CRTVG

Buscar

CRTVG Viva

Novas RG

Sevilla-Celta, Xirona-Lugo e Dux-Dépor protagonizan o fútbol no ‘Galicia en goles’

20/01/2022

O domingo remata co derbi Obradoiro-Breogán

Sevilla-Celta, Xirona-Lugo e Dux-Dépor protagonizan o fútbol no ‘Galicia en goles’

Santiago, 20.01.2022.- O ‘Galicia en goles’ da fin de semana comeza na noite do venres coa análise de todos os partidos destacados que retransmitirá o equipo de Deportes da Radio Galega desde a tarde do sábado ata a noite do domingo. Paco Santos conduce o programa ata as 12 da noite, ofrecendo as últimas conferencias de prensa dos adestradores e entrevistando xogadores que van participar na xornada.

O sábado, desde as 3, o protagonismo será para o Sevilla-Celta, desde o estadio Sánchez Pizjuán. Tras derrotar a Osasuna o mércores pasado, o equipo vigués visita o segundo clasificado, que acaba de empatar en Valencia. Ademais, haberá conexións co fútbol da Primeira RFEF, Sanse-Celta B, e Segunda RFEF, co derbi Bergantiños-Arousa. Ás 11 da noite, a información do motor chegará ao ‘Galicia en goles’ na sección ‘Gas a fondo’, mentres ás once e media Toni López informará da actualidade olímpica dentro do espazo ‘Galicia en París’.

Xa o domingo, desde as doce menos cuarto, a edición matinal contará o Dux Internacional de Madrid-Deportivo da Coruña, desde Villaviciosa de Odón. A partir das 3, o Xirona-Lugo, da Segunda División Profesional, e o Rácing de Ferrol-UD Logroñés, da Primeira RFEF, centrarán a sesión de tarde, xunto ao derbi da Segunda RFEF entre o Compostela e o Pontevedra e a xornada da Terceira RFEF. A partir das 8 da noite, o baloncesto tomará o mando co derbi da ACB entre o Obradoiro e o Breogán. No Sar, o equipo de Lugo pode certificar a clasificación para a Copa do Rei, mentres os locais necesitan a vitoria para escapar da zona perigosa da clasificación.

ler máis

A Radio Galega retransmite o mércores o Celta-Osasuna e o Lugo-Almería por FM

18/01/2022

O Breogán-Baskonia, íntegro por g24.gal/deportes

A Radio Galega retransmite o mércores o Celta-Osasuna e o Lugo-Almería por FM

Santiago, 18.01.2022.- Este mércores a Radio Galega programa unha edición especial de 'Galicia en goles', con protagonismo para as ligas profesionais de fútbol e baloncesto.

Desde as sete menos cuarto da tarde, Paco Santos conduce as retransmisións do Celta-Osasuna, desde Balaídos, e do Lugo-Almería, desde o Anxo Carro. O programa tamén estará presente no Breogán-Baskonia e no Manresa-Obradoiro, da ACB, pero os que prefiran as canastras teñen a opción de escoitar íntegra a retransmisión do encontro do Pazo de Lugo a través de g24.gal/deportes.

Esta xornada entre semana chega nun momento chave para o Celta, que recibe a un rival directo para garantir canto antes a permanencia. Dous puntos separan aos dous equipos na clasificación e o que gañe sairá reforzado para asentarse na zona tranquila.

O Lugo, mentres, recibe ao líder da Segunda, pero coa seguridade que dá ter un colchón de seis puntos sobre a zona de descenso e cun partido menos que os seus principais rivais.

No baloncesto, o Breogán mídese cun dos conxuntos españois da Euroliga, pero que na competición nacional non está a pleno rendemento. Pode ser un partido histórico, xa que, de gañar o equipo de Lugo, conseguiría praza para a próxima Copa do Rei. Pola sua banda, o Obradoiro visita o Nou Congost para buscar ante o Manresa unha melloría na clasificación.

