CRTVG

Buscar

CRTVG Viva

Novas TVG

Os oito concursantes seleccionados a semana pasada disputarán esta noite a segunda xornada de 'A Liga dos Cantantes Extraordinarios'

09/07/2020

O programa presentado por Paco Lodeiro contará tamén coa presenza de Miguel Torre e de César Romero, concursante da primeira edición

Os oito concursantes seleccionados a semana pasada disputarán esta noite a segunda xornada de 'A Liga dos Cantantes Extraordinarios'

Santiago, 09.07.2020.- Este xoves dispútase na TVG a segunda xornada de ‘A Liga dos Cantantes Extaordinarios’ (22.35 h), concurso que este verán buscará novamente nas voces da verbena galega aquela capaz de convencer a público de todas as idades e gustos.

Despois da primeira gala da semana pasada, que contou coa participación de 16 concursantes, foron 8 os seleccionados polo xurado, integrado por Pili Pampín, Lito da Panorama, Lucía Pérez e Mon e Ula, integrantes de Monoulious Dop.

Así pois, os aspirantes que disputarán esta noite a competición serán Iván Rodríguez (New York), Alba Navarro (Los Satélites), Yennia (La Fórmula), Irene Iglesias (Panorama), Nakary (Olympus), Monia Borges (Marbella), Danni Lamas (Kubo) e Fran Castellanos (Saudade).

Pero non serán estas as únicas actuacións da noite, xa que o programa presentado por Paco Lodeiro contará tamén coa presenza como convidados dun mítico, Miguel Torre, e de César Romero, concursante da primeira edición, que porá a proba e colaborará cos aspirantes deste ano.

Cada programa de ‘A Liga dos Cantantes Extraordinarios’ terá un gañador e o que consiga gañar tres terá un pase de ouro e irá directo á gran final, que  determinará cal é o/a cantante que tomará o relevo de Alejandra Pais, gañadora da primeira edición.

Así pois, o deste xoves será un novo programa cargado de emoción e humor, con varias novidades competitivas este ano: un duelo de entrada entre dous concursantes que loitarán por un oco no sofá dos elixidos e dous popurrí de grupo cos que os ‘cantantes extraordinarios’ poderán sumar cinco puntos extra, dúas probas que manterán a emoción ata o final. Todo pode cambiar, tamén co voto do público que gozará do show desde o estudio de gravación.

ler máis

En 'Do dereito e do revés', Moncho métese en campaña asesorando un concelleiro

08/07/2020

Aínda que non ten nin idea de arte, a súa misión será elixir un cadro cuxa inauguración marcará o inicio do período electoral

En 'Do dereito e do revés', Moncho métese en campaña asesorando un concelleiro

Santiago, 08.07.2020.-   Na entrega deste mércores da serie ‘Do Dereito e do Revés’ (22.45 h), Moncho quere demostrarlle a Sara que é un home sensible. Para iso, e tamén a cambio de que admitan a Lucía nun curso de fotografía, acepta asesorar un concelleiro na elección dun cadro cuxa inauguración marcará o inicio da campaña electoral.

Que Moncho non teña nin idea de arte é o de menos, pois conta coa axuda de Manolo e do Pianista. Os tres teñen moi claro que precisan algo impactante. E tratándose deste trío, é probable que o consigan.

ler máis

O programa da TVG 'Aquelando' recibe o Premio 'Ciencia en Acción' na modalidade de divulgación científica

07/07/2020

O xurado deste certame internacional destacou deste espazo “a amenidade na linguaxe, o coidado na precisión científica e a combinación de actividades prácticas”

A versión ‘Aquelando na casa’, posta en marcha durante o confinamento para apoiar os estudantes galegos, tamén obtivo unha mención de honra neste concurso

O programa da TVG 'Aquelando' recibe o Premio 'Ciencia en Acción' na modalidade de divulgación científica

Santiago, 07.07.2020.-    O programa da Televisión de Galicia ‘Aquelando’ foi galardoado ex-aequo co Premio ‘Ciencia en Acción’ na modalidade de traballos de divulgación científica por ser “un espazo de televisión que destaca pola amenidade na linguaxe empregada, o coidado na precisión científica e a combinación de actividades prácticas, fomentando o interese pola ciencia no público en xeral”.

