CRTVG

Buscar

CRTVG Viva

Novas TVG

A Ribeira Sacra é esta semana o escenario de 'Come a Comarca. As Batallas', cun enfrontamento entre Chantada e a Terra de Lemos

20/01/2021

O gañador deste duelo disputará a final da provincia de Lugo fronte á Terra Chá

A Ribeira Sacra é esta semana o escenario de 'Come a Comarca. As Batallas', cun enfrontamento entre Chantada e a Terra de Lemos

Santiago, 20.01.2021.-   A Ribeira Sacra é a espectacular paisaxe que comparten as comarcas protagonistas da nova batalla de ‘Come a Comarca’: Chantada e a Terra de Lemos. O presentador do espazo da TVG, Fran Cañotas, percorrerá as fermosas ribeiras do río Miño, que pasa ao carón de Chantada, e as do Cabe, en Monforte, para dar cos seus mellores cociñeiros. Nesta zona, son omnipresentes as vides da viticultura heroica, que rematan en mencías e godellos excelentes.

Pero non só de bos caldos presumen ambas as dúas zonas. En Chantada, a busca dos mellores profesionais dos fogóns ten parada en Airas Moniz, explotación de vacas ‘jersey’ que pode presumir de elaborar o mellor queixo azul de España. Os espectadores percorrerán ademais en barca o Miño, con parada no Cabo do Mundo, o famoso meandro que o curso das augas fan xa preto do Saviñao. Esa curva fluvial é unha das paisaxes máis icónicas da redonda. Pola súa parte, a Terra de Lemos será zona de traballo labrego e nela haberá que recoller nabizas nas leiras de María Castaña, produtores de agricultura ecolóxica. E se de premios se trata, en Bóveda, o programa visitará Gutrei Galicia, medalla de ouro no campionato do mundo da carne.

Cando Cañotas complete os equipos comarcais, con cadanseus cinco cociñeiras e cociñeiros, chegará o prato forte de ‘Come A Comarca. As Batallas’: o duelo entre as dúas formacións, onde só unha acadará a clasificación para a fase final. Para facelo terá que elaborar o menú que presenten os xefes de salgados e doces do programa, Gerson Iglesias e Manuel Garea, con diferentes retos culinarios e sempre no tempo marcado. Unha trepidante contra o reloxo entre tixolas e potas en que os concursantes terán que elaborar 15 racións de cada un dos pratos (primeiro, segundo e sobremesa). Estas elaboracións serán sometidas a un esixente xurado, formado por 15 expertos en gastronomía, que nunha cata a cegas terán que decidir se, ben Chantada ou ben a Terra de Lemos, acadaron o sabor agardado.

O conxunto chantadino está capitaneado por Antonio Lorenzo, de A Faragulla, que contará coa súa nai, Ana María, de axudante experimentada. Roberto Iglesias, xerente de Os Pendellos; Michele Salucci, de rutas fluviais Quinta Sacra, e Xesús Mazaira, de Airas Moniz, completan a formación.

Os da Terra de Lemos teñen como xefe de equipo a Manuel Fernández, de Manuel Bistró, que terá de axudante a María del Carmen González. Acompañarannos Manuel Rodríguez, da Tapería Brancellao; Brais Gómez, de Trespés Comidas e Petiscos, e Manuel Moure, da pastelería El Parque.

16 comarcas cos seus respectivos equipos participan en ‘Come A Comarca. As Batallas’. O gañador do enfrontamento desta semana disputará a final da provincia de Lugo fronte á Terra Chá. Os gañadores das catro provincias darán paso ás finais da zona norte e sur e, finalmente chegarase á finalísima do programa. O equipo que acade este obxectivo levará 5.000 euros, suma que se multiplica por tres se resulta vencedor.

ler máis

A TVG participará en dez novos proxectos cinematográficos, dentro das accións de apoio ao audiovisual galego

19/01/2021

Deles, tres son as longametraxes ‘Matria’, dirixida por Álvaro Gago; a película de autor ‘O corno de centeo’, de Jaione Camborda, e a nova proposta de Dani de la Torre: ‘Live is life’

A TVG participará en dez novos proxectos cinematográficos, dentro das accións de apoio ao audiovisual galego

Santiago, 19.01.2021.-    A CRTVG acordou a súa participación nun total de dez novos proxectos cinematográficos -tres longametraxes e sete películas documentais- en cumprimento das accións de apoio dos medios públicos ao sector audiovisual. Despois da avaliación realizada pola Comisión Directiva de Programación da TVG, determinouse a participación da Corporación nesta selección de proxectos, dentro do coñecido como o cumprimento do 6%.