Ao remate do 'Galicia en goles', a audiencia da Radio Galega poderá escoitar os protagonistas dos catro partidos desde as once da noite no programa 'Ao contraataque'.


ler máis

A RG comeza o ano levando ás ondas o podcast 'Superando a ficción' e co regreso do programa de música en directo 'Estudio 3'

13/01/2022

Os sábados 15, 22 e 29 de xaneiro, os oíntes poderán escoitar todos os capítulos do primeiro podcast nativo dixital da emisora pública, en que a xornalista Cristina García conta unha historia real que parece o argumento dunha obra de ficción

Tras a parada pola pandemia, o espazo presentado por Ricardo Alonso, que fai 25 anos, volve o luns para seguir levando os micrófonos de Radio Galega Música aos festivais e salas de concertos

A RG comeza o ano levando ás ondas o podcast 'Superando a ficción' e co regreso do programa de música en directo 'Estudio 3'

Santiago, 13.01.2022.-    A Radio Galega arranca o ano con novidades. A primeira delas chegará este mesmo sábado, 15 de xaneiro, cando comeza a emisión de ‘Superando a ficción’, o primeiro podcast nativo dixital da emisora pública, da xornalista Cristina García, coordinadora de programas da RG e condutora habitual do espazo ‘A Bóla Extra’. E o luns 17 regresa a Radio Galega Música o programa ‘Estudio 3’, presentado por Ricardo Alonso, que, tras a parada pola pandemia, volverá levar os micrófonos da RG aos festivais e ás salas de concertos.

RadioGalegaPodcast.gal, plataforma coa que a radio pública se adapta aos novos modelos de consumo da audiencia, lanzou o pasado mes de novembro ‘Superando a ficción’, un podcast feito por e para o medio dixital, á marxe dos patróns horarios propios da radio. Os oíntes da Radio Galega poderán achegarse a esta proposta este sábado e os dous seguintes (22 e 29 de xaneiro). De 12.00 a 13.00 h, ofreceranse os seis capítulos da primeira temporada, en que Cristina García conta unha historia real que, de non saber que sucedeu, parecería o argumento dunha obra de ficción. De feito, moitas destas historias acabaron sendo levadas á gran pantalla.

Na emisión deste sábado, os oíntes achegaranse á historia de amor de Ingrid Bergman e Roberto Rosellini, un romance que escandalizou o Hollywood da época, e coñecerán a orixe dos grandes almacéns en España nunha viaxe que os levará ata a Cuba revolucionaria.

Dous días despois, o vindeiro luns, chegará un momento sen dúbida agardado polos amantes da música en directo: o regreso a Radio Galega Música de ‘Estudio 3’, programa que se ofrecerá de luns a venres de 23.00 a 00.00 h e que volverá interactuar cos artistas nos seus concertos e presentacións. Os festivais e as salas galegas, sempre que a situación sanitaria o permita, volverán ser o escenario natural do espazo presentado por Ricardo Alonso.

Ademais, nesta temporada ‘Estudio 3’ celebra os seus 25 anos en antena, un tempo durante o que pasaron polo programa unha morea de artistas galegos, nacionais e internacionais de primeiro nivel, desde Lenny Kravitz, Elliott Murphy e Jamiroquai ata Loquillo, Joaquín Sabina e Radio Futura, pasando por Siniestro Total, Los Piratas e Xoel López, entre outras moitas figuras da música.

ler máis

A Radio Galega retransmite o mércores o Atlético Baleares-Celta, da Copa do Rei

03/01/2022

Desde as oito menos cuarto da tarde, especial 'Galicia en Goles'

A Radio Galega retransmite o mércores o Atlético Baleares-Celta, da Copa do Rei

Santiago, 03.01.2022.- Van rematando as festas e o calendario futbolístico aprétase. Tras reanudar a Liga o domingo pasado, o Celta apenas ten tempo para preparar o próximo compromiso, de novo fóra de Balaídos. O mércores, ás oito do serán, visita o Atlético Baleares, no partido da eliminatoria de dezaséisavos de final da Copa do Rei. A Radio Galega comezará a emisión do 'Galicia en Goles' ás oito menos cuarto e prolongarase ata a medianoite.

O equipo de Coudet vén de gañar o Betis no Villamarín e remata a primeira volta da Liga como o terceiro mellor equipo en canto a resultados nos partidos desenvolvidos a domicilio. No torneo da Copa do Rei só participou nunha rolda, ante o Andorra no Estadi Nacional, e solucionou a clasificación despois dunha prórroga.

Roberto Carlos Carballo viaxa ata Palma de Mallorca para contar desde o estadio Balear todo o que suceda sobre o terreo de xogo. Estará acompañado nos comentarios por Jorge Paz, José Valtierra e Moncho Carnero, nun programa que conducirá Toni López García e no que tamén haberá información do resto da xornada copeira.

