CRTVG

Buscar

CRTVG Viva

Novas RG

O programa 'Ao Contraataque' da Radio Galega celebra este martes a súa emisión número 1.000

03/10/2022

O espazo dirixido por Pedro Pablo Alonso, en antena desde setembro de 2018, ampliou esta temporada a súa duración a dúas horas e incorporou novos colaboradores e seccións

O programa 'Ao Contraataque' da Radio Galega celebra este martes a súa emisión número 1.000

Santiago, 03.10.2022.-    O equipo deportivo da Radio Galega está este martes de celebración. O programa ‘Ao Contraataque’, que dirixe Pedro Pablo Alonso, chega ao programa número 1.000. Todo comezou en setembro de 2018 e, catro anos despois, a aposta nocturna da emisora autonómica ten unha audiencia consolidada. Mesmo esta temporada ampliou o horario ata as 01.00 h, pasando dunha a dúas horas de emisión, de luns a xoves. Ademais, o domingo o programa inclúese no ‘Galicia en Goles’, con dúas horas dedicadas á análise e á reflexión tras a xornada da fin de semana.

Desde as 23.00 h, o ‘Ao Contraataque’ deste martes abrirá unha gran mesa de debate cos analistas habituais e traerá algún convidado sorpresa aos estudios centrais en San Marcos, no estudio multimedia desde o que se fai a primeira hora, que, ademais de chegar aos oíntes pola FM, se pode ver no Mira RG e na canle da Radio Galega en YouTube.

Durante os últimos catro anos, o programa viaxou por toda Galicia con emisións cara ao público desde as sedes do Celta de Vigo, do Club Deportivo Lugo e do Deportivo da Coruña. Foi o único medio que realizou unha entrevista persoal en profundidade dunha hora de duración ao adestrador Chacho Coudet, ademais de estar presente nas concentracións das seleccións españolas cos internacionais Iago Aspas e Lucas Vázquez. ‘Ao Contraataque’ tamén seguiu os deportistas galegos que competiron en Toquio no ano 2021 e todos pasaron polos seus micrófonos, tanto antes como despois dos Xogos Olímpicos.

Esta temporada, coa ampliación a dúas horas, o programa incorporou novos colaboradores, con seccións enfocadas ao público máis novo e con maior participación dos oíntes a través das redes sociais e o WhatsApp.

ler máis

Intenso outono para 'Diario cultural', con programas especiais desde os festivais de cine de Ourense e Santiago e o de teatro de Carballo

26/09/2022

O programa da Radio Galega leva este martes os seus micrófonos ao OUFF e o día 7 de outubro estará no FIOT, unha das citas máis importantes das artes escénicas

'Diario cultural zeta', a versión deste espazo para a xente nova, achegarase o 5 de outubro ao certame compostelán Curtocircuíto

Intenso outono para 'Diario cultural', con programas especiais desde os festivais de cine de Ourense e Santiago e o de teatro de Carballo

Santiago, 26.09.2022.-    O espazo da Radio Galega 'Diario cultural' afronta durante os vindeiros días unha intensa axenda en exteriores, co obxectivo de dar conta da ampla oferta cultural do outono en toda Galicia e con especial atención aos eventos de cine e teatro.

Así, o programa ofrecerase este martes desde o OUFF, a XXVII edición do Festival Internacional de Cine de Ourense. Desde a cidade das Burgas, 'Diario cultural', que se emitirá de 17:00 a 18:00 h, presentado por Belén Regueira e Vituco Neira, contará coa presenza de distintos convidados para dar conta de toda a actualidade do certame e do seu programa de proxeccións e actividades. Así, o programa falará, entre outros, con Pepe Coira sobre a  reconstrución que está facendo de 'Canto de emigración' (1934), o desaparecido filme de Antonio Román, e coa  actriz do filme 'O corpo aberto' Elena Seijo.

Xa a semana que vén, o martes 5 de outubro, os micrófonos da Radio Galega trasladaranse a Santiago para estaren presentes na 19ª edición do Festival Curtocircuíto. Desde alí realizarase unha nova edición de 'Diario cultural zeta', a versión do programa dirixida á xuventude, presentada por Lucía Junquera, que se emitirá na fin de semana e que se lanzará tamén en RadioGalegaPodcast.gal.

