CRTVG

Buscar

Recuperan un cadáver en augas das illas Cíes, preto de onde afundiu un pesqueiro de Baiona hai dúas semanas

Publicado o 10/03/2020 12:33
Recuperan un cadáver en augas das illas Cíes, preto de onde afundiu un pesqueiro de Baiona hai dúas semanas

O helicóptero Pesca 1, do servizo de Gardacostas de Galicia, recuperou este martes un cadáver que foi avistado por un pesqueiro na zona de Freu da Porta, en augas das illas Cíes, moi preto de onde, hai dúas semanas, afundiu o barco Marsua J, con base no porto de Baiona.   

Segundo informaron fontes do 112 Galicia e de Salvamento Marítimo, os tripulantes do barco Nuevo Meira deron o aviso, sobre as 11,30 horas deste martes, após localizar na auga un cadáver.   

O 112 alertou a Salvamento Marítimo, Garda Civil, Policía Local de Vigo, Protección Civil e Gardacostas. Finalmente, o helicóptero Pesca 1 recuperou o corpo do mar e trasladouno ao peirao de Carracido, nas illas Cíes.   

A localización deste cadáver, que aínda non foi identificado, produciuse preto do lugar onde, o pasado 24 febreiro, se afundiu un pequeno barco de artes de pesca menor con dous homes a bordo, o Marsua J, con base no porto de Baiona (Pontevedra). Após o naufraxio, recuperouse o corpo dun dos mariñeiros, mentres que o outro, o patrón, permanece desaparecido.