O Celta rematará a semana de partidos fóra da casa visitando o sábado a Real Sociedade, no campionato de Liga. Será o primeiro encontro da segunda volta, que os oíntes da Radio Galega tamén poderán seguir no 'Galicia en Goles' desde as tres da tarde.

ler máis

O ‘Galicia en Goles’ retransmite o domingo o Betis-Celta e o Sporting de Xixón-Lugo

30/12/2021

Os gañadores das San Silvestre, protagonistas no programa do sábado 1

 

 

O ‘Galicia en Goles’ retransmite o domingo o Betis-Celta e o Sporting de Xixón-Lugo

Santiago, 30.12.2021.- O dous mil vintedous comeza con emocións fortes para o deporte galego. Volve a Liga de Fútbol Profesional tras a paréntese da fin de semana do Nadal.

O sábado, Rodrigo Pérez ponse aos mandos do primeiro 'Galicia en Goles' do 2022. Desde as seis da tarde resumirá cos protagonistas o sucedido o venres nas clásicas San Silvestre, desenvolvidas nas principais cidades galegas e tamén nas vilas máis pequenas, onde pechar o ano correndo tamén é unha tradición. Ata as once da noite, o programa analizará os primeiros partidos da Liga de fútbol programados para o día seguinte. Na última hora do día chegará a actualidade do motor no 'Gas a fondo' e a crónica olímpica, no 'Galicia en París'.

Xa o domingo, a edición matinal comezará ás doce do mediodía e desde as tres da tarde Xoán Galán conduce a sesión de tarde. A atención estará posta no Betis-Celta, desde o Benito Villamarín, e no Sporting-Lugo, no Molinón. Roberto Carlos Carballo viaxa ata Sevilla, mentres Andrés Vieites desprazarase a Xixón. Logo dos partidos, os oíntes poderán escoitar en exclusiva as entrevistas aos futbolistas máis destacados, ademais das roldas de prensa dos adestradores.

Na fin de semana, a audiencia tamén pode escoitar o 'Convivir Deportivo', á unha da tarde, da man de Alfonso Pardo. E o domingo, ás once da noite e unha vez rematada a xornada, Toni López abre a mesa de debate dos especialistas no 'Contraataque'.

A Radio Galega programa para a véspera de Reis outra edición especial de 'Galicia en Goles' desde o estadio Balear. Alí, o Celta afronta unha nova eliminatoria da Copa do Rei. O rival é o potente Atlético Baleares, un dos principais candidatos no grupo segundo da Primera RFEF para ascender á Segunda Profesional. A retransmisión comezará ás oito menos cuarto da tarde.

ler máis

A CRTVG emite este venres a mensaxe de fin de ano do presidente da Xunta de Galicia

30/12/2021

O discurso poderase seguir na TVG (14:15 h) xusto antes do ‘Telexornal mediodía’, e tamén en lingua de signos en redifusión pola G2 (15:30 h) así como na Radio Galega e na web G24.gal

 

A CRTVG emite este venres a mensaxe de fin de ano do presidente da Xunta de Galicia

Santiago, 30.12.2021.-  Este venres, antes do ‘Telexornal mediodía’, ás 14:15 h, Televisión de Galicia emite a xa tradicional mensaxe de fin de ano do presidente da Xunta de Galicia. Nesta ocasión, a mensaxe foi realizada desde o Monte do Gozo, porta de entrada do Camiño de Santiago na cidade do Apóstolo. Poderá seguirse tamén pola Radio Galega e a web G24.gal.

Nesta intervención, ademais de felicitarlles o Nadal e o Aninovo a todos os galegos, Alberto Núñez Feijóo fará balance de 2021, o segundo ano marcado pola pandemia mundial da covid-19, e adiantará proxectos e retos para 2022.

