Os veciños de Vilaza din que xa non poden máis. As pancartas en boa parte das casas da aldea dan conta da situación que están a vivir dende que hai dous meses comezou a funcionar esta granxa de terneiros.

Din que non se opoñen ao seu funcionamento, pero que precisan que se regule dalgún xeito para que a súa actividade non afecte a vida diaria dos veciños.

A granxa ten licenza de actividade para uso agrogandeiro dende o ano 1972. Pechou algún tempo e volveu abrir hai algo máis de dous meses para a cría de tenreiros. Din que aí foi cando comezaron os problemas.

Os veciños, fartos da situación, preparan unha demanda que presentarán no xulgado nas vindeiras semanas.

Dende o Concello de Monterrei apuntan que a granxa, agora alugada, ten todas as licenzas en regra, que comunicou o cambio de actividade e que cumpre coas normativas de urbanismo e medio ambiente.

Técnicos municipais visitaron as instalacións, os seus informes aseguran que están dentro dos parámetros en canto a cheiros e ruídos, e que memtres non haxa unha ampliación da nave poden seguir traballando.

Con todo, dende o Concello apuntan que seguirán vixiantes en canto ao cumprimento das normativas vixentes.