As tres longametraxes que contarán co apoio da Televisión de Galicia son a ópera prima de Álvaro Gago, ‘Matria’; a película de autor ‘O corno de centeo’, de Jaione Camborda, e a nova proposta de Dani de la Torre: ‘Live is life’.

Matria’, dirixida por Gago e producida por Matriuska, chega despois da colleita de premios da curtametraxe co mesmo título, premio do xurado en Sundance. O proxecto conta cun acordo de coprodución e distribución con Avalon, e as axudas de AGADIC e ICAA. Tamén foi elixida a película de autor ‘O corno de centeo’, de Jaione Camborda, que vén avalada pola residencia de proxectos Ikusmira Berniak do Festival de San Sebastián e conta coa alianza de tres produtoras de contrastada traxectoria: Esnatu e Miramemira, en coprodución minoritaria coa portuguesa Bando Aparte.

Ademais, a TVG seleccionou ‘Live is life’, a nova película de Dani de la Torre, longametraxe con gran potencial comercial coa marca de distribución Warner. Na película, de acción e aventura xuvenil, participan Frida Films, en coprodución con Atresmedia, e  tamén Netflix, cun importante investimento en distribución.

Por outra parte, a Galega acordou participar en sete novas longametraxes documentais. Unha delas é ‘A viaxe de Lucy’, documental de ciencia sobre a NASA, de Somadrome Films, que foi xa o gañador de dous das máis importantes presentacións nos mercados internacionais: MIPDOC 2020 e The Sunny Side of the Docs 2020. Tamén se seleccionou ‘Auto de ánimas’,  dirixido por Pablo Lago Dantas, e producido por Diana Toucedo Films, que quere ser un retrato xeracional e mostrar unha forma de vida en extinción e unha mirada de autor.
    
Ademais, a TVG apoiará ‘Negro púrpura’, de Illa Bufarda, documental que indaga na Galicia do século XX a través do clavicéps purpúrea, un fungo alucinóxeno que agroma nos cereais. O filme descobre as conexións deste fungo alucinóxeno co LSD, as multinacionais farmacéuticas, as pragas medievais, a medicina popular e a CIA, que explican que fora coñecido coma o ouro negro. Tamén foi seleccionado o documental biográfico ‘Julio Camba’, de Arraianos Producións, dirixido por  Aser Álvarez, sobre a figura dun dos máis populares escritores e correspondentes da prensa do século pasado.

Completan a selección tres títulos: ‘Entre pastores e lobos’, de Ibis Audiovisual e dirixido por Manuel Pedrosa Sánchez, en que un equipo de documentalistas se achegan aos últimos pastores da Serra da Queixa e ás mandas de lobos salvaxes destas montañas; ‘Crías’, documental de Xiana do Teixeiro producido por Walkie Talkie Producións, que conta xa co apoio do ICAA e que trae á luz decenas de diarios adolescentes que falan da procura da identidade feminina, e ‘Dúas vellas, sete gatos e tres máquinas de coser’, unha coprodución con Portugal de Agallas Films co apoio de AGADIC. Dirixida por Marta Pérez Pereiro, parte dunha experiencia persoal e será un documental de creación que investiga a relación do colectivo transexual coa moda.

ler máis

O filme 'A Galiña Turuleca', apoiado pola Televisión de Galicia, candidato ao Goya á mellor película de animación

19/01/2021

Dirixida por Víctor Monigote e Eduardo Gondell, esta aventura chea de humor, cunha mensaxe de superación para nenos e pais, é a única aspirante nesa categoría

O filme 'A Galiña Turuleca', apoiado pola Televisión de Galicia, candidato ao Goya á mellor película de animación

Santiago, 19.01.2021.-   O filme ‘A Galiña Turuleca’, apoiado pola Televisión de Galicia, é candidato ao Goya á mellor película de animación, o único nesta categoría, polo que o vindeiro 6 de marzo recollerá o premio na gala da 35ª edición dos galardóns do cine español, que se celebrará en Málaga.

