CRTVG

Buscar

CRTVG Viva

Novas CRTVG

O programa da TVG 'Aquelando' recibe o Premio 'Ciencia en Acción' na modalidade de divulgación científica

07/07/2020

O xurado deste certame internacional destacou deste espazo “a amenidade na linguaxe, o coidado na precisión científica e a combinación de actividades prácticas”

A versión ‘Aquelando na casa’, posta en marcha durante o confinamento para apoiar os estudantes galegos, tamén obtivo unha mención de honra neste concurso

O programa da TVG 'Aquelando' recibe o Premio 'Ciencia en Acción' na modalidade de divulgación científica

Santiago, 07.07.2020.-    O programa da Televisión de Galicia ‘Aquelando’ foi galardoado ex-aequo co Premio ‘Ciencia en Acción’ na modalidade de traballos de divulgación científica por ser “un espazo de televisión que destaca pola amenidade na linguaxe empregada, o coidado na precisión científica e a combinación de actividades prácticas, fomentando o interese pola ciencia no público en xeral”.

Con ‘Aquelando’, unha produción de Mirabelle Comunicación para a TVG, os medios públicos galegos apostaron pola divulgación científica dun xeito entretido, co obxectivo de desmontar falsos mitos e ensinarlle á audiencia a facer os seus propios experimentos. O programa, conducido polos divulgadores David Ballesteros e Manuel Vicente, conta tamén coa participación de destacados colaboradores como o profesor experto en ciencia cidadá José Viñas, a escritora, blogueira e youtuber Deborah Ciencia e a directora técnica da Domus da Coruña, Patricia Barciela.

Aquelando na casa’, a versión do programa realizada con motivo do peche dos centros escolares para apoiar os estudantes galegos e fomentar a aprendizaxe dun xeito entretido, tamén obtivo neste certame unha mención de honra, na categoría de demostracións científicas non presencias, polos seus “contidos de diferentes ramas científicas achegados por nenos, nenas e profesorado, que elaboraron experimentos científicos desde as súas casas durante o confinamento, creando un proxecto de educación científica”.

Ciencia en Acción é un certame internacional dirixido a estudantes, profesores, investigadores e divulgadores da comunidade científica, en calquera das súas disciplinas. O seu principal obxectivo é presentar a ciencia dun xeito atractivo e motivador, para que os/as mozos/as se interesen por ela.

ler máis

A Radio Galega retransmite, o martes e o mércores, os encontros dos equipos galegos de fútbol profesional

06/07/2020

O Celta e o Dépor buscan a permanencia esta semana, mentres que o Lugo xoga en Ponferrada un partido clave

A Radio Galega retransmite, o martes e o mércores, os encontros dos equipos galegos de fútbol profesional

Santiago, 06.07.2020.-  Últimas dúas semanas de competición na Liga de Fútbol Profesional e catro xornadas por diante na Radio Galega. O martes, desde as 21.00 horas, Toni López conduce a retransmisión do partido da Primeira División entre o Celta de Vigo e o Atlético de Madrid, que se vai disputar no estadio municipal de Balaídos. A emisión prolongarase ata as 01.00 h para escoitar, despois dos 90 minutos, aos adestradores Óscar García e Cholo Simeone. A cita é, se cadra, a máis complicada que lle queda ao equipo vigués ata o remate da temporada e, de sumar os tres puntos, tería practicamente garantida a permanencia.

ler máis

Os concursos e magazines do verán da TVG percorrerán Galicia na busca das mellores festas e novas voces

03/07/2020

A canle pública estrea a mediados de xullo os programas ‘Aquí Hai Verán’, que dará conta das festas e romarías que se celebren en Galicia, e o concurso de karaoke ‘Cantas ou Que?'

