.

O day time da Galega tamén medra. As mañás, con toda a programación en directo, arrancando co ‘Bos Días’  e seguindo con ‘A Revista’, ‘A Bóla Extra’ e a nova incorporación do espazo ‘Atmosféricos’, medraron neste mes con respecto ao anterior un 2,2%, de luns a domingo. E as tardes, entre as 15.30 e as 20.30 horas, cos programas de actualidade e entremento tamén en directo ‘Quen Anda Aí?’ e ‘Hora Galega’, sumaron un 1,3% máis de espectadores.

No eido da FORTA, segundo os datos dados a coñecer por Kantar Media, a TVG segue a ser un dos principais motores do grupos, superando a media en 3,1 puntos de cota.

ler máis

A directiva do Celtic Media Festival visita a CRTVG

02/12/2022

No marco da súa viaxe a Galicia para participar nas xornadas ‘I+P, Ideas para Producir’ do Clúster do Audiovisual Galego, achegáronse a San Marcos para coñecer o sistema dixital de produción dos medios públicos

A directiva do Celtic Media Festival visita a CRTVG

Santiago, 02.12.2022.-    O presidente do Celtic Media Festival e director xeral da canle TG4, a televisión pública de Irlanda, Alan Esslemont, acompañado por Catriona Logan, directora do Celtic Media Festival, e Naomi Henry-Wright, xerente da mesma entidade, visitaron este xoves o centro de San Marcos da CRTVG, onde coñeceron as instalacións, redaccións, platós e a nova área de Documentación e Arquivo.

No seu percorrido, no que se interesaron moi especialmente polo recente proceso de dixitalización e a estratexia de futuro da canle, estiveron acompañados por Fernando R. Ojea, director de Contidos da CRTVG; Xaime Arias, director de Proxección Social, e Montse Besada, xefa de Contidos da Corporación.

A CRTVG é membro da alianza de televisións de países celtas representadas no Celtic Media Festival, que promove a cultura e linguas dos países celtas nos ámbitos do cinema, a televisión, a radio e os novos medios de comunicación.

A Coruña acolle esta semana unha xornada de pitching organizada polo Clúster Audiovisual Galego, a décimo sexta edición do evento ‘I+P, Ideas para Producir’, ao que acoden máis dun cento de profesionais do sector de España e Europa. Entre eles, responsables de contidos de televisións e plataformas, distribuidores e produtores, así como de eventos do sector como o Celtic Media Festival, un referente no audiovisual europeo. A CRTVG, mediante esta asociación, exerce como ponte entre o sector audiovisual galego e produtores doutras partes de Europa para abrir camiño e fomentar o desenvolvemento de estratexias e proxectos audiovisuais internacionais.

ler máis

A TVG é a canle autonómica máis vista de 2022 e líder en Galicia

01/12/2022

Na franxa informativa do mediodía a Televisión de Galicia duplica en audiencia o seguinte competidor e a Galega gaña tamén a batalla do prime time

Segundo os datos do EXM, o grupo de emisoras da Radio Galega suma 168.000 oíntes diarios neste ano, consolidándose como a primeira canle pública de Galicia

A TVG é a canle autonómica máis vista de 2022 e líder en Galicia

Santiago, 01.12.2022.-    Os datos da terceira e última onda do Estudo Xeral de Medios (EXM) deste ano permiten completar o panorama dun 2022 de grandes resultados para a Corporación RTVG.

A Televisión de Galicia consolídase como a canle máis vista de 2022 na nosa comunidade cun 20,9% de cota de pantalla, superando en case cinco puntos o seguinte competidor, a canle privada A3 (16,1%).

Fóra das nosas fronteiras, esta onda do EXM, que pecha o balance do ano natural (de febreiro a novembro), deixa tamén a TVG como a canle autonómica máis vista de 2022, superando en case 4 puntos a seguinte canle (TV3, 17,1%).  

Neste 2022 a TVG pecha a semana con catro dos sete días con algarismos por riba do 20% de audiencia: 22,3% os luns; 21,5% os martes; 22,7% os xoves e 21,5% os venres, o que reflicte unha extraordinaria fidelidade da cidadanía ao conxunto da grella de programación, todos os días e a todas horas. De feito, por franxas, a TVG lidera as mañás cun 15,8%. Na franxa do mediodía a TVG segue a ser o gran dominador. Os informativos ‘Galicia Noticias’, con Eduardo Herrero, e o ‘Telexornal Mediodía’, con Marta Darriba, seguen a liderar con solvencia os seus tramos e case duplican a segunda opción, cun 33,3% para a TVG e 16,8% para A3. No prime time, a franxa de máis consumo e a máis competida do día, Televisión de Galicia segue a ser a canle máis vista polos galegos cun 18,2% de media, superando en tres puntos o seguinte competidor.

