CRTVG

Buscar

CRTVG Viva

Novas CRTVG

A Santa Compaña puido ser a orixe dos zombis do cine americano, segundo un documental da Televisión de Galicia

31/10/2020

Con ‘George Romero: zombis e Santa Compaña’, a TVG indaga este sábado na relación con Galicia do pioneiro deste xénero

A cinta percorre a historia da familia Romero e insiste nas máis que posibles influencias da cultura e antropoloxía galegas en ‘A noite dos mortos viventes’, película que creou tendencia no cinema de terror americano

A Santa Compaña puido ser a orixe dos zombis do cine americano, segundo un documental da Televisión de Galicia

Santiago, 31.10.2020.-    Na noite de Defuntos, a do 31 de outubro ao 1 de novembro, a TVG emite o documental ‘George Romero: zombis e Santa Compaña’ a través da primeira canle, despois do programa ‘Bamboleo’, sobre as 00.30 h, e tamén na G2 ás 23.30 h. Trátase dun documental sobre a figura do director de ‘A noite dos mortos viventes’ (1968), película pioneira do xénero zombi do cine americano. A tese é que Romero, que era neto de galegos, se inspirou para este filme nos relatos familiares sobre a Santa Compaña.

Durante décadas, os afeccionados galegos cultivaron a lenda de que George A. Romero, de moita fama no cinema de terror norteamericano, tiña orixes galegas. Aos poucos, o que parecía unha fabulación foi tomando corpo con sucesivas pescudas dos investigadores e confirmouse que a familia do ‘rei dos zombis’ era de aquí. Títulos tan coñecidos da industria norteamericana como ‘Zombi’ (1978), ‘Creepshow’ (1982) ou ‘A metade escura’ (1993) terían influencias da ‘nai Galicia’.

Con este documental, a produtora Formato, por iniciativa do seu produtor executivo, Andrés Barbé, incide no tema, achegando novos datos e entrevistando un dos parentes do mítico realizador -falecido no Canadá en 2017-, que é, nada menos que Guillermo Escrigas, historiador e director do CGAI (Centro Galego das Artes da Imaxe) durante a última década, que contará as súas lembranzas de infancia sobre o tío George.

O documental insiste nas máis que posibles influencias da cultura e da antropoloxía galegas no nacemento dunha película de zombis que creou tendencia no xénero terrorífico, ‘A noite dos mortos viventes’, pois o neno George escoitaba os contos da Santa Compaña da voz da súa avoa galega, nada na Mourela (Neda). A película percorre a historia da familia Romero, desde Galicia ata os Estados Unidos, pasando por Cuba, e elabora un pequeno discurso sobre a importancia de Santo André de Teixido na evolución do cinema de zombis americano.

ler máis

Fin de semana multideportivo na G2, cos mellores encontros galegos de balonmán, fútbol sala, motocrós e fútbol

30/10/2020

Entre todos eles, tres derbis galegos: Poio Pescamar-Cidade das Burgas, Coruxo-Compostela e Pontevedra-Celta B

Fin de semana multideportivo na G2, cos mellores encontros galegos de balonmán, fútbol sala, motocrós e fútbol

Santiago, 30.10.2020.-  Nova fin de semana deportiva nos medios públicos, que achegarán algúns dos partidos máis destacados, con representación galega, de fútbol, balonmán, fútbol sala e motocrós. As transmisións na G2 e na web da CRTVG comezarán o sábado, ás 17.00 horas, co Dicsa Modular Cisne BM-Barça, correspondente á Liga Asobal de balonmán. A continuación, ofrecerase tamén, en directo, o Poio Pescamar F. S.-Cidade das Burgas GLS (19.00 h), da Primeira División de fútbol sala feminino.

A programación deportiva dominical iniciarase cun novo derbi galego, pero da 2ªB de fútbol, o que disputarán Coruxo F. C.-S. D. Compostela (12.00 horas). O deporte rei continuará pola tarde en ‘A Liga das Cidades’ (16.30 h), co choque de máxima rivalidade provincial, entre o Pontevedra C. F. e o R. C. Celta B, a partir das 17.00 horas. Á mesma hora, poderase seguir, en vivo, pola web da CRTVG o R. Ferrol-Zamora C. F. (en diferido, ás 19.00 horas pola G2).

