CRTVG

Buscar

Ata 110 contaxiados arredor da avícola de Cambados, que retoma a actividade

Publicado o 28/09/2020 18:15
Ata 110 contaxiados arredor da avícola de Cambados, que retoma a actividade

Os casos de contaxiados de covid-19 na planta que Avícola de Galicia ten no municipio pontevedrés de Cambados ascenden xa a 110, segundo desvelou este luns o Servizo Galego de Saúde. Ata 78 destes casos detectáronse entre os traballadores, mentres que outros 32 son familiares ou contactos estreitos dos empregados da avícola.

Sanidade asegura que o protocolo preventivo activado por este gromo continúa vixente e que se reforzaron os cribados preventivos para buscar novos casos. Para iso, segundo as autoridades sanitarias, mantense a coordinación e a comunicación "permanente" coa dirección da compañía para controlar a situación.

Sanidade autorizou a Avícola de Galicia a renovar a súa actividade, despois de cesar a súa produción durante dous días para desinfectar as instalacións. Os inspectores da consellería comprobaron que a empresa cumpriu con todas as medidas e protocolos preventivos que se habían pautado para "atallar as cadeas de contaxio", intensificando a limpeza e desinfección da fábrica e das zonas comúns.

Estas medidas sumáronse ás implementadas desde o comezo do gromo, entre elas a redución da produción, a realización de tests rápidos aos traballadores -incluídos os de nova incorporación- ou a subministración de material de protección. 

Noticias web

28/09/2020