Preto de trescentos maiores participan este ano no programa Xuntos polo Nadal, que reúne anciáns que viven sós para que pasen estas datas en compañía. E algúns atopan algo máis ca iso.

Bernardina e Juan, de Vigo e Pontevedra, apuntáronse ao programa porque estaban sós polo Nadal, e aquí atoparon compañía e algo máis.

"Esta é a miña compañeira, coñecémonos o ano pasado". "Aquí?" "Si, si", anuncia Juan.

Este ano repiten, pero con outra motivación.

"Para celebrar o aniversario!", celebra Bernardina.

295 persoas participan este ano no programa, que ampliou o número de prazas a raíz da demanda.

"Aquí estamos todos, pasámolo ben, e aquí estaremos o ano que vén", di un dos participantes.

Tamén se ampliou a estancia. Desde o 23 de decembro ata o día despois dos Reis: "Eu vivo soa, levo 20 anos soa. E aquí teño compañía. Non ve que estou con cinco aquí arrimada?".

Os que teñen unha renda baixa, non pagan nada, e os demais, 50 euros. Vai dirixido a maiores de 60 que viven sós, con prioridade para os que teñen máis anos e os de menos ingresos.

"Unha asistenta social que foi á casa díxomo e fíxome os papeis e todo, e aquí estou", explica unha das participantes.

Hoxe visitounos a conselleira, que anunciou que están traballando nun novo plan contra a soidade non desexada.