CRTVG

Buscar

CRTVG Viva

No concello de Castroverde, 'Galicia Bonita' faralle fronte a un almacén de construción en estado semirruinoso despois de 40 anos de abandono

08/03/2021

Os seus propietarios porán a proba a paciencia do equipo de reformas cun batallón continuo de mercadorías e material de obra (22.30 h)

No concello de Castroverde, 'Galicia Bonita' faralle fronte a un almacén de construción en estado semirruinoso despois de 40 anos de abandono

Santiago, 08.03.2021.-    O equipo do programa ‘Galicia Bonita’ asume este luns un novo reto e complicado reto. Nesta ocasión, a arquitecta Rosa Facal e os seus colaboradores viaxarán ata terras luguesas.

No concello de Castroverde, a xefa de ‘Galicia Bonita’ faralle fronte a un almacén de construción en estado semirruinoso despois de case 40 anos de abandono. Os seus propietarios, Loli e Wenceslao, porán a proba a paciencia do equipo de reformas cun batallón continuo de mercadorías e material de obra.

ler máis

'A Galiña Turuleca', apoiada pola Televisión de Galicia, Premio Goya á mellor película de animación

07/03/2021

‘Akelarre’, produción tamén participada pola canle pública, conseguiu cinco Goyas nos apartados de vestiario, maquillaxe e perruquería e efectos especiais, así como no de mellor dirección artística e música orixinal

'A Galiña Turuleca', apoiada pola Televisión de Galicia, Premio Goya á mellor película de animación

Santiago, 07.03.2021.-    O filme ‘A Galiña Turuleca’, apoiado pola Televisión de Galicia, alzouse a pasada noite co Goya á mellor película de animación, no transcurso da 35ª edición da gala do cine español, que se celebrou en Málaga.

Enfocada especialmente ao público infantil, a película, unha coprodución internacional coa Arxentina, dirixida por Víctor Monigote e Eduardo Gondell, retoma o personaxe da famosa canción popularizada por Los Payasos de la Tele. 'A Galiña Turuleca’, que chegaba a Málaga como única candidata na súa categoría, é unha aventura chea de humor, cunha mensaxe de superación para nenos e pais, conta a historia de como un ser diferente atopa o seu lugar no mundo e, a partir do seu talento persoal e único, consegue vencer os seus medos para comezar unha aventura que lle permite reencontrarse cos seres que ama.

Outra produción participada pola TVG, a película vasca ‘Akelarre’, conseguiu cinco Goyas das nove candidaturas coas que contaba. Os premios foron nos apartados de vestiario, maquillaxe e perruquería e efectos especiais, así como no de mellor dirección artística e música orixinal. Dirixido polo arxentino Pablo Agüero e coa actriz Amaia Aberasturi como protagonista, a película remóntase ao século XVII. Un xuíz cuxa misión é purificar a rexión dunha pequena aldea de Navarra, arresta varias mulleres, acusándoas de bruxería e facendo todo o necesario para que estas confesen.

ler máis

Damián ultima hoxe en 'Método Criminal' a operación coa que terá que demostrar a súa valía como xefe do clan dos Canosa

07/03/2021

Mentres, Luís Iglesia segue facendo malabares para compaxinar a súa vida familiar coa serie sobre os irmandiños e a súa faceta como confidente de Sara

Damián ultima hoxe en 'Método Criminal' a operación coa que terá que demostrar a súa valía como xefe do clan dos Canosa

Santiago, 07.03.2021.-    As cousas comezan a ir polo bo camiño para Damián na serie ‘Método Criminal’ (22.30 h) ou, polo menos, iso é o que semella despois de chegar a un acordo cos colombianos. Tan pronto como el e Sofía regresan da súa viaxe aos dominios de Rosario, recibe unha chamada dela para poñer en marcha o negocio e concretar a primeira entrega.

