CRTVG

Buscar

Iñaki Urdangarin sae do cárcere para o seu primeiro permiso penal

Publicado o 24/12/2019 09:34

Iñaki Urdangarin goza do seu primeiro permiso penal de catro días, desde que ás 8.40 minutos desta xornada de Noiteboa abandonou en coche o Centro Penal de Brieva (Ávila), onde ingresou o 18 de xuño de 2018.

O cuñado do Rei cumpre unha condena de 5 anos e 10 meses de prisión por malversación, prevaricación, fraude á Administración, dous delitos fiscais e tráfico de influencias no coñecido como caso Nóos.

Urdangarin foi recollido polo mesmo vehículo en que cada martes e xoves, desde o pasado mes de setembro, realiza o traxecto entre Ávila e Pozuelo de Alarcón (Madrid) para realizar labores de voluntariado nunha ONG de atención a persoas con discapacidade.

O vehículo, de cor gris, chegou ao interior do recinto penal aos 8.32 minutos, para despois acceder ao propio cárcere pola porta principal e recoller no seu interior o marido da infanta Cristina.

Oito minutos despois, ás 8.40 horas, saíu do recinto no asento traseiro do coche en dirección a Pozuelo de Alarcón, onde ten previsto acudir, como cada martes e xoves desde setembro, antes de pasar o próximos catro días coa súa familia.

O ex-duque de Palma terá que volver ao centro penal de mulleres de Brieva antes das 8.40 horas do próximo sábado.

Iñaki Urdangarin solicitou este permiso penal a finais do pasado mes de novembro, unha vez cumprida unha cuarta parte da pena.

Aínda que inicialmente solicitou sete días de permiso, o máximo que contempla a lei, a Xunta de Tratamento da prisión reduciuno aos catro que goza a partir deste martes.