Estes novos espazos súmanse a ‘A Liga dos Cantantes Extraordinarios’, que cada xoves busca a mellor voz das orquestras galegas, e ao renovado magazine das tardes ‘Quen Anda Aí?', comandado estes meses por Marcial Mouzo

Os concursos e magazines do verán da TVG percorrerán Galicia na busca das mellores festas e novas voces

Santiago, 03.07.2020.-    Arrancou o mes de xullo e con el a programación de verán da Televisión de Galicia, que este xoves ofreceu como aperitivo a estrea da segunda temporada de ‘A Liga dos Cantantes Extraordinarios’, con máis tensión no concurso, máis música e máis humor. O programa, comandado por Paco Lodeiro, recrutará as mellores voces das orquestras galegas e aspira a converterse cada xoves nun grande evento musical e festivo.

A partir do 19 de xullo, ‘Aquí Hai Verán’ dará conta de canta festa, evento ou romaría se celebre en Galicia durante estes meses. Coa actividade recuperándose pouco a pouco nas rúas e en previsión de que volvan os eventos e as festas, que os galegos vaian de vacacións e que haxa concertos adaptados á ‘nova normalidade’, esta nova proposta retratará o ocio e o entretemento das vacacións de verán dos galegos.
    
A TVG estreará tamén ‘Cantas ou Que?’, un formato de entretemento de luns a venres baseado no karaoke, que será presentado por Fran Cañotas. O escenario móbil do programa instalarase cada semana nunha localidade costeira de Galicia, un lugar popular con veciños e turistas gozando do verán e da praia. Ao finalizar cada interpretación, os concursantes serán votados por un xurado popular e os/as  vencedores/as de cada día enfrontaranse o venres desa mesma semana na gran final.

Pero antes disto, cada tarde será o momento do ‘Quen Anda Aí?’, que non para durante o verán. Capitaneado por Marcial Mouzo, que estará acompañado por Rodrigo Vázquez, Inma Morandeira e Yolanda Vázquez, a partir do vindeiro luns converterá a terraza de verán do programa no estudio principal. Ademais de dar conta de canto aconteza nas rúas, vilas e localidades galegas, o magazine da TVG ofrecerá propostas adaptadas a esta época do ano, como unha rede de correspondentes a pé de costa ou nos espazos máis emblemáticos do verán galego, unha opción diaria para preparar pícnics e unha lembranza do que ocorreu en Galicia en veráns anteriores, entre outras.

No mes de xullo tampouco descansa o programa ‘Luar’, que chegará fiel á súa cita cada venres, a excepción do día 24, para o que a TVG prepara un programa en directo  co obxectivo de dar conta de todo o que aconteza nesa noite dos ‘novos’ Fogos do Apóstolo. O relevo do ‘Luar’ collerao no mes de agosto o espazo ‘Inimitables’, con especiais de música tradicional e de retrousos, entre outras temáticas.

O cine made in Hollywood será outro dos protagonistas do verán da Televisión de Galicia, que na noite dos mércores, despois dun novo capítulo de estrea da serie ‘Do Dereito e do Revés’, programará títulos coma ‘Sully’, ‘O contable’, ‘Animais fantásticos e onde atopalos’, ‘Escuadrón suicida’, ‘O francotirador’, ‘Os xogos da fame’, ‘Kong, a illa caveira’ e ‘Batman contra Superman’, entre outros. A continuación, tamén o mércores á noite, será o momento do cine galego, cos títulos máis destacados dos últimos anos.

Ademais, a canle autonómica manterá os novos programas que estreou o mes de xuño: ‘O sol sae para todos’, un espazo de reportaxes de actualidade, que conta diariamente como os galegos se adaptan á ‘nova normalidade’, e o magazine ‘Que nos pille rebolando!’, que seguirá enchendo de festa e diversión cada tarde de sábado.

A Radio Galega reforza as súas grandes marcas durante o verán

Na Radio Galega, o ‘Galicia por Diante’ manterá o seu formato e duración -de 06.00 a 14.00 h- e a súa dinámica. O tramo magazine contará con novas seccións e colaboradores de verán, entre os que figura a cantante Sabela Ramil e ‘A Profa’, coa sección ‘Curso para neofalantes’. Ademais, haberá puntos de directo en todo o territorio galego e unha hora de humor cada día.