Os datos de prime time reflicten o agrado da cidadanía polo traballo realizado polo sector audiovisual galego, xa que a TVG compite nesa franxa con programas, series ou cine elaborado en Galicia. Así, o 96% do que emite a primeira canle da TVG está feito en Galicia e por galegos, algarismos que non acada ningunha outra canle a nivel estatal en referencia á produción no seu territorio.

168.000 oíntes diarios para a Radio Galega no 2022

A Radio Galega segue a ser a emisora pública máis escoitada de Galicia neste 2022, e métese de novo no podio das radio xeralistas galegas. O grupo de emisoras da Radio Galega acadou os 168.000 oíntes diarios neste ano 2022.

Esta última onda do EXM deixa o liderado en tramos horarios da aposta informativa das mañás no ‘Galicia por Diante’ de Silvia Pereira e Kiko Novoa; no programa decano da radio deportiva galega, o ‘Galicia en Goles’ de Xoán Galán, nas fins de semana, xunto co ‘Galicia por Diante Fin de Semana’, aos mandos de Victoria Rodríguez. Precisamente as audiencias dos domingos nesta terceira onda do EXM son as mellores dos útimos cinco anos. E, por suposto, o liderado indiscutible das madrugadas co ‘Pensando en ti’ de Marcial Mouzo.

Ademais, o novo formato e horario de ‘A Tarde’, de 15.00 a 19.00 h, trouxo consigo unha suba tamén de audiencia nesa faixa. E ‘Ao Contraataque’ consolídase na noite con 26.000 oíntes.

Estes datos do ano 2022 refrendan a confianza da sociedade galega nos seus medios públicos de comunicación en dúas das principais forma de achegamento á cidadanía como son a radio e a televisión.

ler máis

O programa 'Nacer de novo' da TVG fai 35 anos visitando Israel

28/11/2022

Dirixido e presentado por Jaime Fernández Garrido, é o programa das igrexas evanxélicas en Galicia e un dos espazos institucionais nas canles públicas máis antigos de Europa, con máis de 1.800 semanas en antena

O programa 'Nacer de novo' da TVG fai 35 anos visitando Israel

Santiago, 28.11.2022.-     O espazo ‘Nacer de novo’ da Televisión de Galicia fai 35 anos en antena e, con tal motivo, durante as vindeiras semanas emitirá unha serie de programas gravados en Israel, visitando distintos enclaves da Terra Santa. O programa percorrerá lugares como Xerusalén, Belén, Cesarea de Filipos, o río Xordán, Xericó, Meggido, o monte da Felicidade, Cesarea Marítima, Cafernaum, a Fortaleza de Masada e o mar de Galilea, entre outros.

Dirixido e presentado por Jaime Fernández Garrido, ‘Nacer de novo’ é o programa das igrexas evanxélicas en Galicia da canle pública galega e, ademais, un dos espazos institucionais nas canles públicas máis antigos de Europa, con máis de 1.800 semanas en antena.

En España, ‘Nacer de novo’ foi pioneiro nos medios de comunicación autonómicos coa súa estrea en 1987. Máis tarde chegarían espazos similares a outras canles como TV3, EiTB e Canal Sur, entre outros.

‘Nacer de novo’ destaca tamén polo contacto cos televidentes. Así, ao longo destes 35 anos, case 40.000 persoas escribiron ao programa ou chamaron para recibir O Novo Testamento.

ler máis

A película 'Os demos de barro', participada pola TVG, gaña o Premio á Mellor Banda Sonora Orixinal no Festival Caminhos do Cinema Português

25/11/2022

As melodías premiadas, dos galegos Carlos Guerreiro e Manuel Riveiro, abrirán os actos previos á vindeira gala dos Premios Goya, en que o filme conta con 12 candidaturas

A película 'Os demos de barro', participada pola TVG, gaña o Premio á Mellor Banda Sonora Orixinal no Festival Caminhos do Cinema Português

Santiago, 25.11.2022.-    A coprodución hispano-franco-portuguesa ‘Os demos de barro’, que conta coa participación da Televisión de Galicia, gañou o Premio á Mellor Banda Sonora Orixinal no Festival Caminhos do Cinema Português, polo traballo dos galegos Carlos Guerreiro e Manuel Riveiro. As súas melodías abrirán os actos previos á gala dos Goya 2023 o vindeiro 27 de xaneiro. Polo de agora, o filme conta con 12 candidaturas a estes premios e, como parte da celebración, a Academia interpretará as obras dos compositores gañadores e candidatos aos galardóns.

