CRTVG

Buscar

Deteñen no Carballiño un home de 66 anos pola agresión sexual denunciada a fin de semana

Publicado o 06/02/2020 18:32

Un home duns 66 anos foi detido este xoves acusado da agresión sexual denunciada por unha muller esta fin de semana no municipio ourensán do Carballiño. Segundo trasladaron a Europa Press fontes da investigación, o detido é un home, duns 66 anos e de nacionalidade española, que foi localizado no mesmo municipio onde se rexistraron os feitos.

A muller presentou a denuncia o pasado día 2 de febreiro por unha suposta violación ou agresión sexual rexistrada a xornada anterior, o sábado día 1, nun domicilio do Carballiño. A Garda Civil asumiu o caso para tentar esclarecer o sucedido e buscar o agresor, que desaparecera do suposto inmoble dos feitos denunciados. Finalmente, o dispositivo despregado polo instituto armado conseguiu localizar o home este xoves no mesmo municipio.

Segundo denunciou a muller, a agresión sexual tivo lugar a madrugada do sábado pasado na súa vivenda do Carballiño, despois de que o home a acompañara ata a súa casa. Alí, segundo relata, o home violouna e despois desapareceu sen deixar rastro.

Despois do acontecido, a muller conseguiu pedir axuda e denunciar os feitos antes de ser trasladada ao Complexo Hospitalario Universitario de Ourense. Alí foi atendida e recoñecida por un médico e aplicóuselle o protocolo establecido para os casos de agresión sexual.

Noticias web

06/02/2020