CRTVG

Buscar

Vidal: "Agardamos que a xustiza ordinaria sexa xustiza de verdade"

Publicado o 27/08/2020 21:36

O presidente do Deportivo, Fernando Vidal, dixo este xoves que o club galego espera que "a xustiza ordinaria sexa xustiza de verdade", despois de que a deportiva non servira para que o conxunto branquiazul siga en Segunda División tras non poder disputar en horario unificado a última xornada de LaLiga SmartaBank.

Vidal compareceu nunha conferencia de prensa telemática en que sinalou que o club vai defender "os dereitos" que lle foron "pisados". "No apartado deportivo, non funcionou a xustiza. O noso malestar é importante. Imos seguir todas as vías da xustiza ordinaria, que esperamos que sexa xustiza de verdade", apuntou.

Crítica a xestión do CSD e da Liga

Vidal criticou que "a actitude" do Consello Superior de Deportes "cambiou" desde o seu comunicado do mes de xullo cando criticaba a LaLiga e o Fuenlabrada pola súa viaxe a Galicia con casos de coronavirus no persoal.

"Non sei que pasou desde a súa carta ata hoxe, pero cambiou o seu postulado. Houbo inacción do CSD e a súa presidenta (Irene Lozano) en todo momento", declarou.

O presidente do Deportivo considerou que o CSD "non obrou con xustiza" e propiciou este xoves unha reunión, "coas cartas marcadas", con LaLiga e a Federación Española de Fútbol para abordar o calendario da tempada 2020/21.

"Puido o poder de LaLiga, non sei a cambio de que e imos loitar para que estas situacións cambien no futuro", sinalou.

Tamén criticou o "tratamento vexatorio e manipulado desde a propia Liga" cara ao Deportivo no expediente que arquivou a patronal sobre todo o que rodeou ao desprazamento do Fuenlabrada á cidade galega para o partido que se tivo que aprazar polos casos de COVID-19 do conxunto madrileño.

Do presidente de LaLiga, Javier Tebas, dixo que foi "partidista" e criticou a súa relación co Fuenlabrada, ao que asesora o seu fillo, polo que pediu ao CSD a súa inhabilitación.

"Non podemos tolerar que personaxes deste tipo tutelen o fútbol español", comentou o dirixente deportivista, quen se mostrou "convencido" de que, a pesar de que o Deportivo está en Segunda B, "hoxe é o principio da fin" de Tebas.

Incorporación sorpresa

Ademais, anunciou que o Deportivo vai acometer en Segunda División un "proxecto o máis ambicioso posible para volver ao fútbol profesional". Para lograr ese obxectivo, o club coruñés fará "algunha incorporación sorpresa" nos próximos días porque "non van ser todo malas noticias". 

 

 

Noticias web

27/08/2020