Esta película de animación, inspirada visualmente na cerámica tradicional portuguesa, conta a historia de Rosa e o seu regreso ás súas raíces e á vida natural do campo e da súa aldea natal. ‘Os demos de barro’ realizouse durante os últimos catro anos entre as cidades de Lisboa, A Coruña, Bilbao e Bordeos.

A produción combina o stop motion coa animación en 2D e conta coas voces de intérpretes galegos como Isabel Naveira, Monti Castiñeiras, Ledicia Sola ou Celso Bugallo. ‘Os demos de barro’ é unha coprodución de Sardinha em Lata (Portugal), Caretos Films A.I.E. (Galicia), Basque Films (País Vasco) e Midralgar (Francia), que conta coa participación da TVG e o apoio de Eurimages, República Portuguesa, ICAA-Ministerio de Cultura, PIC Portugal, Visita Portugal, Ibermedia, Région Sud, Nouvelle Aquitaine e a Xunta de Galicia.

ler máis

A CRTVG busca ata o 5 de decembro a canción que lle porá a banda sonora ao Nadal galego

22/11/2022

As persoas interesadas en participar na oitava edición do concurso ‘Este Nadal canta con nós’ deben enviar os seus temas, inéditos e escritos en galego, ao enderezo canciondonadal2022@crtvg.es

A CRTVG busca ata o 5 de decembro a canción que lle porá a banda sonora ao Nadal galego

Santiago, 22.11.2022.-    A CRTVG mantén aberto ata o 5 de decembro o prazo para participar na oitava edición do certame ‘Este Nadal canta con nós’, que ten como obxectivo atopar a mellor banda sonora para acompañar os galegos e galegas este Nadal.

As cancións participantes deben de ser inéditas e orixinais, ademais de estaren escritas en lingua galega. Cada grupo ou solista presentará un só tema, cunha duración non superior aos 3 minutos, e poderá enviar un vídeo musical do mesmo. Os participantes enviarán as súas cancións, de temática libre, en formato mp3 e, en caso de presentar vídeo musical, en mp4, ao enderezo canciondonadal2022@crtvg.es.

O premio conta cunha dotación económica de 1.000 euros e, para decidir o gañador, o xurado valorará a orixinalidade, a calidade técnica e o acompañamento dun vídeo musical. Ademais do premio, a canción gañadora terá difusión na televisión e na radio públicas, así como nas redes sociais da Corporación.  

O xurado estará composto por cinco persoas designadas pola dirección da Corporación Radio e Televisión de Galicia e o 12 de decembro farase público o tema vencedor e unha lista puntuada ata o quinto posto na web www.crtvg.gal, onde tamén se poden consultar as bases do concurso.

Esta é a oitava edición deste concurso musical, que anteriormente gañaron os nenos do CEIP San Clemente de Caldas de Reis, coa súa proposta ‘Cando é Nadal’; Iván Vale, co tema ‘O meu Nadal perfecto’; Plan Siberia, con ‘Xunto a ti’; Susana Martínez, con ‘O sinal’; o CEIP Covas de Meaño, con ‘Saúde e cante o merlo’; Kiko Bea, coa canción ‘Un Nadal distinto’, e o grupo xuvenil King Kids, que se fixo coa última edición do certame grazas ao tema ‘Un bo Nadal’.

ler máis

A audiencia da CRTVG axuda a que UNICEF trate máis de 3.000 nenos con desnutrición aguda

21/11/2022

Os medios públicos galegos emitiron a semana pasada, no marco das súas AcciónsG e da XII Semana coa Infancia de UNICEF, contidos especiais para sensibilizar sobre as súas necesidades 

A audiencia da CRTVG axuda a que UNICEF trate máis de 3.000 nenos con desnutrición aguda

Santiago, 21.11.2021.-    A colaboración cidadá con UNICEF a través da Semana coa Infancia da CRTVG serviu para dotar de tratamento contra a desnutrición aguda grave 3.289 nenos e nenas durante un día.

No marco da XII Semana coa Infancia, a TVG e a Radio Galega, así como o portal web crtvg.gal e as redes sociais da Corporación axudaron a que se coñecese o impacto da guerra de Ucraína, a seca e a inflación, que deron como resultado un grave aumento da desnutrición no Corno de África, en países como Somalia ou O Sudán do Sur, ou o aumento da pobreza na Federación Rusa, Romanía e a propia Ucraína.