Con ‘Aquelando’, unha produción de Mirabelle Comunicación para a TVG, os medios públicos galegos apostaron pola divulgación científica dun xeito entretido, co obxectivo de desmontar falsos mitos e ensinarlle á audiencia a facer os seus propios experimentos. O programa, conducido polos divulgadores David Ballesteros e Manuel Vicente, conta tamén coa participación de destacados colaboradores como o profesor experto en ciencia cidadá José Viñas, a escritora, blogueira e youtuber Deborah Ciencia e a directora técnica da Domus da Coruña, Patricia Barciela.

Aquelando na casa’, a versión do programa realizada con motivo do peche dos centros escolares para apoiar os estudantes galegos e fomentar a aprendizaxe dun xeito entretido, tamén obtivo neste certame unha mención de honra, na categoría de demostracións científicas non presencias, polos seus “contidos de diferentes ramas científicas achegados por nenos, nenas e profesorado, que elaboraron experimentos científicos desde as súas casas durante o confinamento, creando un proxecto de educación científica”.

Ciencia en Acción é un certame internacional dirixido a estudantes, profesores, investigadores e divulgadores da comunidade científica, en calquera das súas disciplinas. O seu principal obxectivo é presentar a ciencia dun xeito atractivo e motivador, para que os/as mozos/as se interesen por ela.

ler máis

O equipo de cociñeiros de 'Come a Comarca' elaborará hoxe o menú máis tradicional do Ribeiro e O Carballiño

07/07/2020

Despois de coñecer os segredos da súa gastronomía, prepararán anguías fritidas, carne ao caldeiro e canas de crema (22.15 h)

O equipo de cociñeiros de 'Come a Comarca' elaborará hoxe o menú máis tradicional do Ribeiro e O Carballiño

Santiago, 07.07.2020.-   O programa ‘Come a Comarca’ visitará esta semana as comarcas do Ribeiro e do Carballiño, onde o seu equipo de cociñeiros terá ocasión de coñecer os segredos da súa gastronomía para posteriormente poder elaborar o menú máis tradicional destas terras, composto por anguías fritidas, carne ao caldeiro e canas de crema.

Marco Varela, do restaurante Sábrego, en Ribadavia, será o encargado de guiar os concursantes pola gastronomía do Ribeiro e do Carballiño. Estes irán ás piscinas de Manolo ‘O das Anguías’ para coñecer como se crían estes animais. Rita, unha experta cociñeira que formou parte da organización da Festa da Anguía de Barral, explicaralles como cociñalas, xunto con Alfredo, o actual presidente desta festa gastronómica. Para aprender a facer a carne ao caldeiro visitarán a carnicería Ferradás, no Irixo, e o restaurante Casa Gazpara, no Carballiño. Por último, os concursantes irán xunto a Pilar, da pastelería A Canavela Fritida, no Carballiño, para coñecer a súa receita das famosas canas do Carballiño. Ela pertence a una familia de pasteleiros, os Cerviño, que son os creadores deste famoso doce.

Unha vez desvelados os segredos das tres receitas, os cinco cociñeiros afeccionados do programa enfrontaranse nun concurso popular, nas bodegas Casal de Armán, aos mellores cociñeiros da comarca facendo eses pratos: Elena García e José Antonio García, do restaurante Lembranza-Orixe (San Amaro), Ana Belén Veleiro e Teresa Iglesias, do Bodegón do Veleiro (Cenlle) e José Manuel de la Iglesia, da pastelería Royal (O Carballiño). A súa habilidade nos fogóns será avaliada por un xurado popular composto por 15 veciños da comarca.

ler máis

Un artesán da madeira e unha parella de labregos ecolóxicos contarán hoxe a súa experiencia en 'Cos Pés na Terra'

06/07/2020

Un gandeiro da Laracha será outro dos protagonistas do programa desta noite (22.05 h)

Un artesán da madeira e unha parella de labregos ecolóxicos contarán hoxe a súa experiencia en 'Cos Pés na Terra'

Santiago, 06.07.2020.-   Os espectadores de ‘Cos Pés Na Terra’ coñecerán hoxe a Pepe, o ‘Luis Pasteur’ da Laracha, que vive do leite das súas vacas, un leite envasado e pasteurizado nas míticas bolsas de plástico.