ler máis

'Na Mente do Asasino' aborda este martes o asasinato, por parte dos GRAPO, de dous gardas civís en Santiago en 1989

19/01/2021

Ademais de afondar no caso e no detalle dos feitos, o programa (22.20 h) explicará como funcionaba esta organización terrorista

'Na Mente do Asasino' aborda este martes o asasinato, por parte dos GRAPO, de dous gardas civís en Santiago en 1989

Santiago, 19.01.2021.-    Banco de España, na praza das Praterías, en Compostela. 10 de marzo de 1989. Un comando dos GRAPO formado por cinco terroristas, entre eles o que sería seu xefe de comandos, o galego Fernando Silva Sande, entra a tiros. Asasinan os dous gardas civís que custodiaban a entrada: Constantino Limia e Pedro Cabezas. Buscaban un botín de 15.000 millóns de pesetas, 90 millóns de euros. Silva Sande segue na prisión de Teixeiro condenado polo asasinato de sete persoas, ordenar o doutras dúas e polo secuestro de  Publio Cordón.

Como funcionaban os GRAPO? Teñen algo en común os asasinos que matan en nome dunha organización terrorista? Estas e outras cuestións atoparán resposta este martes nunha nova entrega do programa ‘Na Mente do Asasino’.

Para isto, o espazo da TVG contará coas intervencións do catedrático de Psicoloxía Criminal Jorge Sobral, dos xornalistas José Benito García e José Andrés Vázquez e do escritor Antonio Cendán Fraga, que afondarán no caso e nos detalles dos feitos.

A continuación, na mesa de debate de ‘Na Mente do Asasino’, moderada por Pablo Carballo, participarán expertos de diferentes ámbitos: o policía nacional Roberto González, o criminólogo Luís Alamancos, o garda civil José Luis Limia e a psicóloga clínica María Eugenia Insua.

ler máis

Con nove candidaturas, a película 'Akelarre', participada pola TVG, é unha das favoritas na 35ª edición dos Premios Goya

18/01/2021

‘A Galiña Turuleca’, outra das producións apoiadas pola Televisión de Galicia, é a única candidata a mellor película de animación

Con nove candidaturas, a película 'Akelarre', participada pola TVG, é unha das favoritas na 35ª edición dos Premios Goya

Santiago, 18.01.2021.-    A película ‘Akelarre’, participada pola Televisión de Galicia, recibiu nove candidaturas aos Premios Goya 2021 e sitúase así como a segunda cinta máis nominada para os galardóns do cine español, só por detrás de ‘Adú’. Ademais, ‘A Galiña Turuleca’, outra produción apoiada pola TVG, é a única candidata a mellor película de animación na 35ª edición dos Goya, que se celebrará en Málaga o vindeiro 6 de marzo.
    
‘Akelarre’ opta a mellor actriz protagonista (Amaia Aberasturi), música orixinal, dirección de produción, dirección de fotografía, dirección artística, deseño de vestiario, maquillaxe e peiteado, son e efectos especiais. O filme, dirixido polo arxentino Pablo Agüero, remóntase ao século XVII. Un xuíz cuxa misión é purificar a rexión dunha pequena aldea de Navarra, arresta varias mulleres, acusándoas de bruxería e facendo todo o necesario para que estas confesen.

Esta cinta participou na Sección Oficial da 68ª edición do Festival de Cine de San Sebastián como única ficción española a competición. A súa estrea tivo lugar o 2 de outubro e tras nove semanas en carteleira, foi vista por máis de 50.000 espectadores. Ademais, ‘Akelarre’ acumula seis candidaturas aos Premios Feroz e outras catro ás medallas que outorga o Círculo de Escritores Cinematográficos.

Con Álex Brendemühl e Amaia Aberasturi como protagonistas, ‘Akelarre’ é unha produción de Kowalski Films, Lamia Producciones e Gariza Films, en coprodución coas francesas Tita Productions, La Fidèle e a arxentina Campo Cine, e contou coa participación de RTVE, EiTB, TVG, Euskaltel, Netflix, ICAA e o INCAA arxentino.