Coa campaña deste ano, enmarcada nas AcciónsG de Responsabilidade Social Corporativa da CRTVG, UNICEF puxo o foco na saúde mental da infancia e a adolescencia, achegando nos distintos espazos da TVG e da Radio Gaelga datos de acoso escolar e ciberacoso, en Galicia e en España, e como inflúen nos niveis de benestar emocional, integración social e satisfacción coa vida dos nenos e nenas que os sofren.

Entre outros moitos programas, ‘Bos Días’, ‘A Revista’, ‘Galicia Noticias’ e o espazo ‘Dígocho Eu’ colaboraron emitindo reportaxes e entrevistas relacionadas con esta XII Semana coa Infancia. Ademais, ‘Luar’ ofreceu o pasado venres unha edición especial en que deu a coñecer o labor de UNICEF en distintos países e se fixeron chamamentos á solidariedade da audiencia, e o espazo ‘Zigzag’ contou este domingo coa participación de nenos e nenas como presentadores e técnicos durante un día.

Hai que engadir a colaboración de espazos informativos e de entretemento da Radio Galega como ‘Galicia por Diante’, ‘A Bóla Extra’, ‘A Tarde’, ‘A Crónica’, ‘Convivir’ e ‘Galicia en Goles’, e o labor do portal web e das redes sociais da Corporación. E, sobre todo, hai que salientar a colaboración dos espectadores dos medios públicos galegos que se sumaron á campaña. Grazas a todas as colaboracións dos cidadáns, oíntes e televidentes da Galega, a ONG, cumpriu un dos seus obxectivos de axuda e difusión das diferentes mensaxes ligadas aos Obxectivos do Desenvolvemento Sostible da ONU, que son tamén as bases das AcciónsG da Corporación RTVG.

ler máis

A saúde mental na adolescencia, protagonista da campaña de UNICEF e CRTVG

13/11/2022

TVG, Radio Galega e os medios dixitais emitirán desde o luns 14 ata o domingo 20 de novembro, Día Mundial da Infancia, contidos especiais relacionados coa protección da infancia

A audiencia poderá colaborar con UNICEF mediante o envío de SMS solidarias coa palabra AXUDA ao 28028. Co custo dunha mensaxe, 1,2 €

A campaña contará coa participación de cativos en programas como o ‘ZigZag’ ou 'Galicia en Goles'

A saúde mental na adolescencia, protagonista da campaña de UNICEF e CRTVG

Santiago, 11.11.2022.-  No marco da súa política de Responsabilidade Social Corporativa, a CRTVG únese un ano máis a UNICEF na XII Semana coa Infancia, que se desenvolverá desde o luns 14 ata o domingo 20 de novembro.

Ao longo de toda a semana, os programas informativos da TVG e da Radio Galega ‘Telexornal Mediodía’, ‘Telexornal Serán’, ‘Bos Días’, ‘A Revista’, ‘Galicia Noticias’ ‘Galicia por Diante’, ‘A Bóla Extra’, ‘A Tarde’, ‘A Crónica’, ‘Convivir’, ou mesmo o espazo ‘#DígochoEu’ colaborarán emitindo contidos e entrevistas relacionados co impacto das Tecnoloxías da Relación, a Información e a Comunicación (TRIC) na saúde mental da adolescencia; a educación en dereitos e a figura do coordinador de benestar e protección nos centros educativos; a privación material infantil e o impacto dos Presupostos Xerais do Estado na infancia ou como exercen os rapaces e rapazas o dereito á participación no X Foro de Participación Infantil e Adolescente no Parlamento de Galicia.

Así, o ‘Bos días’ do luns contará con Myriam Garabito, presidenta de UNICEF Galicia, o do venres con Gabriel González-Bueno, especialista en políticas de infancia de UNICEF España, e o sábado con Óscar Belmonte, de UNICEF Educación. ‘A revista’ emitirá o xoves unha entrevista en directo con Blanca Carazo, responsable de programas de UNICEF España, e ao longo da semana darase conta do X Foro de Participación Infantil e Adolescente no Parlamento de Galicia e visitarase un colexio de Poio (Pontevedra) recoñecido como referente na educación en dereitos.

Xa o domingo 20 de novembro, Día Mundial da Infancia, a CRTVG promoverá que a infancia e a adolescencia teñan voz, polo que se convidará nenos e nenas de varios municipios de Galicia a converterse, durante uns minutos, en xornalistas. Os máis pequenos serán os protagonistas do programa cultural ‘ZigZag’, compartindo tarefas de presentación con María Solar.