O discurso do presidente galego poderase seguir na canle pública con subtítulos a través das opcións da TDT e tamén en lingua de signos en redifusión pola G2 (15:30 h). Así mesmo, será tamén accesible en G24.gal, o portal da información da Corporación.

ler máis

Ghost beast achega a ‘Galicia emerxe’ a súa proposta elegante, intimista e contemporánea

29/12/2021

A banda está formada por Pachu Doblas, cantante, guitarrista e autor das cancións, e por dous músicos moi coñecidos da escena jazz galega: o batería Iago Fernández e o pinaista Xan Campos

Ghost beast achega a ‘Galicia emerxe’ a súa proposta elegante, intimista e contemporánea

Santiago, 29.12.2021.- Ghost Beast é este último mércores do ano o grupo convidado no ‘Galicia emerxe’ (22.55 h), o ciclo de concertos da G2. O proxecto naceu dun encerro de nove meses, onde o propio illamento persoal inspira e dá lugar a un grupo de cancións que acaban conformando un disco, ‘Winter’s horns’, e, case á vez, unha banda. A temática intimista deste traballo, impregnada da propia experiencia do illamento, dita as tonalidades musicais que predominan no proxecto.

A banda está formada por Pachu Doblas, cantante, guitarrista e autor das cancións, e por dous músicos moi coñecidos da escena jazz galega: o batería Iago Fernández e o pianista Xan Campos.

Musicalmente, Ghost Beast bebe tanto da electrónica coma do art-pop, sempre nas súas versións máis solemnes e fondas. Nas súas melodías, os sintetizadores gáñanlles protagonismo ás guitarras, que non están esquecidas, e os ritmos programados entrelázanse con baterías en arranxos cun son moi contemporáneo. As súas cancións son amplas, minimalistas, evocadoras e envolventes, fuxindo de lugares comúns, das fórmulas predominantes e dos dispositivos efectistas.

En directo, o trío consegue que a súa proposta musical soe ampla e espontánea, cun estilo elegante e cheo de emoción. Sons espaciais dan paso por momentos a partes acústicas e estas, á súa vez, a improvisacións libres próximas ao jazz, onde todo se funde con naturalidade, sen perder o sentido de cada canción.

Cunha duración de 40 minutos, este concerto estará dispoñible na web dos medios públicos galegos unha vez finalizada a súa emisión pola G2 e o sábado poderase ver na TVG (10.40 h), amais de escoitarse tamén en Radio Galega Música (22.00 h). Ademais, os espectadores poderán ver todos os concertos xa emitidos na páxina da CRTVG.

A CRTVG asinou un convenio coa Axencia Galega de Industrias Culturais (Agadic) para difundir o ciclo ‘Galicia emerxe’, conformado por un total de 50 concertos de destacados artistas e grupos galegos, no exercicio do seu papel como servizo público e co afán de apoiar o sector musical e de contribuír a visibilizar o seu traballo.

ler máis

Hoxe, Breogán-Fuenlabrada, desde as 18:45 h na Radio Galega

27/12/2021

O xoves, dobre cita para os equipos galegos da ACB

Hoxe, Breogán-Fuenlabrada, desde as 18:45 h na Radio Galega

Santiago, 27.12.2021.- Os últimos días do 2021 están protagonizados polo baloncesto nas retransmisións deportivas da Radio Galega.

Hoxe, desde as sete menos cuarto da tarde, Toni López dirixe a emisión do partido da Liga ACB entre o Breogán e o Fuenlabrada. Raúl Villares encargarase da narración do xogo desde o Pazo dos Deportes. No descanso e ao final, o programa conectará coa asemblea de accionistas do Club Deportivo Lugo, onde Emilio González irá informando das novidades no peche do exercicio.

O xoves, tamén a partir das sete menos cuarto, a Radio Galega contará unha xornada na que actúan os dous equipos galegos en sesión continua. O primeiro en saltar á pista é o Obradoiro, que visita o Nou Congost para enfrontarse ao Manresa. Logo chegará a quenda do Breogán, que recibe ao Joventut de Badalona. Alfonso Pardo seguirá o xogo dos santiagueses, mentres Raúl Villares estará presente no Pazo. Toni López dirixirá a edición especial, que se prolongará ata a medianoite para escoitar aos protagonistas dos dous encontros.

A seguinte xornada ligueira será xa no 2022, co derbi galego o luns día 3 ás nove da noite, no Sar, onde Obradoiro e Breogán volven coincidir na Liga ACB. Antes, o domingo 2, 'Galicia en Goles' contará a volta da Liga de fútbol profesional cos partidos Betis-Celta e Sporting de Xixón-Lugo.

