CRTVG

Buscar

Un raio mata oito vacas en Abadín

Publicado o 11/05/2020 14:36

Foi neste prado do monte veciñal de Montouto, en Abadín, onde morreron oito vacas de raza rubia galega alcanzadas por un forte lóstrego. Os animais estaban a pacer, igual que todos os días, libres no monte. A mala fortuna quixo que se desatase unha treboada e que o raio fose atraído pola auga do regato que cruza a parcela. As oito vacas morreron de xeito inmediato mentres que o resto do rabaño, outros 17 exemplares, puideron sobrevivir.

No remate da mala sorte, as reses mortas estaban nun avanzado estado de preñez e ían dar a luz nas vindeiras semanas. Dese xeito, as perdas para os donos da gandería poden ser superiores aos 16.000 euros entre o valor das vacas mortas e o das que estaban por nacer. Polo menos, os seguros agrarios cobren este tipo de sinistros.

O suceso produciuse nun lugar de moi difícil acceso, polo que foi preciso levar as vacas case un quilómetro costa arriba ata o lugar onde podían ser recollidas polo camión dos residuos animais. Un traballo que se prolongou durante horas polo tamaño e peso dos animais e porque só se podía acceder cunha pa de cadeas ao estar o terreo mollado.

Esta é unha zona moi castigada polos ataques de lobos, pero os gandeiros non contaban ter que enfrontarse aos lóstregos, especialmente tendo en conta a cantidade de aeroxeradores e antenas que hai e que deberan actuar de pararraios.

Noticias web

11/05/2020