Un ano máis, ‘Luar’ ofrecerá, o venres 18, unha edición especial en que se coñecerá o labor de UNICEF para paliar o grave aumento da desnutrición derivado da inflación, a seca e o conflito de Ucraína ou como a organización promove a nutrición, a saúde e o dereito á auga, á hixiene e ao saneamento da infancia máis vulnerable.

Na Radio Galega, entre outros contidos, o ‘Galicia en Goles’ do domingo 20 dará de novo voz á infancia. Julia, 9 anos, de Redondela, entrevistará, xunto ao xornalista Tony López García, a Susana Rodríguez Gacio, médica e campioa paralímpica de tríatlon. A estas accións cómpre engadir a colaboración do portal web e as redes sociais da CRTVG, que apoiarán a campaña co cancelo #SemanacoaInfancia e visibilizarán a importancia de promover os dereitos da infancia recollendo as entrevistas, noticias e reportaxes nunha canle temática en www.crtvg.gal.

Saúde mental e impacto da guerra

    Este ano, UNICEF pon o foco na saúde mental da infancia e a adolescencia. Achegaranse os datos de acoso escolar e ciberacoso, en Galicia e en España, e como inflúen nos niveis de benestar emocional, integración social e satisfacción coa vida dos nenos e nenas que os sofren. Outra das temáticas será tratar como previr e actuar ante casos de violencia desde o ámbito educativo. Farase fincapé na importancia da implantación da figura do coordinador de benestar e protección nos centros educativos, tal e como establece a Lei Orgánica de Protección Integral á Infancia e á Adolescencia fronte á Violencia (LOPIVI). Analizarase tamén o impacto da guerra de Ucraína, a seca e a inflación, que deron como resultado un grave aumento da desnutrición no Corno de África, en países como Somalia ou Sudán do Sur, ou o aumento da pobreza na Federación Rusa, Romanía e a propia Ucraína.

A audiencia poderá colaborar con UNICEF mediante o envío de SMS solidarias coa palabra AXUDA ao 28028. Co custo dunha mensaxe, 1,2 €, UNICEF poderá proporcionar tratamento durante un día a un neno con desnutrición aguda grave. Tamén poderá promover os dereitos da infancia na páxina unicef.es. Con 10 euros ao mes durante un ano, UNICEF pode dar tratamento durante un día contra a desnutrición a 100 nenos.

IMPORTE DO SERVIZO DE SMS 1,2 € ÍNTEGROS PARA UNICEF. Movistar, Vodafone, Orange, Amena, Euskaltel e Yoigo. Operado por UNICEF. N.atn.clte: 900 907 500, Información legal e protección de datos: www.unicef.es

ler máis

TVG lidera cun 16,3%, a cota máis alta desde 2020

04/11/2022

O ‘Telexornal Mediodía’ acadou este xoves o 24 % e o informativo de proximidade ‘Galicia Noticias’ chega ao 29 % de cota de pantalla

‘Land Rober Tunai Show’ rexistrou unha cota do 21,8 %, sendo o programa de maior audiencia da TVG en toda a xornada

A Galega acada a cota máis alta do día dos últimos 28 meses

TVG lidera cun 16,3%, a cota máis alta desde 2020

Santiago, 04.11.2022.-     Televisión de Galicia foi a canle líder de audiencia en Galicia este xoves, nunha xornada en que tanto os informativos como o entretemento do prime time lograron o respaldo masivo da audiencia en Galicia.

A franxa informativa do mediodía, entre as 13:30 e as 15:30 horas, co ‘Galicia Noticias’ seguido do ‘Telexornal Mediodía’, foi amplamente a máis seguida polo público e obtivo unha cota de pantalla do 24,6 %, superando o competidor máis próximo en 7,3 puntos. Dentro desa franxa están os informativos ‘Galicia Noticias’, que acadou un 29 % de cota, con picos do 31 %, e o ‘Telexornal Mediodía’ que alcanzou un 24,2 %, con 160.000 galegos diante dos seus receptores.

A proposta do prime time con ‘Land Rober Tunai Show’ logrou unha cota do 21,8 %, sendo o programa de maior audiencia da TVG en toda a xornada. Durante a súa emisión, a Televisión de Galicia acadou 6,7 puntos máis que Antena 3 (cunha cota do 15 %).

Despois de pechar o mellor mes de outubro desde 2013, cun 10,7 % de cota de pantalla, mes no que foi a canle pública máis vista de Galicia, a Galega acumula tres meses seguidos á alza en canto a audiencias, destacando tamén como un dos motores do grupo de FORTA. Na xornada de onte a TVG bateu o récord de audiencia nun día dos últimos 28 meses,  o anterior rexistro, de 16,3 %, data de xullo de 2020.

ler máis