Con Xosé Ramón Gayoso como convidado, 'Xente Marabillosa' pon esta semana o foco na expansión do curandeirismo e as terapias milagre

Santiago, 07.12.2025.-    A Televisión de Galicia ofrece este domingo unha nova entrega de ‘Xente Marabillosa’ (22:00 h), o espazo de entretemento e servizo público que cada semana convida os espectadores a reflexionar, emocionarse e tomar conciencia sobre realidades que afectan a toda a sociedade. O programa presentado por Lucía Rodríguez contará hoxe coa participación especial de Xosé Ramón Gayoso, unha das figuras televisivas máis queridas polo público galego.

A edición desta semana está centrada nun tema tan sorprendente como preocupante: o crecemento dos falsos curandeiros e as terapias milagre, un fenómeno que, lonxe de quedar relegado ao pasado, continúa incrementándose en pleno século XXI.

‘Xente Marabillosa’ abordará como estas prácticas fraudulentas, impulsadas pola expansión dixital e a proliferación das redes sociais, reinventáronse para chegar a un público máis amplo, máis novo e máis vulnerable. As falsas terapias prometen curacións imposibles, utilizando discursos cada vez máis sofisticados, que, en moitos casos, poñen en risco a saúde de persoas enfermas e desesperadas.

A brecha dixital e a facilidade para difundir contidos en Internet abriu unha nova vía de expansión para estes supostos sandadores, que empregan técnicas de persuasión moi elaboradas, mesmo para cuestionar a medicina tradicional. Este tendencia acendeu as alarmas entre expertos sanitarios e organizacións de protección ao consumidor, debido aos graves danos físicos, emocionais e económicos que estas estafas poden ocasionar.

Ao longo do programa, ofreceranse testemuños de persoas afectadas por este tipo de enganos, así como a análise de especialistas que axudarán a identificar os mecanismos de manipulación máis habituais e os sinais de alerta. A presenza de Gayoso, que vivirá xunto ao público as recreacións e casos reais, achegará sensibilidade, experiencia e humanidade a unha temática que pode afectar a calquera persoa.

Como é habitual, esta nova entrega incluirá as xa famosas cámaras ocultas de ‘Xente Marabillosa’, un dos elementos máis característicos e celebrados do formato. Estas recreacións, rodadas con actores e situacións verídicas, permiten amosar a reacción espontánea da cidadanía fronte a inxustizas e condutas rexeitables. A súa capacidade para xerar debate e conciencia social converteu estes contidos nun auténtico fenómeno viral.