Durante o Nadal, 'Galicia en Goles' está moi presente na programación da Radio Galega. A pasada fin de semana emitiu dez horas de retransmisións en directo, dando cobertura aos eventos solidarios de fútbol, fútbol sala e balonmán desenvolvidos na Coruña, Ares, Arteixo, Maside, Marín e Pontevedra, ademais do despregamento en Maceda polos campionatos galegos de ciclocrós.

ler máis

A Radio Galega é a emisora que máis medra en España

09/12/2021

Novo dato histórico para o conxunto de emisoras públicas con 256.000 oíntes de luns a venres, segundo o último Estudo Xeral de Medios feito público este xoves

O informe de Barlovento destaca a Radio Galega como a xeneralista que máis crece en todo o país

Radio Galega Música medra ata os 70.000 oíntes e o ‘Diario Cultural’ duplica o seu impacto
 

A Radio Galega é a emisora que máis medra en España

Santiago, 09.12.2021.-   O grupo de emisoras de Radio Galega remata 2021 acadando un novo rexistro histórico de audiencia: 256.000 oíntes de luns a venres, segundo os datos da terceira onda do Estudo Xeral de Medios coñecida este xoves, o que reforza a RG como primeira emisora pública de Galicia.

A Radio Galega é a emisora de radio que máis sobe en audiencia ata alcanzar os 184.000 oíntes de luns a venres, isto supón, segundo os datos do EXM recollidos no informe da consultora de referencia Barlovento, que a Radio Galega “é a emisora xeneralista que máis crece” en toda España, e faino nun contexto de baixada do consumo da radio xeneralista. Radio Galega Música acada os 70.000 oíntes de luns a venres e tamén se posiciona entre as 25 temáticas con máis audiencia de España, e Son Galicia Radio, emisora dixital integramente de música en galego, entra por primeira vez na clasificación, con 2.000 oíntes no conxunto da semana.

O conxunto de programas da canle pública, tanto de entretemento como de informativos  e deportes, medraron nesta última onda do EXM. Tanto o magacine matinal ‘Galicia por Diante’ e  ‘A Tarde’ acadan resultados ao alza neste final de ano, e o espazo ‘Pensando en ti’ segue a ser o líder indiscutible das madrugadas galegas. Tanto nas fins de semana como durante a semana suben os programas deportivos da Radio Galega, liderados unha onda máis polo buque enseña dos deportes, o ‘Galicia en Goles’. No eido da cultura, e na mesma liña de crecemento, o ‘Diario Cultural’ de luns a venres incrementou de novo a súa audiencia e supera xa os 53.000 oíntes.

A Radio Galega amplía o seu servizo

A estes datos de audiencia hai que sumar o despregamento de radiogalegapodcast.gal, o novo servizo dixital da emisora pública, con ducias de espazos entre os que xa hai programas nativos dixitais. Os medios públicos completan así a súa oferta, e posiciónanse nos ámbitos de consumo dos novos oíntes.

ler máis

Semana de Copa por G24.gal/directos e radiogalega.gal

29/11/2021

A Radio Galega transmite por esta plataforma os sete partidos dos nosos equipos

Semana de Copa por G24.gal/directos e radiogalega.gal

Santiago, 29.11.2021.- Os afeccionados ao fútbol poden gozar esta semana de tres intensos días de competición. Desde o martes ata o xoves, a Radio Galega retransmite os partidos dos sete equipos galegos que compiten na primeira eliminatoria da Copa do Rei, que se desenvolve a partido único. Desta volta, a emisión é exclusiva a través de Internet por G24.gal/directos, ademais de radiogalega.gal e a aplicación para o móbil.

O martes, desde as 7 do serán, o protagonismo será para os encontros Victoria da Coruña-Vilarreal, en Riazor; Ebro-Celta de Vigo, na Romareda; e Albacete-Rácing de Ferrol, no Carlos Belmonte.

O mércores, a partir das seis e media, haberá outras tres citas: Bergantiños-Tudelano, nas Eiroas; UCAM Murcia-Deportivo, na Condomina; e Arenteiro-SD Logroñés, no Espiñedo.

Por último, o xoves, desde as 8, o Adarve-Lugo, no Vicente del Bosque de Madrid, completará o calendario dos equipos galegos.

Na FM, a audiencia terá información da competición nos tres espazos deportivos diarios: 'Zona mixta', ás 3 da tarde; ‘A Crónica dos Deportes’, ás oito e media da noite; e 'Ao contraataque', ás 11 da noite.

ler máis