A G2 volverá achegar o domingo, desde as 14.00 horas, o Campionato do Mundo de MXGP. O lucense Jorge Prado volverá loitar contra os mellores por facerse con esta décimo sexta proba, que se compite desde Trentino (Italia), escenario das últimas tres probas do mundial.

ler máis

O grupo Clásicos Libres gaña co tema 'Ferrol 1916' o concurso 'Musicando Carvalho Calero', posto en marcha pola RG e AGAL

30/10/2020

O tema, que fusiona sonoridades pop/rock con matices da música celta, foi o que acadou maior puntuación na fase de votación popular realizada sobre as dez cancións finalistas, elixidas por un xurado profesional

Esta iniciativa ten como obxectivo dar a coñecer a figura de Ricardo Carvalho Calero, o autor homenaxeado este ano polo Día das Letras Galegas

 

O grupo Clásicos Libres gaña co tema 'Ferrol 1916' o concurso 'Musicando Carvalho Calero', posto en marcha pola RG e AGAL

Santiago, 30.10.2020.-    Este venres coñeceuse o nome da formación gañadora do concurso 'Musicando Carvalho Calero', posto en marcha pola Radio Galega e a Associaçom Galega da Língua (AGAL) para dar a coñecer a figura de Ricardo Carvalho Calero, o autor homenaxeado este ano polo Día das Letras Galegas. O grupo Clásicos Libres, co tema ‘Ferrol 1916’, baseado nun poema do autor, foi o que maior puntuación acadou na fase de votación popular posta en marcha a principios deste mes na páxina web http://carvalho2020.gal, onde se pode consultar a clasificación dos dez finalistas, elixidos por xurado profesional entre os 80 temas que se presentaron a concurso.

ler máis

Celta-Real Sociedad, Lugo-Rayo e Unionistas-Deportivo, os partidos destacados do 'Galicia en goles'

30/10/2020

Amais, ofrecerá os encontros do Obradoiro e Ourense de baloncesto, dúas citas de balonmán na Liga Asobal, co Cisne e o Cangas como protagonistas, e fútbol sala, co Burela e o derby Poio-As Burgas en xogo

Celta-Real Sociedad, Lugo-Rayo e Unionistas-Deportivo, os partidos destacados do 'Galicia en goles'

Santiago, 30.10.2020.- A fin de semana deportiva na Radio Galega comeza o venres ás oito e media do serán coa retransmisión do Cáceres-Ourense da Liga Española de baloncesto. O programa, que se prolongará ata a medianoite, recollerá tamén a última hora dos equipos galegos de cara a unha nova xornada de competición.

O sábado, ás 3 da tarde, a actualidade pasará polo fútbol e o polideportivo. Os micrófonos da Radio Galega estarán no Alondras-Pontellas, da Terceira División, no Burela-Santa Coloma e no Poio-As Burgas, de fútbol sala, e nas dúas citas da Asobal de balonmán: Cisne-Barcelona e Cangas-Puerto Sagunto.

A emoción chegará o domingo. Desde as 12, a edición matinal contará o derby galego da Segunda B entre o Coruxo e o Compostela, xunto ao encontro de rivalidade coruñesa entre o Silva e o Fabril, da Terceira. O Unicaja-Obradoiro, da Liga ACB de baloncesto, será outro dos atractivos ata as dúas e media da tarde.

Desde as tres menos cuarto, a sesión de tarde retransmitirá o Celta-Real Sociedad, da Primeira; Lugo-Rayo Vallecano, da Segunda A; e Unionistas-Deportivo, Pontevedra-Celta B e Racing-Zamora, da Segunda B. A xornada na Terceira completará a axenda dominical.

Ademais, na fin de semana os oíntes da Radio Galega poderán seguir a actualidade do motor no 'Gas a fondo', que se emite o sábado ás 11 da noite. Mentres, Toni López García convidará ás once e media da noite a Xaquín Díaz, o adestrador de Miguel Alvariño, nunha nova entrega de 'Galicia en Toquio'.