Pola súa parte, ‘A Galiña Turuleca’, outros dos filmes apoiados pola Televisión de Galicia, recibirá o Goya á mellor película de animación, ao ser a única candidata na súa categoría. Dirixido especialmente ao público infantil, o filme, unha coprodución internacional coa Arxentina, dirixida por Víctor Monigote e Eduardo Gondell, retoma o personaxe da famosa canción popularizada por Los Payasos de la Tele.

‘A Galiña Turuleca’, unha aventura chea de humor, cunha mensaxe de superación para nenos e pais, conta a historia de como un ser diferente atopa o seu lugar no mundo e, a partir do seu talento persoal e único, consegue vencer os seus medos para comezar unha aventura que lle permite reencontrarse cos seres que ama.

ler máis

Os espectadores de 'Cos Pés na Terra' descubirán como se producen 'microvexetais' e como se elabora a cervexa artesá ecolóxica

18/01/2021

O programa (22.30 h) tamén ten unha cita cunha gandeira nova que artellou un concurso de cociña a base de produtos lácteos

Os espectadores de 'Cos Pés na Terra' descubirán como se producen 'microvexetais' e como se elabora a cervexa artesá ecolóxica

Santiago, 18.01.2021.-   Os espectadores de ‘Cos Pés na Terra’ verán hoxe un xeito novo de cultivar. Daniel vailles ensinar a súa produción de ‘microvexetais’, un super alimento, pequeno en tamaño, pero grande en sabor e propiedades.

Ademais de algo para comer, no programa desta semana tamén haberá de beber. ‘Cos Pés na Terra’ coñecerá a Pablo, impulsor dunha cervexa artesá ecolóxica que elabora co seu propio lúpulo e coa axuda da familia.

ler máis

No segundo episodio de 'O Final do Camiño' Peláez enfróntase a Gonzalo e intenta asegurar o seu poder

17/01/2021

Os espectadores tamén verán esta noite (22.30 h) como o exército de Afonso VI chega a Compostela disposto a arrasar a cidade

No segundo episodio de 'O Final do Camiño' Peláez enfróntase a Gonzalo e intenta asegurar o seu poder

Santiago, 17.01.2021.-   No segundo episodio de ‘O Final do Camiño’, que a TVG ofrece esta noite, Diego Peláez continúa coa teima de poñer a García no trono. Para iso precisa a alianza con Guillerme de Normandía, que fraguará por medio da súa filla Adela, que chega a Compostela e que se converterá na arma que Peláez necesita para convencer os nobres de Galicia. Con todo, isto debe facelo ás costas de Gonzalo, que agora cumpre unha misión para a raíña Constanza que ten que ver con el. A situación entre Peláez e Gonzalo axiña se complica e o bispo comeza a planear a forma de asegurarse o poder.

Unha vez recuperado da súa reclusión en Toledo, Pedro comeza a sentirse atraído por Elvira. Esta decátase e trata de evitalo, para evitar un conflito con Gonzalo, pero, con Efraim preso, precisa consultar o libro de medicamentos, escrito en árabe, e a única persoa que coñece capaz de axudala é o seu cuñado. Ademais, Pedro e Animal céntranse en investigar a morte de Ahmed, asasinado polo primeiro, que sabe que se Animal o descobre, haberá de levalo ante a xustiza representada polo seu irmán, Gonzalo.

Estevo goza cada vez de maior prestixio grazas ás indicacións do misterioso monxe, ao que semella non coñecer ninguén e que, nesta ocasión, vai mostrar algo moito máis alá do que Estevo podería imaxinar e que o levará aos límites da súa cordura.

Mentres todo isto sucede en Compostela, en Sevilla, Yusuf, co seu exército almorábide, vaise facendo co poder sen atopar demasiada oposición e deixando un rego de sangue ao seu paso. Ante esta situación, Ao-Mutamid decide gañar o favor de Alfonso VI enviándolle á súa fermosa filla Zaida como ofrenda de paz.

A continuación, no seguinte capítulo, o exército de Afonso VI chega ás portas de Compostela disposto a arrasar a cidade. O seu obxectivo é poñer fin á traizón de Peláez. Gonzalo, escondido no monte co que resta da garda, consegue que se lle concedan dous días para deter o bispo e, así, impedir que o pobo sufra as consecuencias dunha guerra. Xunto co seu irmán Pedro, penetra nas murallas de Compostela para depoñer a quen un día foi o seu Dómine e pai. Pero a cidade está tomada polos mercenarios de Tomás e os  poucos aliados que lle quedan a Gonzalo ou están mortos ou van camiño diso.

