Este estanque de augas fecais formouse hai un mes, cando rompeu unha tubaxe entre varias rúas do polígono do Ceao, en Lugo. Dende aquela, as naves que se encontran á beira sofren filtracións no seu interior, cos problemas de sucidade e fedor que ocasionan para as empresas afectadas.

"Agora está cheo. Toda a canalización está atascada. Urbaser sabe moi ben do problema. Hai 30 centímetros de augas fecais, que se están a filtrar para a miña nave. Teño que estar todos os días limpando e saneando a zona", relata o empresario José Luis García.

"Problemas de olores, de ratas e, á parte, coas humidades", afirma José Álvarez.

"O maior problema é que entra moita auga pola parede para dentro. Cando chove moito, entra polos tabiques. Nin queda a pintura nin queda nada", explica Francisco Pérez, tamén empresario.

O persoal da empresa concesionaria da limpeza xa pasou en varias ocasións a baleirar o estanque, pero as augas residuais axiña volven brotar e fíltranse de novo polas paredes das naves industriais. Posto que a tubaxe rota ten xa 40 anos de antigüidade, dende as empresas afectadas reclaman que se renove a canalización o antes posible.

"Iso así non pode estar baixo ningún concepto. Viñeron hai un mes para destascar, pero está visto que iso está desaugando continuamente. Eu o que non sei é como seguen tendo iso así sen darlle unha solución", di José.

Pola súa parte, dende o Concello de Lugo están a estudar alternativas para dotar as naves dunha nova canalización.