Todas as emisións deportivas da Radio Galega poden escoitarse a través da FM, TDT, radiogalega.gal, Radioplayer España e os altofalantes Alexa. Ademais, o partido do Celta pode seguirse na canle de audio de Movistar Fútbol reservada á Radio Galega. E o último treito do 'Galicia en goles', entre as oito e media do serán e as 11 da noite, emítese en streaming polo Mira RG na páxina web de radiogalega.gal.

ler máis

'Lúa vermella', a nova película de Lois Patiño, participada pola TVG, chega este venres aos cines galegos

29/10/2020

Gañadora da Biznaga de Prata á mellor película española no Festival de Málaga e do premio á mellor película no Cinespaña de Toulouse, poderá verse en salas da Coruña,  A Estrada, Carballo, Ferrol, Lugo, Marín, Monforte, Santiago e Vigo

Realidade e lenda fúndense nun filme que desenvolve a historia real do mergullador Rubio de Camelle e en que aparecen os seres que do imaxinario fantástico galego

'Lúa vermella', a nova película de Lois Patiño, participada pola TVG, chega este venres aos cines galegos

Santiago, 29.10.2020.-    A película ‘Lúa vermella’, dirixida por Lois Patiño e participada pola Televisión de Galicia, chega ás salas de cine este venres, 30 de outubro. Despois de obter a Biznaga de Prata á mellor película española na sección ZonaZine da 23ª edición do Festival de Málaga e o galardón á mellor película no 25º Festival Cinespaña de Toulouse, poderá verse en cinemas da Coruña, A Estrada, Carballo, Ferrol, Lugo, Marín, Monforte, Santiago e Vigo.

Tras a súa estrea internacional na Sección Forum da Berlinale, esta produción galega de Zeitun Films segue o seu percorrido por certames de cinema. Ata agora participou no FICUNAM (México) e nos festivas de Shanghái (A China), Jeonju (Corea), Cartaxena de Indias (Colombia), IndieLisboa (Portugal), na Mostra Internazionale del Nuovo Cinema de Pesaro (Italia) e no Curtocircuíto de Santiago, entre outros.

En ‘Lúa vermella’, o cineasta galego Lois Patiño afonda no universo retratado na súa ópera prima, ‘Costa da Morte’. O filme sitúase nunha vila da costa galega onde o tempo parece deterse. Todas as persoas están paralizadas, aínda que se poden oír as súas voces, que falan de pantasmas, de bruxas e de monstros. Ao lugar chegan tres mulleres buscando o Rubio, un mariñeiro do lugar que desapareceu no mar.

No elenco destaca o propio Rubio de Camelle interpretándose a si mesmo e Ana Marra, Carmen Martínez e Pilar Rodlos, que lle dan vida a un trío de meigas, figuras icónicas da cultura galega que, como a Santa Compaña, habitan o espazo onírico da película. No seu equipo técnico destaca tamén, como directora de arte, a cineasta Jaione Camborda, directora de ‘Arima’, película participada tamén pola TVG.

Segundo Patiño, que acadou o premio ao mellor director Emerxente no Festival de Locarno con ‘Costa da Morte’, ‘Lúa vermella’ “adéntrase na Galicia do mar comprendéndoa na súa dimensión física e imaxinaria, onde realidade e lenda se funden e onde o mar e a morte se entrecruzan con toda a súa carga mítica e evocadora. A historia real do Rubio de Camelle, un mergullador que rescatou máis de 40 cadáveres de náufragos perdidos no mar, vese envolta polos seres que poboan o imaxinario fantástico galego”.

ler máis

O 96% do que se emite na TVG está feito en Galicia e por empresas galegas

29/10/2020

Alfonso Sánchez Izquierdo presentou no Parlamento a memoria de servizo público correspondente a 2019

A TVG é desde abril deste 2020 a canle xeneralista máis vista polos espectadores novos (entre 13 e 24 anos de idade)