O programa ‘A Tarde’, que manterá o espírito de puntos de directo con reporteiros/as por todo o territorio, colaboracións, humor e cultura, pasa a emitirse de 16.00 a 19.00 h. A esa hora arrancará o ‘Galicia en Goles’ cando haxa competicións de fútbol con equipos galegos durante o mes de xullo. O espazo ‘Pensando en Ti’ emitirase en directo todo o verán de luns a domingo no seu horario habitual, é dicir, de 01.00 a 06.00 h. Tamén continuará, de luns a venres, o ‘Diario Cultural’, con dúas edicións diarias, unha pola mañá e outra pola tarde.

Ademais, a canle pública galega afondará este verán nas sinerxías coa Televisión de Galicia, ao incluír na grella catro programas que foron emitidos no seu día na TVG: ‘Grandes Lugares’, ‘Náufragos’, ‘ADN Galego’ e ‘Tolemias’.

ler máis

As series da TVG 'Matalobos' e 'Hotel Almirante' chegan ao mercado internacional da man da plataforma Olympusat

03/07/2020

A emblemática ficción sobre o narcotráfico en Galicia e a miniserie de época veranse en lingua española nos Estados Unidos, Canadá, Porto Rico e América Latina

As series da TVG 'Matalobos' e 'Hotel Almirante' chegan ao mercado internacional da man da plataforma Olympusat

Santiago, 03.07.2020.-    As series da Televisión de Galicia ‘Matalobos’ e ‘Hotel Almirante’ chegarán ao mercado americano grazas a un acordo co distribuidor británico Videoplugger. A través da plataforma Olympusat, as dúas ficcións veranse en lingua española nos Estados Unidos, Canadá, Porto Rico e América Latina.

Considerada polos responsables de Videoplugger como “a resposta europea á serie ‘Narcos’”, a emblemática ‘Matalobos’, ficción producida por Voz Audiovisual, foi a primeira que tratou a realidade do tráfico de drogas en Galicia e xira arredor dun clan familiar na vila ficticia de Sardiñeira. É unha das series de máis éxito na historia da canle autonómica  e acadou grandes cotas de audiencia cando foi emitida orixinalmente en Galicia.

A miniserie de época ‘Hotel Almirante’, situada nos anos 50 e baseada na novela homónima de Marta Rivera de la Cruz, mestura amor, paixón, traizón e misterio. Esta ficción de Formato Producciones tamén tivo unha grande acollida na súa estrea na TVG.
    
Deste xeito, a Televisión de Galicia segue a estender a lingua e o audiovisual galego polos mercados internacionais, despois da chegada das series ‘Auga Seca’ e ‘Vidago Palace’ á plataforma HBO. Ademais, ‘Tres Camiños’, produción internacional participada pola TVG, poderá verse en Amazon Prime Video a comezos de 2021. E, no ámbito do público infantil, a serie ‘As aventuras de Minchi’ verase nunha plataforma OTT na China. Todas estas accións seguen a estela de ‘O sabor das margaridas’, a primeira serie en galego que chegou a Netflix, onde conseguiu un grande éxito.

ler máis

A TVG remata a temporada como líder dos informativos en Galicia

02/07/2020

A faixa informativa do mediodía supera os 120.000 espectadores de media, con picos esta temporada de 260.000

A Galega tamén incrementou a audiencia entre os mozos de 13 a 24 anos e entre a poboación de 25 a 44 anos

Os datos de Kantar Media reflicten que a TVG foi a primeira canle en número de emisións musicais e de artes escénicas e ofreceu 1.651 emisións de carácter cultural

A TVG remata a temporada como líder dos informativos en Galicia

Santiago de Compostela, 02.07.2020.-    Na temporada televisiva entre setembro de 2019 e xuño de 2020, a TVG foi, unha vez máis, a canle de referencia informativa para os galegos, que a elixiron para coñecer a actualidade cunha audiencia media dos informativos de 68.000 espectadores, que na faixa informativa do mediodía supera os 120.000 televidentes e que alcanzou neste período picos de ata 260.000 espectadores.

