CRTVG

Buscar

Sanidade convoca os alcaldes de Vigo, Lugo, Ferrol e Pontevedra ante a evolución da pandemia

Publicado o 29/10/2020 09:45
Sanidade convoca os alcaldes de Vigo, Lugo, Ferrol e Pontevedra ante a evolución da pandemia

A Consellería de Sanidade convocou para este xoves reunións bilaterais cos alcaldes das cidades de Vigo, Lugo, Ferrol e Pontevedra, ante a evolución da pandemia nestes municipios, que se atopan en nivel de alerta 3 pola incidencia e o aumento de contaxios nos últimos 14 días.

Fontes de Sanidade confirmaron a celebración destas reunións telemáticas entre os rexedores e o conselleiro de Sanidade, e precisaron que, aínda que estes municipios non teñan restricións adicionais ás que xa lle afectan a toda a comunidade, "preocupa" a evolución da pandemia que presentan (o tres están coloreados en vermello no mapa-semáforo de incidencia que publica o Sergas).

As mesmas fontes sinalaron que estes encontros se enmarcan na rolda de reunións que Sanidade está a manter cos rexedores de municipios cunha especial incidencia do virus. De feito, este mércores houbo unha reunión telemática entre os alcaldes de Santiago (Xosé Sánchez Bugallo), Teo (Rafael Sisto) e Ames (José Manuel Miñones), e o secretario xeral da Consellería de Sanidade, Alberto Fontes. Neste caso, o tres concellos atópanse en nivel de alerta 3 (coloreados en vermello no mapa de incidencia) e, ademais, Santiago e O Milladoiro, en Ames, teñen restricións adicionais (non se permiten as reunións de non conviventes, e está restrinxido o uso do interior de cafetarías e bares).

En Vigo, o rexedor, Abel Caballero, informou en conferencia de prensa de que abordará co conselleiro a situación da cidade, tras coñecer que a taxa de incidencia por 100.000 habitantes nas dúas últimas semanas chegou a 220,7, e pediu que se manteña esta "boa vía de cooperación" coa Administración galega, após semanas denunciando a falta de información concreta por parte de Sanidade.

O rexedor olívico espera coñecer a taxa de positivos en relación co número de probas PCR e reclamará os datos de contaxios diarios. Así mesmo, reiterou, trasladaralle ao conselleiro a necesidade de "duplicar" o número de probas (ata 2.500-3.000 diarias) e de rastrexadores, e de reforzar a Atención Primaria en Vigo.