CRTVG

Buscar

Diario Cultural

Daniel Caxigueiro expón 'A métrica do ilusionismo' no Museo Provincial de Lugo

20/01/2020 - 17:46 h

Nesta mostra, Caxigueiro revisa algunhas das series máis representativas da súa traxectoria desde o ano 2005 ata a actualidade. Nas súas propias palabras, esta mostra "aínda que pode sorprender, resume á perfección os cambios que se foron dando, dun xeito pausado, sen guión previo, deixando aflorar unicamente as necesidades estéticas e conceptuais de cada momento".

Tras a súa formación no ámbito da cerámica durante a década dos oitenta, este artista de Mondoñedo ampliou os seus intereses coa incorporación de novos materiais, técnicas e ámbitos creativos. A fotografía e a poesía comparten agora mesmo protagonismo coa escultura- instalación feita fundamentalmente en cerámica, aportando novos e enriquecedores matices e conceptos. 

Os intereses de Caxigueiro sempre xiraron arredor a temáticas de índole social que inciden no desenvolvemento do ser humano tanto de xeito individual como colectivo. A defensa das culturas minoritarias, as agresións contra as libertades e o medio natural están entre os seus intereses.