E o 7 de outubro, o 'Diario cultural' acudirá á 31ª edición do FIOT, o Festival Internacional Outono de Teatro de Carballo, que ofrece un programa comprometido coas artes escénicas e cos proxectos de máis prestixio do teatro actual. Baixo a batuta de Belén Regueira e Vituco Neira, este programa especial ofrecerase de 17:00 a 18:00 h e contará coa presenza dos membros de Mofa e Befa, compañía que celebra alí o seu 30º aniversario estreando a obra 'Pirolíticos'.

ler máis

Nova temporada de Radio Galega Música, coa estrea de 'A lista negra', presentado por Eduardo Herrero, e co regreso dos seus programas de autor

12/09/2022

Cada domingo, ás 22.00 h, ‘A lista negra’, que tamén estará dispoñible en RadioGalegaPodcast, achegará as novas tendencias e os grandes clásicos do blues americano

Volven veteranos como ‘Tres peixes voando’ e ‘Lume na palleira’, ademais de ‘Raizame’, ‘O lobo urbano’, ‘Cara B’, ‘Ondas indies’ e ‘Concerto popular’

Nova temporada de Radio Galega Música, coa estrea de 'A lista negra', presentado por Eduardo Herrero, e co regreso dos seus programas de autor

Santiago, 12.09.2022.-    Radio Galega Música estrea este luns unha nova temporada, recuperando os seus programas temáticos de autor, a modo de escaparate para as distintas tendencias e estilos, sempre con óptica e ollada galega. Estes espazos consolidan un formato musical que busca acompañar os seus oíntes con ritmo e sen estridencias, cunha radiofórmula enfocada ás preferencias do público galego, que ofrece unha coidada selección dos grandes éxitos de todos os tempos e das cancións favoritas dos galegos na actualidade.

A gran novidade da temporada é ‘A lista negra’, un programa presentado polo xornalista da CRTVG Eduardo Herrero, que cada domingo ás 22:00 h ofrecerá unha aproximación ao mellor da música americana, dando conta das novas tendencias e sen perder de vista os grandes clásicos do blues.

O blues é a máis negra de todas as músicas. Nel mestúranse os cantos de traballo afroamericanos, a propia tradición do continente de orixe dos que chegaron a América como escravos e compoñentes do gospel, a música espiritual que xermolou nos Estados Unidos. Cada programa de ‘A lista negra’ estará dedicado a un dos grandes deste xénero, desde Howlin’ Wolf a John Lee Hooker, desde Robert Johnson a John Mayall, que  axudarán a ir coñecendo os distintos subxéneros desta música: o blues do Delta, o blues de Chicago, o blues texano, o country blues, o blues rock, o blues de Nova Orleáns, o blues británico...

Ademais, neste novo programa tamén haberá sitio para o blues galego. Cada semana, un solista ou banda poderán presentar o seu xeito particular de sentir e achegarse ao blues desde a nosa terra. Un bo escaparate para artistas que non teñen tanta visibilidade como os que se decantan por xéneros máis comerciais. Cada edición de ‘A lista negra’ estará dispoñible na plataforma RadioGalegaPodcast, onde os oíntes poden atopar tamén outros moitos contidos da emisora pública.

Regreso de programas veteranos

A partir desta semana tamén volven a Radio Galega Música programas veteranos como ‘Tres peixes voando’, unha fiestra aberta ás músicas do mundo, da man de Xavier Díaz e Guillerme Fernández, os domingos na sobremesa (15.00 h). Ese mesmo día volve tamén Emilio Españadero co seu ‘Lume na palleira’, programa especializado na música folk e tradicional, pero con atención ás propostas chegadas doutros lugares, que se poderá escoitar a partir das 19:00 h.

ler máis

Máis humor, máis información, todo o deporte e novas voces na cultura na temporada 22-23 da Radio Galega

04/09/2022

Os humoristas Marcos Pereiro e Pepe Capelán estréanse na ‘A bóla extra’ e ‘A tarde’, o ‘Diario cultural’ renova a súa nómina de colaboradores e o ‘Galicia por diante’ incorpora novas firmas de opinión

O programa deportivo ‘Ao contraataque’ amplía a súa duración e ‘A tarde’ adianta unha hora o seu inicio

 

Máis humor, máis información, todo o deporte e novas voces na cultura na temporada 22-23 da Radio Galega

