CRTVG

Buscar

CRTVG Viva

A maxia dos Fogos do Apóstolo, esta noite, en directo na Televisión de Galicia

24/07/2021

Loly Gómez e Eduardo Herrero conducirán desde a praza do Obradoiro un programa especial (21.55 h) que conectará cos puntos de Compostela que farán da noite día, ofrecerá actuacións musicais e contará coa participación de rostros moi coñecidos da TVG

A maxia dos Fogos do Apóstolo, esta noite, en directo na Televisión de Galicia

Santiago, 24.07.2021.-    A Televisión de Galicia retransmitirá esta noite os Fogos do Apóstolo nun programa en directo presentado desde a praza do Obradoiro por Loly Gómez e Eduardo Herrero. Os medios públicos abrirán as portas deste grande espectáculo a toda Galicia, nunha retransmisión moi especial en que a noite se fará día no ceo de Santiago de Compostela e que poderán seguir tamén a través da web crtvg.gal.
    
Con motivo da situación sanitaria, os fogos manteranse na liña do pasado ano, con pequenas tiradas simultáneas desde cinco puntos da cidade: o parque Eugenio Granell, o parque Carlomagno, a carballeira de Santa Susana, o Monte Gaiás e As Cancelas. Ademais do punto principal instalado no Obradoiro, onde se vivirá a expectación previa na voz en primeira persoa de peregrinos e composteláns, o programa desprazarase en directo a varios lugares estratéxicos da cidade para ofrecer unhas vistas espectaculares do espectáculo pirotécnico e tentear o ambiente.
 
Neste ano tan especial, marcado polo Xacobeo, ofreceranse comentarios divulgativos arredor da figura do Apóstolo de Santiago, o Mestre Mateo ou a actualidade histórica dos xacobeos, da man de Fernando Madriñán, experto na historia de Santiago. Ademais, algúns dos rostros coñecidos da TVG, como o cociñeiro Xoanqui Ameixeiras, a actriz Eva Iglesias ou as ‘maliciosas’ Noelia Rey e Lucía Iglesias, serán protagonistas de divertidas reportaxes que se emitirán ao longo do programa.
    
A música terá un papel principal no programa, cunha coidada selección de pezas moi representativas da cultura musical galega, en versións feitas con piano, contrabaixo e batería nun ton íntimo e jazzístico, que serán interpretadas por Paco Lodeiro e un espectacular elenco dos mellores cantantes da verbena galega, nunha noite cargada de emocións e sorpresas.