O 96% do que se emite na TVG está feito en Galicia e por empresas galegas

Santiago, 29.10.2020.- O director xeral da CRTVG, Alfonso Sánchez Izquierdo, compareceu esta mañá na Comisión de Control da CRTVG do Parlamento de Galicia para presentar a ‘Memoria de Servizo Público 2019’, nunha sesión que adoita ter lugar en xuño pero que este ano se atrasou ata outubro por mor do calendario do Parlamento de Galicia.

ler máis

A CRTVG busca a banda sonora que acompañará os galegos durante este Nadal

28/10/2020

As persoas interesadas en participar na sexta edición do concurso ‘Este Nadal Canta con Nós’ teñen de prazo desde hoxe ata o próximo 5 de decembro

Os temas, que deben ser inéditos e escritos en galego, enviaranse en formato mp3 ou mp4 ao enderezo canciondonadal2020@crtvg.es

A CRTVG busca a banda sonora que acompañará os galegos durante este Nadal

Santiago, 28.10.2020.-   A CRTVG abre desde hoxe a convocatoria para poñerlle unha nova melodía ao Nadal galego. O prazo para a presentación de cancións que estará aberto ata o próximo 5 de decembro. A sexta edición do certame ‘Este Nadal Canta con Nós’ ponse en marcha coa idea de atopar a mellor banda sonora para acompañar os galegos e galegas este Nadal e, para iso, as cancións deben de ser inéditas e orixinais (ou versións doutras coa autorización dos titulares dos dereitos), ademais de estaren escritas en lingua galega.

Cada grupo ou solista participante presentará un só tema, cunha duración non superior aos 4 minutos, e poderá enviar un vídeo musical do mesmo. Os participantes enviarán as súas cancións, de temática libre, en formato mp3 e, en caso de presentar vídeo musical, en mp4, ao enderezo canciondonadal2020@crtvg.es.

O premio conta cunha dotación económica de 1.000 euros e, para decidir o gañador, o xurado valorará a orixinalidade, a calidade técnica e o acompañamento dun vídeo musical. Ademais do premio, a canción gañadora terá difusión na televisión e na radio públicas, así como nas redes sociais.       

O/a gañador/a cederalle á CRTVG o dereito de reprodución e de comunicación pública da súa canción. Pola súa parte, o xurado estará composto por cinco persoas designadas pola dirección da Corporación Radio e Televisión de Galicia. O 11 de decembro farase público o tema vencedor e tamén unha lista puntuada ata o quinto posto  na web www.crtvg.gal, onde tamén se poden consultar as bases.

Esta é a sexta edición deste concurso musical, que anteriormente gañaron os nenos do CEIP San Clemente de Caldas de Reis, coa súa proposta ‘Cando é Nadal’; Iván Vale, co tema ‘O meu Nadal perfecto’; Plan Siberia, con ‘Xunto a ti’, Susana Martínez, con ‘O sinal’, e o CEIP Covas de Meaño, que se fixo coa quinta edición do concurso grazas á canción ‘Saúde e cante o merlo’.

ler máis

Tras a despedida de 'Serramoura', este domingo chega á TVG 'A Lei de Santos', spin off co célebre chatarreiro como protagonista

28/10/2020

Os espectadores verán como volve á súa vila natal, Viladesantos, onde non é ben recibido por ninguén e onde a súa chegada coincide coa misteriosa morte dun dos veciños

Tras a despedida de 'Serramoura', este domingo chega á TVG 'A Lei de Santos', spin off co célebre chatarreiro como protagonista

Santiago, 28.10.2020.-    O domingo pasado, a serie ‘Serramoura’ despediuse para sempre dos espectadores da Televisión de Galicia, pechándose así o percorrido deste thriller rural, que se estreou en outubro de 2014 e que foi durante seis anos o produto estrela no prime time dos domingos, onde conseguiu grandes cotas de audiencia.

Pero o último capítulo de ‘Serramoura’, que se pode ver de novo no apartado ‘Á Carta’ da web da CRTVG, gardaba unha importante noticia para os seus seguidores, xa que o particular universo desta ficción non se pecha, senón que del xorde ‘A Lei de Santos’, un spin off que ten como protagonista o célebre chatarreiro, interpretado por Monti Castiñeiras, e que chegará á pantalla da Galega o domingo 1 de novembro.