Santiago, 02.09.2022.-   A Radio Galega comeza este luns a temporada 22-23 con moitas novidades, novos colaboradores no eido cultural, con máis información multiplataforma, con máis entretemento, máis deportes... 

ler máis

As dúas ficcións gañadoras do certame 'Escoitamos teatro', dispoñibles en RadioGalegaPodcast.gal

25/08/2022

Un destacado elenco artístico levou a cabo as dramatizacións radiofónicas íntegras de ‘Malcriada’ (Esther Carrodeguas) e de ‘Historia dunha descoñecida’ (Raúl Dans)
 
A Radio Galega será entidade colaboradora da segunda edición do concurso, cuxo prazo de presentación de obras rematou a finais de xullo

O proxecto podcast da Radio Galega segue crecendo con novos contidos, dispoñibl

As dúas ficcións gañadoras do certame 'Escoitamos teatro', dispoñibles en RadioGalegaPodcast.gal

Santiago, 25.8.2022.-  RadioGalegaPodcast.gal acaba de incluír no seu catálogo de podcasts as dúas ficcións gañadoras da primeira edición do certame ‘Escoitamos teatro’, promovido pola SGAE. Trátase das dramatizacións radiofónicas íntegras de textos de Esther Carrodeguas, ‘Malcriada’, e Raúl Dans, ‘Historia dunha descoñecida’. Para a realización dos podcasts, ambas obras contaron coa participación de importantes directores e intérpretes, así como unha luxosa produción sonora.

Coa adaptación e dirección de Esther Carrodeguas, a criada de Malcriada está interpretada pola actriz Belén Constenla. Malcriada pola sociedade, pola vida e polos homes e mulleres que se aproveitaron dela, é a historia dunha vida que, se cadra, non é só a súa, senón a de moitas persoas.

Pola súa parte, a dramatización da ficción de Raúl Dans realizouse baixo a dirección de Chema Gagino e contou no elenco con Chelo Díaz, Luís Iglesia e Maxo Barjas. Pola súa parte, Gerardo Amigo é o responsable da produción e ambientación sonora das dúas obras premiadas. Historia dunha descoñecida trata do que lle acontece a Adela, unha muller que leva aparentemente unha vida plena. De súpeto, unha descoñecida preséntase na súa casa da praia para contarlle o segredo sobre o que se fundamenta todo o seu mundo.

‘Escoitamos teatro’ é unha actividade da Fundación SGAE que, coa colaboración da Radio Galega, busca promover a creación teatral en galego. A emisora pública galega será entidade colaboradora na súa segunda edición, cuxo prazo de presentación de obras rematou a finais de xullo.

Deste xeito, a Radio Galega segue consolidando o proxecto podcast radiogalegapodcast.gal, nado a finais de 2021, coa suma de novos contidos e podcasts nativos dixitais á marxe dos patróns horarios da radio e coa vontade de alcanzar diferentes públicos niño. Así, ao pioneiro ‘Superando a ficción’, que vai pola segunda tempada, uníronse outros 43 podcasts como, entre outros, ‘A fin do mundo’, ‘Como que non?’, ‘Estudio 3. Desclasificados’, ‘Moito ollo’, ‘Hey, ho, let’s go!’ e ‘Os pobres si que choran’. A plataforma está tamén dispoñible en Spotify e en iTunes, co que se sitúa nos novos espazos de consumo da audiencia.


ler máis

O Celta-Real Madrid protagoniza o ‘Galicia en goles’ na noite do sábado

18/08/2022

O domingo, a Radio Galega retransmite o Tenerife-Lugo e o Deportivo-Bergantiños

O Celta-Real Madrid protagoniza o ‘Galicia en goles’ na noite do sábado

Santiago, 18.8.2022.-  A segunda xornada da Liga de Fútbol Profesional comeza o sábado para os nosos equipos co partido máis atractivo do calendario, o Celta-Real Madrid. ‘Galicia en goles’ ampliará a emisión ata a 1 da madrugada para ofrecer todas as opinións dos protagonistas, na sala de prensa e na zona mixta.

O Celta chega a este encontro tras deixar escapar a vitoria o sábado pasado ante o Español no tempo de prolongación. Mentres, o cadro branco comezou sumando tres puntos na súa visita a Almería, aínda que necesitou remontar o resultado na segunda parte.

