CRTVG

Buscar

Arde a maquinaria e parte da estrutura dunha nave industrial de Sarria

Publicado o 23/07/2019 13:25

Un incendio industrial nun polígono do concello lugués de Sarria alertou de madrugada os bombeiros. Rexistrouse nesta nave do polígono de San Xulián da Veiga dedicada á fabricación de produtos derivados da madeira. Afortunadamente, non quedou ferida ningunha persoa, dado que no momento do incendio non había ningúen traballando. Os empregados chegaban pouco despois dos bombeiros e axudáronlles a estes a localizar o foco do lume, que estaba nunha das máquinas.

Cando chegaron os bombeiros, as lapas xa calcinaran varias máquinas e tamén afectaran parte da estrutura da propia nave. Con todo, os bombeiros empregáronse a fondo para atallar o lume ante o perigo de que se propagase ata outras zonas en que había almacenados produtos altamente inflamables.

Tras a intervención dos bombeiros, a zona quedou custodiada pola Garda Civil ata a chegada da policía xudicial, que prodeceu a inspeccionar o lugar do incendio para investigar como se iniciou o lume e esclarecer se se tratou dun accidente ou se o lume puido ser intencionado.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

23/07/2019