Pola súa parte, os nobres galegos, reunidos no palacio de Peláez, esperan a que o rei García volva ocupar o trono de Galicia para sublevárense contra Afonso. Pero primeiro deben liberalo. Nuno, acompañado dos seus mellores homes, agarda acampado nas inmediacións do Castelo de Lúa, onde García está preso. Pero entrar non vai ser tan doado como tiñan planeado, xa que alguén informou das súas intencións.

Alleo a todo isto, Estevo continúa inmerso na construción da súa catedral. As innovacións do monxe cada vez son máis espectaculares e arriscadas e os canteiros dan en dubidar de que as súas propostas sexan viables. Estevo, cegado pola súa fe no monxe, impón as súas ideas pola forza sen ter en conta os perigos que iso pode carrexar.

ler máis

A cantante Amparo Sandino e a orquestra Panorama deixarán pegada esta noite no escenario de 'Bamboleo'

16/01/2021

Polo programa (22.00 h) tamén pasará a banda viguesa El Sol Desnudo, que está a presentar o seu novo disco, ‘Mapas en relieve’

A cantante Amparo Sandino e a orquestra Panorama deixarán pegada esta noite no escenario de 'Bamboleo'

Santiago, 16.01.2021.-    ‘Bamboleo’ volve este sábado pola noite ás pantallas de Televisión de Galicia con Xosé Manuel Piñeiro como condutor e cunha artista de renome como convidada: Amparo Sandino. O programa contará así mesmo coa actuación da orquestra Panorama, que ofrecerá unha selección musical única e un espectáculo incomparable.

Amparo Sandino foi referencia no estilo ‘tropipop’ dos anos 90 e, despois dunha parada, retomou a súa carreira como cantante. Sandino presentará en ‘Bamboleo’ o seu último tema, ‘Un poco más de amor’, cunha clara mensaxe de alegría e impregnado dos ritmos caribeños que caracterizan os seus traballos. Ademais, Amparo cantará sobre o escenario o seu buque insignia, ‘Gózate la vida’ e participará dos xogos máis entretidos que teñen preparados os colaboradores do programa.

Nesta noite de festa e diversión, a música da orquestra Panorama deixará pegada sobre o escenario do programa facendo bailar a todos os presentes, aínda que teña que ser sen moverse do sitio.

A parella de baile profesional formada por Erick e Alicia presentará o seu novo espectáculo de ritmos afrolatinos e ofrecerá unha exhibición da súa especialidade: baile urbano.

Polo ‘Bamboleo’ desta noite pasará así mesmo unha banda viguesa con nome dunha novela de Isaac Asimov: El Sol Desnudo. O grupo estará presentando o seu disco ‘Mapas en relieve’, en que se recolle o tema que interpretarán esta noite: ‘Bajo la lluvia de verano’.
    
Pola súa parte, os participantes do ‘Agora ou Nunca’ brindarán dúas actuacións de moito nivel. Annunziata Giannotta cantará ‘Titanium’, de David Guetta, e Iván Pérez fará o propio coa canción ‘Hoy tengo ganas de ti’, de Alejandro Fernández.

En ‘A Jrileira’, a sección de karaoke para clubs deportivos, xogarán David e Juan Carlos, do Club Baloncesto Noia e Club XL Milladoiro de Baloncesto, respectivamente. Primeiro interpretarán ‘Canta y sé feliz’, de Peret, e despois terán que adiviñar o maior número posible de intérpretes en minuto e medio.

Finalmente, na ‘ITV do Amor’ un concursante do público terá que adiviñar cal é a parella de Sandra en función das respostas da súas posibles mozas: Milena, Ivette e Sara.

ler máis

A Televisión de Galicia adhírese ao Xacobeo e estrea 'Camiñantes do noso', microespazos sobre o Camiño de Santiago

15/01/2021

Dirixido por Rubén Riós, este proxecto nace co obxectivo de apoderar os maiores, o colectivo máis castigado pola pandemia, e de transmitir a súa sabedoría, nun paralelismo entre a peregrinación a Compostela e a compañía da vida