‘Galicia en goles’ principiará o sábado ás 6 da tarde para contar desde A Malata o Rácing de Ferrol-S. D. Compostela, cunha nova edición do trofeo Concepción Arenal en xogo. Para o equipo departamental é o último amigable antes de debutar na Liga o próximo sábado 27 en Majadahonda. Mentres, o cadro santiagués aínda ten dúas semanas por diante para o inicio do campionato a primeira fin de semana de setembro.

Xa o domingo, desde as 6 da tarde, a atención estará posta primeiro en Arteixo. Alí, o Deportivo da Coruña pecha a pretemporada diante do Bergantiños de Carballo. Outro dos puntos de referencia estará no campo municipal da Estrada, onde se disputa unha das semifinais da Copa Federación entre o equipo local e o Arenteiro. Pola noite, ás 10, tomará o mando o fútbol de Segunda coa retransmisión do Tenerife-Lugo no Heliodoro Rodríguez López. Os dous equipos non sumaron na primeira xornada, sufrindo cadansúa derrota pola mínima.

Durante a fin de semana, ‘Galicia en goles’ ofrecerá edicións informativas ás dúas e cuarto da tarde, coa análise dos principais eventos da xornada. Ao seu remate, ás 3, chegarán os mellores momentos de ‘Convivir deportivo’ na temporada pasada.

ler máis

O festival As Nosas Músicas premia o espazo de Radio Galega Música 'Lume na palleira'

15/08/2022

Emilio Españadero, director e presentador do programa, recolleu o premio en Couso (A Estrada) o domingo  

‘Lume na palleira’ cumpre 26 anos de emisión na Radio Galega e tres décadas de historia

O festival As Nosas Músicas premia o espazo de Radio Galega Música 'Lume na palleira'

Santiago, 15.08.2022.-  O director e presentador do programa ‘Lume na palleira’ da Radio Galega Música, Emilio Españadero, recolleu este domingo o Premio As Nosas Músicas, concedido polo festival do mesmo nome que se celebrou na Estrada a fin de semana. O premio recoñece o traballo realizado en defensa e difusión da música folk de Galicia por este espazo da emisora pública, que este ano cumpre 26 de emisión na Radio Galega e tres décadas de historia.

‘Lume na palleira’, que se emite os domingos ás 17.00 h en Radio Galega Música, é un programa especializado na música folk e tradicional, principalmente a propia de Galicia pero con atención puntual ás propostas chegadas doutros lugares. A dinámica do programa inclúe música en directo, entrevistas, presentacións de discos, información de concertos e festivais e, sempre que é posible, o contacto directo cos oíntes a través do teléfono e de Internet.

O festival As Nosas Músicas naceu en 1996 co obxectivo de homenaxear a música tradicional galega e de ofrecer unha alternativa aos eventos animados por orquestras.


ler máis

A Radio Galega retransmite este sábado o trofeo Quinocho entre o Celta de Vigo e o Al-Shabab de Arabia Saudita

04/08/2022

Desde as seis da tarde, esta edición especial do ‘Galicia en Goles’ tamén contará os amigables Lugo-Rácing, Depor-Castilla e Celta B-Pontevedra

A Radio Galega retransmite este sábado o trofeo Quinocho entre o Celta de Vigo e o Al-Shabab de Arabia Saudita

Santiago, 4.8.2022.-  A unha semana para o comezo da Primeira División Profesional, o programa deportivo da Radio Galega contará desde Balaídos a disputa do Memorial Quinocho entre o Celta de Vigo e o Al-Shabab de Arabia Saudita. Este será o único encontro do cadro olívico ante a súa afección na pretemporada.

Durante a tarde tamén terá protagonismo o último amigable do Club Deportivo Lugo, antes de principiar na Segunda División Profesional. O rival será o Rácing de Ferrol, un dos candidatos a pelexar polo ascenso desde a Primeira RFEF. Tamén ten encontro de preparación o Deportivo da Coruña, ante o filial do Real Madrid, o Castilla.

A xornada futbolística complétase co enfrontamento entre dous veciños que compartirán este curso categoría na Primeira RFEF, o filial do Celta e o Pontevedra, acabado de ascender.

Cando remate de rodar o balón, o ‘Galicia en Goles’ dedicará a última hora de emisión ao proxecto #GaliciaEnXogo, coa información do motor e o seguimento aos deportistas galegos que aspiran a competir en París 2024.