Nestes 10 meses, a media de audiencia da canle situouse no 9,3% no conxunto do día e un 10,7% no prime time. Nas noites, os mellores datos de audiencia do prime time foron para os xoves, con ‘Land Rober Tunai Show’; para os venres, co consolidado ‘Luar’, e para os sábados, coa proposta de música de ‘Bamboleo’.

A canle pública foi tamén quen de aumentar o seu perfil de audiencia entre os mozos de 13 a 24 anos (liderando esta clasificación nos meses de maio e xuño) e entre a poboación de 25 a 44 anos.

Dentro da FORTA, a CRTVG segue a ser un dos seus motores principais, superando en máis dun punto a media das televisións autonómicas neste período.

#Cultura365: a TVG ofreceu 1.651 emisións de carácter cultural

Nesta temporada 2019-2020, e segundo os datos extraídos polo medidor oficial Kantar Media, a Galega é a primeira canle en número de emisións musicais na nosa comunidade, o que reflicte unha clara aposta polo sector. Os programas musicais acadan unha cota de pantalla na TVG do 9,9%, a segunda cota máis elevada neste xénero.

Tamén foi a canle con maior número de emisións na área cualificada por Kantar Media como de artes escénicas, con 17 emisións e unha cota media do 6,6%, a máis alta de todas as canles.  A TVG ofreceu 1.651 emisións de carácter cultural, só por detrás de La2. Neste tipo de contidos a TVG logra unha cota do 7,5%, 4,8 puntos máis do que acada La2 nese xénero (2,7%).

ler máis

14 entrevistas e outros 4 debates electorais, neste caso na RG, dan continuidade á cobertura electoral da CRTVG

01/07/2020

A TVG e a Radio Galega comezan a rolda de entrevistas este xoves cos tres grupos políticos significativos

A Radio Galega emitirá os catro debates electorais, o próximo luns, en desconexión provincial, ás 21.00 horas

14 entrevistas e outros 4 debates electorais, neste caso na RG, dan continuidade á cobertura electoral da CRTVG

Santiago, 01.07.2020.- Os medios públicos galegos emitirán, desde este xoves, un total de 14 entrevistas no marco da cobertura da campaña electoral para os comicios do 12 de xullo e 4 debates electorais na Radio Galega. Os sete candidatos/as que determina cada forza participarán nas entrevistas tanto da Televisión de Galicia como da Radio Galega, e se emitirán en orde de menor a maior representación e cunha duración proporcional recollida no Plan de Cobertura electoral. A emisora pública ofrecerá tamén o próximo luns catro debates, en desconexión provincial, dentro do espazo ‘A Crónica’.

Ás entrevistas dos medios públicos, tanto na TVG como na Radio Galega, asistirán os sete candidatos e candidatas dos denominados electoralmente ‘grupos representativos’ (Alberto Núñez Feijóo polo PP; Pancho Casal da Marea Galeguista; Gonzalo Caballero do PsdeG; e Ana Pontón polo BNG) e os dos denominados ‘grupos políticos significativos’ (Antón Gómez-Reino, candidato de Galicia en Común; Beatriz Pino, de Ciudadanos e Ricardo Morado, de Vox).

No caso da TVG, a emisión das entrevistas electorais comezará mañá xoves, despois do ‘Telexornal Serán’, ás 22.00 horas, aos tres grupos significativos e serán realizadas polo xornalista Marcos Sueiro. A vindeira semana desde o luns e en días sucesivos ofreceranse as entrevistas aos candidatos das forzas representativas por esta orde: BNG, PSdeG, Marea Galeguista, e PPdeG.

ler máis

A TVG segue a incrementar de audiencia en xuño e consolídase como a canle xeneralista máis vista entre a xente nova

01/07/2020

Televisión de Galicia é, de novo, a canle pública máis vista de Galicia e a segunda entre toda a oferta televisiva do país

Desde abril, a TVG subiu un punto de cota, situándose en xuño nun 10,6% no prime time e un 10,2% no conxunto do día

No clasificación dos 25 programas máis vistos en Galicia neste mes, 15 son informativos da canle

A TVG segue a incrementar de audiencia en xuño e consolídase como a canle  xeneralista máis vista entre a xente nova

Santiago, 01.07.2020.-    A Galega segue a medrar en audiencia, crecendo en xuño outro medio punto respecto ao mes anterior, tanto no conxunto día, onde acadou un 10,2% de cota, coma no prime time, en que chega ata un 10,6%. Televisión de Galicia é a segunda canle máis vista polos galegos e galegas, só por detrás de Telecinco.