Con 10 capítulos de 5 minutos de duración, poderá seguirse os sábados e domingos, arredor das 12.00 h, na primeira canle e posteriormente ofrecerase na web e nas redes sociais da TVG

A Televisión de Galicia adhírese ao Xacobeo e estrea 'Camiñantes do noso', microespazos sobre o Camiño de Santiago

Santiago, 15.01.2021.-    Despois do seu éxito e impacto en redes sociais e nas canles de YouTube de Orgullo Galego ou do Portal da Lingua Galega, a partir do 16 de xaneiro, a Televisión de Galicia emitirá os sábados e os domingos ‘Camiñantes do noso’, unha serie de microespazos dirixidos polo actor e cineasta Rubén Riós para apoderar os nosos maiores. Despois da súa emisión, arredor das 12.00 h, ofrecerase tamén a través da páxina web crtvg.gal e do YouTube da TVG.

Na primeira onda da pandemia, o director, con pais de idade avanzada, estaba a ver o telexornal en familia cando observou nos seus pais unha ollada de total resignación. Foi entón cando pensou en que podía facer para cambiar a mirada desa xeración que deu tanto por nós. De aí xorde a idea da creación deste proxecto, producido por Claqueta Croqueta e que forma parte do Fondo de Proxectos Culturais Xacobeo 2021.

Con dez capítulos de aproximadamente cinco minutos de duración, Riós, amante da súa lingua e da súa terra, percorre 10 etapas da Vía da Prata, desde A Canda ata Santiago de Compostela, na busca da sabedoría dos máis lonxevos. O percorrido amosa a maxia da ollada dos anciáns e anciás das distintas poboacións polas que pasa o Camiño para destacar os ensinos, as tradicións e as lembranzas deste grupo tan castigado pola pandemia da Covid-19.

Estas píldoras amosan a integración social, cultural e lingüística do Camiño a través dos maiores, tomando como fondo o amplo valor natural e patrimonial que contén esta vía. Unha mestura cunha clara dobre visión entre o camiño da vida e o Camiño e Santiago de Compostela a través de dez persoas, dez lugares e dez historias.

ler máis

Andy y Lucas, Uxía, a orquestra Cinema e Xosé Manuel Piñeiro achegan esta noite en 'Luar' as súas novas propostas musicais

15/01/2021

Tamén soará esta noite (21.50 h) o orixinal punk con gaitas que propoñen os coruñeses Bastards on Parade e as agrupacións Agrocovo e Pulso e púa

Andy y Lucas, Uxía, a orquestra Cinema e Xosé Manuel Piñeiro achegan esta noite en 'Luar' as súas novas propostas musicais

Santiago, 14.1.2021.-   Chega o venres noite á Televisión de Galicia e, con el, a música, o humor e o entretemento que propón ‘Luar’ en cada unha das súas emisións. Xosé Ramón Gayoso, Patricia F. Santana e Rocío Rodríguez iniciarán esta semana as súas propostas artísticas dando paso á voz única de Uxía, quen proporá renovar estes tempos de incerteza co seu tema ‘Lume novo’ e coa ledicia dos seus ‘Alalás encadeados’, en que a artista galega canta poemas de Uxío Novoneyra.

Esta noite tamén presentará novo disco o dúo pop Andy y Lucas, quen lle traerá á audiencia desde a súa costa gaditana o primeiro sinxelo, que leva o mesmo título que o álbum ‘En el parque del amor’.

A diversión e o ambiente de festa continuarán sobre o escenario con Xosé Manuel Piñeiro, a orquestra Cinema e a orixinal proposta de Bastards on Parade, banda coruñesa que combina desde hai máis dunha década o punk coas gaitas. Os sons folk da terra poderanse gozar, amais, coas actuacións da agrupación Agrocovo e do grupo de Pulso e púa, da Asociación Antiguos Tunos Compostelanos.

Por outra parte, no certame de novos talentos ‘Recantos’ competirán Jioa, de Terras de Lugo, e Emma López, en representación do Ourense oriental. Completan o elenco de convidados, o luthier e músico Pablo Carpintero e Cuqui, cos seus divertidos monólogos. Unha edición máis, Gayoso intentará que algún espectador sexa quen de facerse cos 1.000 euros do bote do concurso telefónico e cos xamóns que se sortean no certame de adiviñas do programa.


ler máis