Na fin de semana, os oíntes da Radio Galega teñen outras citas co deporte, coas edicións informativas das dúas e cuarto da tarde e o domingo a última hora, ás oito da tarde. Mentres, continúan as redifusións de ‘Convivir Deportivo’, ás tres da tarde, e o domingo, ás once da noite, chegará o resumo semanal de ‘Ao Contraataque’.

A partir do sábado 13, o ‘Galicia en Goles’ recupera o formato de retransmisións da Liga cunha ampla edición de catro da tarde a doce da noite, centrada na estrea do Celta ante o Español en Balaídos.


ler máis

'A tarde' aposta polo humor este mes de agosto, coa fichaxe de Pepo Suevos e Lucía Veiga

03/08/2022

O magazine da Radio Galega, presentado polo xornalista Carlos Reboreda, afástase dos contidos da estrita actualidade para vivir un verán do máis divertido ao carón dos seus oíntes

'A tarde' aposta polo humor este mes de agosto, coa fichaxe de Pepo Suevos e Lucía Veiga

Santiago, 3.8.2022.-  O programa ‘A tarde’ da Radio Galega non só non pecha por vacacións en agosto, senón que fará que os oíntes pasen un verán inesquecible, na compaña do mellor humor ‘made in Galicia’ e coa incorporación como colaboradores dunhas recoñecidas figuras da comedia: Pepo Suevos e Lucía Veiga e Marita Martínez, dúo artístico que dá vida ás Hermanas Izquierdo.

O magazine das tardes da emisora pública que, de luns a venres (16.00-19.00 horas), adoita nutrirse de contidos ao fío da actualidade, converterase este mes nun espazo en que primará a diversión e a troula, co xornalista Carlos Reboreda como mestre de cerimonias. A improvisación, a retranca e a comicidade serán os ingredientes principais que empreguen en cada unha das súas intervencións os novos colaboradores.

Así, o coñecido artista ferrolán Pepo Suevos fará gala da súa capacidade creativa para meterse na pel de hilarantes personaxes, realizar entrevistas a artistas moi populares ou achegar festas e efemérides do máis curiosas. Pola súa parte, as Hermanas Izquierdo desenvolverán con moita comicidade as seccións ‘Condenado verán’, onde ironizarán sobre as situacións insoportables que supón o estío para a xente que non ten vacacións, e ‘Aqueles marabillosos veráns’, con entrevistas a recoñecidos personaxes galegos.

Ademais destas novas fichaxes, ‘A tarde’ conta tamén este mes coas achegas dos seus colaboradores habituais: o experto en tecnoloxía Marcus Fernández, a bióloga Xiana Albor, Manuel de Lorenzo e as súas curiosidades e historias alucinantes, o doutor Luis Prieto para descubrir os mecanismos neurolóxicos, clínicos e eléctricos do amor, Carlos Fernández mergullará a audiencia na natureza galega máis máxica, e Moncho Lemos levará a cabo un desafío musical xeracional arredor das mellores cancións do verán.


ler máis

A Radio Galega entrevista a Valentín González Formoso, Ana Pontón e Paula Prado no peche do curso parlamentario

19/07/2022

Os tres falarán nos micrófonos do ‘Galicia por Diante’ de mércores a venres, ás 08.10 h

As entrevistas serán desde o estudio multimedia da RG e poderán seguirse tamén pola canle dixital G24.gal

A Radio Galega entrevista a Valentín González Formoso, Ana Pontón e Paula Prado no peche do curso parlamentario

Santiago, 19.07.2022.-   Líderes dos partidos políticos de Galicia visitarán esta semana o estudio multimedia da Radio Galega nas vésperas do Día de Galicia e coincidindo co peche de curso parlamentario. Serán tres entrevistas no ‘Galicia por Diante’ da emisora pública (08.10 h), conducidas polo xornalista Manuel Estévez.

A primeira entrevista realizarase este mércores ao secretario xeral do PSdeG, Valentín González Formoso; o xoves será a quenda da voceira nacional do BNG, Ana Pontón; e o venres será Paula Prado, secretaria xeral do PPdeG, quen interveña no ‘Galicia por Diante’ da emisora pública. Con eles analizaranse as claves económicas, sociais e políticas do momento, ás portas dun novo curso político marcado polas vindeiras eleccións municipais.

As entrevistas poderán seguirse tamén pola canle dixital G24.gal e as súas respectivas redes sociais en Facebook e YouTube.

ler máis