O programa da TVG tamén irá este luns aos Ancares. Os seus montes gardan tesouros para David, un artesán da madeira que traballa tan ben coma un paxaro carpinteiro.

Finalmente, o equipo do programa coñecerá a Leticia e Gustavo, unha parella de labregos ecolóxicos de Arteixo cos que comprobará que traballar en parella non sempre é doado.

ler máis

Tomás renuncia provisionalmente ao seu posto no cuartel de 'Serramoura', obrigando a Marga a preparar o exame de tenente

05/07/2020

Ademais, no último capítulo da temporada (22.05 h), Santos recibe unha oferta para ser o xefe de seguridade dun importante delincuente

Tomás renuncia provisionalmente ao seu posto no cuartel de 'Serramoura', obrigando a Marga a preparar o exame de tenente

Santiago, 05.07.2020.-   Despois de pechar o caso das ameazas de Quique e con Oliveira fóra da Garda Civil, Tomás aproveita hoxe a tranquilidade que se respira en ‘Serramoura’ para renunciar ao seu posto provisionalmente e obrigar a Marga a que se ocupe do cuartel e acepte preparar o exame de Tentente.

No último capítulo da temporada, os espectadores tamén verán como Santos recibe o convite para asistir a unha reunión cun importante delincuente para ser o seu xefe de seguridade e, a pesar dos intentos de Santos, non poderá rexeitar a oferta.

Despois de axudar a Hugo e fuxir de Serramoura, Evaristo ten outra fronte aberta. Leandro sabe que Hugo escapou grazas a el e agora chantaxea a Evaristo con contarlle á Garda Civil todo o acontecido se non lle entrega unha suma importante de diñeiro.

ler máis

O dúo gaditano Andy & Lucas e o cantautor vigués Guillermo Castro, convidados no 'Bamboleo' deste sábado

04/07/2020

O programa presentado por Xosé Manuel Piñeiro contará tamén coa actuación da orquestra Alto Imperio

O dúo gaditano Andy & Lucas e o cantautor vigués Guillermo Castro, convidados no 'Bamboleo' deste sábado

Santiago, 04.07.2020.-   O espectáculo e o entretemento familiar serán protagonistas, un sábado máis, na TVG co programa ‘Bamboleo’ (22.05 h), que hoxe recibirá a visita do dúo gaditano Andy & Lucas, que fixo década e media no panorama musical, cando aínda resoan hoxe os refráns dos seus primeiro éxitos como ‘Son de amores’ e ‘Tanto la quería’. Nestes 15 anos de existencia sumaron máis dun millón de copias vendidas e once discos de platino. Esta noite presentaranlles ao público e aos espectadores o seu novo sinxelo, ‘Toda la noche’, que lle rende homenaxe á música disco dos 80 sen perder a esencia sureña propia das melodías do grupo.

Presentado por Xosé Manuel Piñeiro e cun elenco de colaboradores que se apoderarán do escenario, o ‘Bamboleo’ desta noite contará tamén coas actuacións da orquestra Alto Imperio e do cantautor vigués Guillermo Castro, que nos últimos catro anos popularizou numerosos temas de bachata con tres discos e moitos números 1 no ámbito nacional. Tras iniciarse no ano 2012 co seu disco de pop dos 80 ‘Sin palabras’, cambiou á bachata, colleitando con este xénero grandes éxitos como ‘Una noche más’ e ‘Espera’.

Por outro lado, nas seccións habituais do programa, ‘Agora ou Nunca’ amosará o potencial artístico de Chus Lestayo, co tema ‘What´s up?’, de 4 Non Blondes; e de Balmore Ordóñez, que interpretará ‘Llorarás’, de Óscar de León.

