CRTVG

Buscar

Malestar entre os veciños do Grove polo estado en que está desde hai varios meses unha rúa do centro urbano

Publicado o 05/03/2020 14:26

No centro urbano do Grove levan practicamente medio ano sendo conscientes dos problemas que implica circular pola rúa Alexandre Bóveda. O mal estado en que se atopa esta zona da vila supón que accións como transportar un carriño, usar a bicicleta ou levar os rapaces ao colexio, situado a carón da zona, se converta nun risco.

Din que dende que comezou esta situación, a raíz dunhas obras que máis tarde foron paralizadas, as administracións non achegan solucións efectivas.

O boca a boca e o impulso das redes sociais conseguiron que esta cuestión acadara certa repercusión neste concello. Esta mañá, ao tempo que varios operarios levaban a cabo tarefas de limpeza e reparacións, os veciños da vila reuníanse no consitorio co alcalde na procura de solucións que aceleren o proceso de reparación.

Polo de agora, continúan á espera de conseguir a recuperación deste céntrico tramo da localidade.

Noticias web

05/03/2020