Ao liderado dos seus informativos súmase que TVG segue a ser, coma en maio, a canle xeneralista máis vista polos espectadores novos (entre 13 e 24 anos idade), cunha cota do 9%. Isto confirma a renovación sostible do público da Galega nunhas faixas de idade en que o consumo de TDT é cada día máis complicado de conseguir ante a oferta dixital.

Ademais, no ámbito Galicia, a TVG recupera o liderado entre as canles públicas e colócase na segunda posición de toda a oferta televisiva do país. De novo, a TVG liderou a franxa informativa do mediodía, cun 18,7% mensual, de luns a domingo, a 4,4 puntos da seguinte canle, que é Antena 3 (14,3%).

Na clasificación dos 25 programas máis vistos en Galicia neste mes, 15 son informativos da TVG, co ‘Telexornal mediodía’ á cabeza.

En audiencia, todos estes espazos medraron en xuño: o ‘Bos días’,  con 1,8 puntos de cota máis; ‘A revista’, con 8 décimas máis; o ‘Galicia noticias’ faise con 6 décimas máis ca hai un mes; o ‘Telexornal mediodía’ medra 6 décimas; o ‘Telexornal serán’ acada outras 7 décimas de cota máis e o ‘Telexornal serán fin de semana’ medra 5 décimas.

O intenso labor informativo de luns a domingo e o reforzo da oferta de entretemento da canle pública, que nestes días estrea novidades na grella para o verán, fai que a TVG manteña e mellore os seus resultados de audiencia no ámbito xeral.    

No que respecta á rede de canles autonómicas reunidas en FORTA, a TVG segue firme como un dos grandes motores desta rede e acada valores superiores á media de canles en 2,4 puntos de cota, tanto no conxunto do día como no prime time.

ler máis

A canción 'A maxia está en ti', de Rocío Varela, gaña o concurso 'Este verán canta con nós'

30/06/2020

Premiada con 1.000 euros, a peza vencedora, que será a banda sonora da CRTVG durante os vindeiros meses, convenceu o xurado pola súa ledicia e mensaxe positiva

Debido á calidade das cancións e vídeos que se presentaron ao certame, elaborouse un top 7 coas mellores propostas da trintena de temas valorados

A canción 'A maxia está en ti', de Rocío Varela, gaña o concurso 'Este verán canta con nós'

Santiago, 30.06.2020.-    A CRTVG xa ten a súa banda sonora para este verán de 2020. A canción ‘A maxia está en ti’, de Rocío Varela, é a gañadora da cuarta edición do certame ‘Este verán canta con nós’, resolto hoxe en Santiago e que contou cunha extraordinaria resposta, xa que se presentaron ao concurso 40 cancións, das que finalmente se valoraron as 31 que cumprían coas bases expostas.

A peza gañadora convenceu o xurado pola súa ledicia e a mensaxe positiva que transmite de que “todos temos maxia dentro” e por encaixar moi ben cos gustos do público galego. Composto polos presentadores Paco Lodeiro (‘A Liga dos Cantantes Extraordinarios’) e Lucía Rodríguez (‘Que nos pille rebolando’); o director de Contidos da CRTVG, Fernando R. Ojea; a xefa de Contidos da TVG, Montse Besada, e a xefa de Programas da Radio Galega, Tania Fernández Lombao, o xurado destacou que a canción vencedora podería ser un tema número 1 en calquera lista de éxitos.