Nesta nova serie, os espectadores verán como, despois da súa marcha da vila madeireira de Serramoura, Mario Piñeiro, alias Santos, volve á súa vila natal, Viladesantos, o lugar onde medrou e onde ten amigos, inimigos e familia.

O regreso do fillo pródigo esperta as suspicacias de moita xente. Non é ben recibido por ninguén, especialmente polo único familiar que lle queda vivo: o seu tío, Constante Folgoso, párroco de Viladesantos. Porque, aínda que Santos sempre asegurou que medrou nunha contorna criminal, a realidade é moi diferente: de neno mesmo foi sancristán.

A súa chegada a Viladesantos coincide coa misteriosa morte dun dos seus veciños, un suceso inédito na vila, polo que todas as sospeitas se depositarán sobre Santos. Pero o verdadeiro obxectivo do seu regreso é outro: Santos quere dar un novo golpe, o último. Cal será o seu plan?

A nova ficción de Televisión de Galicia conta coa presenza de Xabier Deive e de Andrés Giráldez, que lles daban vida en ‘Serramoura’ aos personaxes de Pancho e de Peixe, respectivamente. Sonia Castelo, Iria Sobrado, Lidia Veiga, Federico Pérez, Victoria Teijeiro, Carlos Villarino, Mercedes Castro, Marcos Viéitez, Xoán Fórneas, Adrián Ríos e Marta Doviro, entre outros, completan o elenco de ‘A Lei de Santos’.

ler máis

O colaborador da RG Fernando Franjo recibe o Premio Europeo ECTN por un proxecto sobre os cafés históricos na Península Ibérica

27/10/2020

O xornalista e investigador galego, que intervén quincenalmente no programa ‘Galicia por Diante Fin de Semana’, desenvolveu esta iniciativa conxuntamente co presidente da Asociación Portuguesa de Cafés con Historia, Vitor Marques

O colaborador da RG Fernando Franjo recibe o Premio Europeo ECTN por un proxecto sobre os cafés históricos na Península Ibérica

Santiago, 27.10.2020.-    O xornalista, historiador e colaborador da Radio Galega Fernando Franjo, que intervén quincenalmente no programa ‘Galicia por Diante Fin de Semana’, presentado por Victoria Rodríguez, acaba de recibir o Premio Europeo de Turismo Cultural ECTN 2020 polo proxecto ‘Os cafés históricos na Península Ibérica’, unha iniciativa con selo galego-portugués, que desenvolveu conxuntamente co presidente da Asociación Portuguesa de Cafés con Historia, Vitor Marques.

Este proxecto, que busca a creación dunha rede ibérica de cafés históricos, alzouse co premio na categoría de ‘Temática Turística Internacional Roteiros Culturais’ e ten como principal obxectivo a promoción dun itinerario transnacional de cafés entre España e Portugal. Esta proposta pioneira afonda na definición e na visibilización do considerado café histórico, destacando a súa importancia para o turismo sostible e cultural, así como o seu valor patrimonial material e inmaterial para cada unha das súas comunidades.

ler máis

Con motivo do centenario da revista 'Nós', a G2 estrea o 30 de outubro un documental sobre este proxecto e unha película baseada nun conto de Risco

25/10/2020

‘100 anos de Nós’ fai un percorrido contemporáneo por unha publicación que supuxo unha revolución no mundo editorial galego, mentres que o filme ‘Do caso que lle aconteceu ao doutor Alveiros’ xira arredor dos misterios e do esotérico

Unha edición especial de ‘Un País en 360’ convidará o martes a percorrer o Camiño de Santiago que no seu día fixeron os membros da Xeración Nós<

Con motivo do centenario da revista 'Nós', a G2 estrea o 30 de outubro un documental sobre este proxecto e unha película baseada nun conto de Risco

Santiago, 25.10.2020.-    A G2 ofrecerá a semana que vén, coincidindo co centenario da revista ‘Nós’, que se celebra o 30 de outubro, unha programación especial nas noites de luns a venres relacionada con esta publicación, que deu lugar á denominada Xeración Nós, un dos proxectos culturais colectivos máis singulares non só da Galicia de preguerra, senón tamén de toda a historia da literatura galega.

