De 12 da mañá ás 7 da tarde é a franxa en que poden saír os menores, pero coa chegada da calor as horas centrais do día fanse complicadas. En Ourense superaban este xoves os 30 graos, e os pais e as nais amósanse partidarios de cambiar o horario e amplialo a despois das sete.

No cambio de horario tamén apuntan que deberían ter en conta a dispoñibilidade dos proxenitores que traballan.

Desde o Ministerio de Sanidade non desbotan facer franxas diferentes para as comunidades do norte e do sur. Pero, por exemplo, no caso de Galicia toda a cunca do Miño é a zona máis calorosa, con temperaturas que adoitan pasar dos 30 graos xa nesta época.