Tamén se fixo fincapé na calidade de todos as cancións e vídeos que se presentaron ao concurso. Tal reunión de talento fixo que a escolla fose moi complicada para o xurado, polo que elaborou un top 7, onde se atopan, sen contar coa gañadora e sen orde establecida: Diego Eses, con ‘Galicia tropical’; Alejandra Pais, con ‘O teu corazón’; Samuel Soto, con ‘O verán chegou’; Verter, con ‘Se non temos festa’; Plan Siberia, con ‘Pon na galega’, e Fernando Paredes, con ‘Volver respirar’.

A apegadiza canción, que xa pode escoitarse na web da CRTVG, foi premiada con 1.000 euros e terá difusión nos distintos programas da Televisión de Galicia e da Radio Galega, así como nas súas redes sociais.

‘A maxia está en ti’ sucede a ‘Que nos pille rebolando’, a canción gañadora do ano pasado, do artista Miguel Silva, máis coñecido como Aquel-e. Con este reggaeton con estética trap, o artista rianxeiro acadou un grande éxito e notoriedade o estío pasado. A CRTVG desenvolve este concurso, así como o que tamén se convoca en Nadal, co obxectivo de apoiar a música en galego e de descubrir novos talentos.

ler máis

Martes e mércores de fútbol na Radio Galega

29/06/2020

Nesta xornada, o Celta e o Deportivo enfróntanse ao Mallorca e ao Tenerife respectivamente

O Club Deportivo Lugo precisa da vitoria para seguir pelexando pola permanencia

Martes e mércores de fútbol na Radio Galega

Santiago, 29.06.2020.- O final express da Liga de Fútbol Profesional chega ao ecuador. O martes e o mércores, Galicia en Goles comeza ás 19:00 horas para contar os partidos dos nosos equipos na sexta xornada desde que se retomaron os campionatos na Primeira e Segunda divisións.

ler máis

O 'Galicia por diante' refresca o verán da Radio Galega con novas seccións e novos colaboradores

29/06/2020

A coñecida cantante Sabela Ramil, exconcursante de OT, estréase nas ondas con "Un verán con Sabela"

A docente Pilar Ponte, coñecida como A Profa, animará os oíntes a expresárense na nosa lingua con "Curso para neofalantes"

O espazo dirixido e presentado por Kiko Novoa tamén contará coa participación dos reporteiros Álex Fidalgo, Fátima Mella e Quique Morales

O 'Galicia por diante' refresca o verán da Radio Galega con novas seccións e novos colaboradores

Santiago, 29.06.2020.-    O programa Galicia por diante, o gran magazine das mañás da Radio Galega, inaugura hoxe oficialmente o verán, xa que a partir desta semana incorpora novas seccións e novos colaboradores, que cada día, de 11:30 a 12:00 h, xusto antes do espazo "A bóla extra", achegarán divertidas e refrescantes propostas para animar  as mañás destes meses de estío.

Grande impacto nas redes sociais xerou o anuncio da colaboración de Pilar Ponte, profesora no IES da Pobra do Caramiñal. Coñecida como A Profa, foi galardoada co Premio da Cultura Galega 2019 polo proxecto 21 días co galego, co que, desde o centro docente onde imparte clases, anima a mocidade a expresarse en galego durante tres semanas, todo o día e con todo o mundo. Con "Curso para neofalantes", que se ofrecerá os xoves, Ponte empregará un anaquiño da radio pública galega para animar os oíntes a expresárense na nosa lingua. Este labor non só o fará desde os micrófonos da RG, senón  tamén en Twitter, na conta @oespazodaprofa, onde falará da súa colaboración no Galicia por diante.

O programa dirixido e presentado por Kiko Novoa tamén contará durante este verán coa presenza da coñecida cantante Sabela Ramil, exconcursante de Operación Triunfo, que os venres porá en antena a sección "Un verán con Sabela".

Para completar estas colaboracións de verán, o programa contará coas voces dos reporteiros Álex Fidalgo, que os luns falará sobre as grandes preguntas que nos facemos nesta época do ano; Fátima Mella, que os martes comentará as películas da súa vida, e Quique Morales, que cada mércores achegará historias relacionadas coa pandemia da COVID-19.

ler máis