Os veciños do barrio vigués de Navia piden medidas para acabar coa saturación de ruído que padecen os edificios lindeiros coa circunvalación da cidade. Segundo o último informe municipal, algunhas medicións acadaron os 70 decibeles cando a Organización Mundial da Saúde establece o límite saudable en 53.

Por este tramo da autovía de circunvalación de Vigo transitan acotío 20.000 vehículos. A ruta suma os tráficos do peirao de Bouzas coa autoestrada e os do hospital Álvaro Cunqueiro, o Parque Tecnolóxico de Valadares e a bisbarra do Val Miñor. A gran densidade circulatoria da VG-20 linda cunha ringleira de edificios do barrio de Navia.

O último informe municipal ofrece datos de medicións que, a carón da estrada, acadan os 70 decibeles nalgunhas franxas horarias. A Organización Mundial da Saúde fixa o límite saudable en 53, por iso a Asociación de veciños Novo Vigo segue reclamando o soterramento da vía a pesar de que o Ministerio de Transportes xa avanzou que esa obra non está prevista.

Un estudo encargado polo Concello de Vigo propón a cubrición do tramo con paneis en forma de túnel para mitigar a propagación do ruído que afecta uns 5.000 residentes nos edificios lindeiros.