Co tráfico pechado nos dous sentidos do viaduto da ronda de Nelle, os operarios seguen traballando arreo para desmontar a infraestrutura. Entrementres, debaixo do paso elevado, axentes da Policía Local regulan o tráfico e informan os condutores máis despistados das posibles alternativas.

"Regularon este semáforo e agora hai máis tempo para circular. Atascos polo momento non houbo, si algún despistado que pretende xirar por onde non pode..." "Hoxe e mañá vanse prohibir os xiros á dereita e á esquerda". "E a partir do sábado pechan o tráfico e máis os peóns agás os residentes".

Uns cortes de tráfico que lles crean incerteza aos veciños en canto ao transporte público.

"Eu utilizo o bus que sobe e baixa a avenida de Fisterra e non sei como vai quedar isto...".

En todos os casos, salvo a liña 12, haberá paradas en itinerarios alternativos. Pequenas molestias para os veciños que din que van pagar a pena.

"Os que viven no primeiro teñen o viaduto totalmente pegado aí...".

Os cortes de tráfico no cruzamento da ronda de Nelle coa avenida de Fisterra prolongaranse ata o 5 de marzo, que será cando comece a reurbanización da zona.