CRTVG

Buscar

Dous cans salvan a súa dona dun incendio en Ourense

Publicado o 08/01/2020 14:32

Dous cans salvaron a súa dona dun incendio en Ourense. O lume, intencionado, iniciouse nuns colectores do lixo e estendeuse ao cerrado da vivenda, feito de bambú. Os cans espertaron a dona e botárona fóra da cama, cando as lapas xa ameazaban a casa.

Aínda nerviosa, por espertar de madrugada coas lapas asomadas á ventá, Noelia ten claro a quen agradecerlle poder contalo.

"Eu durmía e espertáronme os cans. Saltaron á cama e ladraban moi forte, dunha maneira peculiar. Ata que me levantei non pararon. Os dous coma tolos".

Cando saíu ao patio, as lapas subían por riba do cerrado da casa. A súa primeira reacción foi coller a mangueira.

"O lume xa corría polo cerrado e deime de conta de que a cousa era grave. Collín a mangueira e empecei a botar auga. Foi a miña primeira reacción. A min afectoume o cerrado, o toldo... pero á veciña de arriba persianas, rebentaron os cristais... se non chegaran os bombeiros sería un desastre. Aínda estou nerviosa e emociónome porque puido chegar ás caldeiras do gas, bombonas... puido ser grave", explica Noelia.

Chicho e Lolo, de 5 e 6 anos, son os superheroes desta historia en que tamén hai viláns. O lume comezou nos colectores do lixo, xa retirados porque arderon por completo nun acto que os bombeiros consideran claramente intencionado.

"Se foramos máis animais, o mundo iría mellor. Temos moito que aprender porque, como especie, a humana, temos moito que aprender. Estas cousas non se xustifican. Non entendo. Os cans non saben a magnitude do que fixeron, non teñen consciencia, pero eu si e xa os quería un montón, así que agora...", di Noelia.

Desde o día 30 de decembro ata hoxe, arderon na cidade 13 colectores, en cinco noites distintas, e todos de madrugada. Bombeiros, policía e o propio Concello investigan o sucedido.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

08/01/2020