Así, o venres, o propio día do centenario, estrearase ‘100 anos de Nós’, unha curtametraxe documental de Arraianos Producións que fai un percorrido contemporáneo por unha publicación que supuxo unha revolución no mundo editorial galego. A revista ‘Nós’, de aberto carácter nacionalista e que pretendía normalizar o uso do galego en todos os estratos sociais, saíu á luz o 30 de outubro de 1920 en Ourense, onde se publicou ata o número 15, trasladando despois a súa sede á Coruña e a Santiago de Compostela.

A continuación, ofrecerase a estrea da película ‘Do caso que lle aconteceu ao doutor Alveiros’, adaptación da obra orixinal de Vicente Risco, un conto fantástico arredor dos misterios e do esóterico, con Xabier Álvarez e Xoán Lois Fernández como protagonistas.

Ademais destas estreas, a programación desta semana dedicada á Xeración Nós na segunda canle da Galega inclúe ‘O Retrato’, primeiro episodio de ‘Un mundo de historias’, unha serie de sete capítulos baseados en contos de distintos autores galegos. Sobre a base do conto de Castelao, ‘O Retrato’, que se emitirá o luns, conta o que sucede cando Hadrián, director de cine, retorna a Galicia para o enterro do seu pai en Santiago.

O martes ofrecerase unha entrega especial, realizada especificamente para esta efeméride, do programa ‘Un País en 360’, que utiliza a tecnoloxía para achegarlles aos espectadores o patrimonio galego. Nesta ocasión, da man de Estíbaliz Veiga, o espazo da TVG seguirá os pasos dos catro galeguistas relacionados coa Xeración Nós que en 1926 realizaron o camiño de Ourense a Santiago: Vicente Risco, Otero Pedrayo, Antón Sánchez e Pardo Bedia. ‘Camiño de Nós’ percorrerá os máis de 100 quilómetros desta ruta, amosará vistas espectaculares e visitará os lugares polos que pasaron no seu día estes intelectuais.

Ese mesmo día, a segunda canle da Galega propón unha viaxe polas contornas e rutas literarias que envolven as casas-museo dos grandes escritores galegos. Unha edición especial de ‘Vivir Aquí’ recollerá os aspectos máis descoñecidos e humanos de Vicente Risco, Otero Pedrayo, Manuel María, Rosalía de Castro e Curros Enríquez. O programa achegarase ás localidades natais destes escritores ilustres para falar cos familiares e veciños sobre as súas lembranzas persoais, as vivencias e anécdotas que máis lembran de todos eles.

O mércores será o momento de ver ‘Ramón Otero Pedrayo, o patriarca’, un documental sobre a vida do escritor ourensán, con fotografías, audios da súa voz e testemuños de persoeiros e coetáneos.

Ao día seguinte, os espectadores poderán ver o documental ‘Nós, semente de futuro’, unha produción divulgativa que afonda na figura dos membros da Xeración Nós: Vicente Risco, Ramón Otero Pedrayo, Antonio Lousada Diéguez, Florentino L. Cuevillas e Alfonso Daniel Rodríguez Castelao. Todos eles manteñen na década dos 20 unha estreita ligazón persoal e unha actividade cultural compartida. Porén, un dos logros máis importantes desta xeración foi a promoción da revista ‘Nós’, que desde 1920 ata 1936 marcou a vida cultural galega. Para achegarse á Xeración Nós, o documental contará co testemuño do presidente da Real Academia Galega, Víctor F. Freixanes; da presidenta do Consello da Cultura Galega, Rosario Álvarez; do presidente da Fundación Otero Pedrayo, Juan Luis Saco; do director do Museo Arqueolóxico de San Cibrao de Las, Xulio Rodríguez, e do presidente da Fundación Vicente Risco, Luís Martínez Risco.   

ler máis