Ademais, na ‘ITV do amor’, o público terá que adiviñar cal é a verdadeira parella dunha persoa a partir de certas probas; Tino e Beatriz competirán cantando con karaoke en ‘A Jrileira’, neste caso coa canción ‘Vuela’, de Bombai, e Edu e Fátima, pola súa parte, participarán no ‘Dirtidansi’ bailando jive e tango.

ler máis

As traiñeiras regresan esta fin de semana á G2 co inicio da Liga ACT

03/07/2020

A segunda canle da Televisión de Galicia retransmitirá este verán as 18 probas do calendario da Eusko Label Liga e as 12 da Euskoten Liga

 

As traiñeiras regresan esta fin de semana á G2 co inicio da Liga ACT

Santiago, 03.07.2020.- Esta primeira fin de semana de xullo, os medios públicos galegos ofrecen en directo pola G2 o comezo da Eusko Label Liga e a Euskotren Liga de traiñeiras, que celebrarán as dúas primeiras xornadas da temporada na cidade da Coruña.  

ler máis

Os concursos e magazines do verán da TVG percorrerán Galicia na busca das mellores festas e novas voces

03/07/2020

A canle pública estrea a mediados de xullo os programas ‘Aquí Hai Verán’, que dará conta das festas e romarías que se celebren en Galicia, e o concurso de karaoke ‘Cantas ou Que?'

Estes novos espazos súmanse a ‘A Liga dos Cantantes Extraordinarios’, que cada xoves busca a mellor voz das orquestras galegas, e ao renovado magazine das tardes ‘Quen Anda Aí?', comandado estes meses por Marcial Mouzo

Os concursos e magazines do verán da TVG percorrerán Galicia na busca das mellores festas e novas voces

Santiago, 03.07.2020.-    Arrancou o mes de xullo e con el a programación de verán da Televisión de Galicia, que este xoves ofreceu como aperitivo a estrea da segunda temporada de ‘A Liga dos Cantantes Extraordinarios’, con máis tensión no concurso, máis música e máis humor. O programa, comandado por Paco Lodeiro, recrutará as mellores voces das orquestras galegas e aspira a converterse cada xoves nun grande evento musical e festivo.

A partir do 19 de xullo, ‘Aquí Hai Verán’ dará conta de canta festa, evento ou romaría se celebre en Galicia durante estes meses. Coa actividade recuperándose pouco a pouco nas rúas e en previsión de que volvan os eventos e as festas, que os galegos vaian de vacacións e que haxa concertos adaptados á ‘nova normalidade’, esta nova proposta retratará o ocio e o entretemento das vacacións de verán dos galegos.
    
A TVG estreará tamén ‘Cantas ou Que?’, un formato de entretemento de luns a venres baseado no karaoke, que será presentado por Fran Cañotas. O escenario móbil do programa instalarase cada semana nunha localidade costeira de Galicia, un lugar popular con veciños e turistas gozando do verán e da praia. Ao finalizar cada interpretación, os concursantes serán votados por un xurado popular e os/as  vencedores/as de cada día enfrontaranse o venres desa mesma semana na gran final.

Pero antes disto, cada tarde será o momento do ‘Quen Anda Aí?’, que non para durante o verán. Capitaneado por Marcial Mouzo, que estará acompañado por Rodrigo Vázquez, Inma Morandeira e Yolanda Vázquez, a partir do vindeiro luns converterá a terraza de verán do programa no estudio principal. Ademais de dar conta de canto aconteza nas rúas, vilas e localidades galegas, o magazine da TVG ofrecerá propostas adaptadas a esta época do ano, como unha rede de correspondentes a pé de costa ou nos espazos máis emblemáticos do verán galego, unha opción diaria para preparar pícnics e unha lembranza do que ocorreu en Galicia en veráns anteriores, entre outras.

No mes de xullo tampouco descansa o programa ‘Luar’, que chegará fiel á súa cita cada venres, a excepción do día 24, para o que a TVG prepara un programa en directo  co obxectivo de dar conta de todo o que aconteza nesa noite dos ‘novos’ Fogos do Apóstolo. O relevo do ‘Luar’ collerao no mes de agosto o espazo ‘Inimitables’, con especiais de música tradicional e de retrousos, entre outras temáticas.

O cine made in Hollywood será outro dos protagonistas do verán da Televisión de Galicia, que na noite dos mércores, despois dun novo capítulo de estrea da serie ‘Do Dereito e do Revés’, programará títulos coma ‘Sully’, ‘O contable’, ‘Animais fantásticos e onde atopalos’, ‘Escuadrón suicida’, ‘O francotirador’, ‘Os xogos da fame’, ‘Kong, a illa caveira’ e ‘Batman contra Superman’, entre outros. A continuación, tamén o mércores á noite, será o momento do cine galego, cos títulos máis destacados dos últimos anos.

