CRTVG

Buscar

O Sergas descarta unha sospeita de coronavirus en Vigo

Publicado o 10/02/2020 14:36

A muller chegou ao PAC acompañada doutra coa que acababa de regresar da China, mais dunha zona bastante afastada do foco da enfermidade. Unha presentaba síntomas e a outra non, pero ambas foron trasladadas ao hospital Álvaro Cunqueiro onde permaneceron illadas nun box como marca o protocolo de infeccións a pesar de que ningunha das dúas cumpría cos criterios de definición do coronavirus. A que presentaba síntomas deu negativo en todas as probas de gripe.

Mentres que muller asintomática fai vida normal, a paciente con síntomas permanece na súa casa coa recomendación de saír o menos posible e de levar unha máscara durante uns días.

O mozo que activou o protocolo de coronavirus no Complexo Hospitalario Universitario de Santiago xa foi dado de alta, xa que as analíticas deron resultado negativo. Mentres tanto, o Goberno balear confirmou que está investigando un posible novo caso nun neno de sete anos diagnosticado con gripe B. O menor pertence ao entorno próximo do home ingresado no hospital Son Espases de Palma de Mallorca e que deu positivo, o segundo en España despois do paciente ingresado na Gomera.

Os 21 españois repatriados de Wuhan continúan a súa corentena no hospital Gómez Ulla de Madrid, onde no barrio de Usera un grupo de cidadáns chineses que acaban de chegar das celebracións do Aninovo gardan corentena voluntaria.

Noticias web

10/02/2020