Ademais, a canle autonómica manterá os novos programas que estreou o mes de xuño: ‘O sol sae para todos’, un espazo de reportaxes de actualidade, que conta diariamente como os galegos se adaptan á ‘nova normalidade’, e o magazine ‘Que nos pille rebolando!’, que seguirá enchendo de festa e diversión cada tarde de sábado.

A Radio Galega reforza as súas grandes marcas durante o verán

Na Radio Galega, o ‘Galicia por Diante’ manterá o seu formato e duración -de 06.00 a 14.00 h- e a súa dinámica. O tramo magazine contará con novas seccións e colaboradores de verán, entre os que figura a cantante Sabela Ramil e ‘A Profa’, coa sección ‘Curso para neofalantes’. Ademais, haberá puntos de directo en todo o territorio galego e unha hora de humor cada día.

O programa ‘A Tarde’, que manterá o espírito de puntos de directo con reporteiros/as por todo o territorio, colaboracións, humor e cultura, pasa a emitirse de 16.00 a 19.00 h. A esa hora arrancará o ‘Galicia en Goles’ cando haxa competicións de fútbol con equipos galegos durante o mes de xullo. O espazo ‘Pensando en Ti’ emitirase en directo todo o verán de luns a domingo no seu horario habitual, é dicir, de 01.00 a 06.00 h. Tamén continuará, de luns a venres, o ‘Diario Cultural’, con dúas edicións diarias, unha pola mañá e outra pola tarde.

Ademais, a canle pública galega afondará este verán nas sinerxías coa Televisión de Galicia, ao incluír na grella catro programas que foron emitidos no seu día na TVG: ‘Grandes Lugares’, ‘Náufragos’, ‘ADN Galego’ e ‘Tolemias’.

ler máis

Amais da música de Lolita e A Roda, 'Luar' celebra hoxe a emocionante segunda semifinal do 'Recantos de Ouro'

03/07/2020

Maite, da zona de Noia-Barbanza, e O Pérez, do Miño, darán o mellor das súas voces para facerse un oco na gran final do certame de talentos da canción

Amais da música de Lolita e A Roda, 'Luar' celebra hoxe a emocionante segunda semifinal do 'Recantos de Ouro'

Santiago, 03.07.2020.-  ‘Luar’ (22.00 h) achégase esta noite á recta final da décima edición do certame de talentos da canción ‘Recantos’, que esta temporada foi bautizado como ‘Recantos de Ouro’, xa que contou coa participación dos 21 concursantes máis destacados de anteriores convocatorias. Tras coñecerse o venres pasado que a primeira finalista é Ruth Cundíns, representante de Terras de Compostela, hoxe competirán Maite, da zona de Noia-Barbanza, e O Pérez, do Miño, por facerse un oco na gran final do próximo 10 de xullo. Xosé R. Gayoso e Patricia F. Santana conectarán no transcurso do programa en directo con Beatriz Serén, que nesta ocasión estará desprazada na Estrada para dar a coñecer unha curiosa historia que trouxo a ‘nova normalidade’ a esta localidade.

No apartado musical, os espectadores gozarán coas intervencións de Lolita, quen tras seis anos sen acudir a ‘Luar’, dará coma sempre boa mostra da súa arte sobre o escenario. Outros dos grandes momentos viviranse coas actuacións do grupo folk vigués A Roda, da asociación cultural Fogofatuo de Rianxo, do Coro de Carril, da orquestra pontevedresa La Ocaband, e da asociación folclórica zamorana Manteos y Monteras.

Os presentadores contarán, a maiores, no estudio coas intervencións do músico e luthier Pablo Carpintero; co humor do dúo Brandariz e Veiga e de Cuqui, que ofrecerá un novo monólogo cómico, e cos consellos sobre o mundo animal que traerá o experto Octavio Villazala. Pola súa parte, a audiencia volverá ter a oportunidade de facerse co bote do concurso telefónico, que esta semana parte con 3.500 euros e poderá gañar xamóns coas adiviñanzas que proporá ‘Luar’.

ler máis