Sen tempo que perder, Damián reúne o clan co obxectivo de ultimar todos os detalles da operación. Nada pode saír mal porque é primeira e, moi posible, última oportunidade que terá Damián para demostrar ante Rosario a súa validez como sucesor de Telmo á fronte do clan dos Canosa.

Mentres tanto, Luís Iglesia segue facendo malabares para compaxinar a súa vida familiar coa serie sobre os irmandiños e a súa faceta como confidente de Sara. Con todo, grazas a Ricardo, o mozo de Gaila, Luís terá unha revelación sobre o papel que xoga dentro dos intereses de Sara para desmantelar o clan dos Canosa.

Na produtora, Adrián non tarda en revelar a Xavier as súas sospeitas sobre Cecilia e a relación que mantén Luís con Damián Canosa e non dubidan en tomar cartas no asunto e facer todo o posible por desenmascaralos. O primeiro que teñen que facer é confirmar que Cecilia é unha sicaria, polo que porán en marcha unha operación para espiar a nova guionista.

Allea ás argucias de Xavier e de Adrián, Cecilia intenta compaxinar da mellor forma posible o seu traballo no tanatorio coas entregas dos guións, unha tarefa demasiado esixente ata para ela mesma. Que pode saír mal?

ler máis

O cantante David Civera presentará o seu novo disco en 'Bamboleo' e tamén lembrará os seus grandes éxitos

06/03/2021

Erea Castro e a orquestra Tokio completan as actuacións musicais deste sábado

O cantante David Civera presentará o seu novo disco en 'Bamboleo' e tamén lembrará os seus grandes éxitos

Santiago, 06.03.2021.-    ‘Bamboleo’ (22.00 h), o espazo musical presentado por Xosé Manuel Piñeiro, recibe este sábado a visita dun clásico da tele, o cantante turolense que en 2001 representou a España en Eurovisión: David Civera. O artista lembrará éxitos inesquecibles, entre os que destacan ‘Dile que la quiero’, ‘Que la detengan’ ou ‘Bye, bye’ e, por suposto, interpretará temas do seu último traballo, titulado ‘Empatía’, entre eles ‘Mundo diverso’. Ademais, David chega disposto a dalo todo nos xogos que lle proporán Tamara Pérez e Claudio Pan.

A cantante Erea Castro tamén estará en ‘Bamboleo’ presentando o seu sinxelo ‘Fica á dica’, un tema que forma parte dun proxecto con sabor galego e portugués, que fusiona as culturas musicais das marxes do río Miño. Os ritmos máis verbeneiros traeraos ao estudio a orquestra Tokio, unha interesante formación cunha proposta moi definida.

No ‘Dirtidansi’, Javier e Cristina, a parella de bailaríns profesionais desta noite, presentarán dúas exhibicións: un showdance e un chachachá cubano, bailes cos que triunfan nas competicións mundiais. Pola súa parte, Carla Pacheco e Juancho Cruz enfrontaranse ás cámaras de televisión no ‘Agora ou Nunca’ interpretando dous temazos: ‘Campanera’, de Joselito, e ‘Soldadito marinero’, de Fito & Los Fitipaldis.

ler máis

As curtametraxes participantes no certame Nós tamén creamos! poderán verse a partir da semana que vén na G2

05/03/2021

As dez pezas, elaboradas coa técnica stop-motion por profesorado e alumnado de Infantil e 1º e 4º de Primaria de nove colexios galegos, ofreceranse arredor das 19.00 h, na faixa de programación coñecida como a ‘Xabamerenda’

O pasado mes de xaneiro coñecéronse os gañadores deste concurso, convocado conxuntamente pola Xunta de Galicia e a CRTVG, que pretende fomentar a creatividade e o uso da lingua galega

As curtametraxes participantes no certame Nós tamén creamos! poderán verse a partir da semana que vén na G2

Santiago, 04.03.2021.-    A creatividade dos nenos e nenas galegos de Educación Infantil e Primaria poderá verse na G2 a partir da semana que vén, cando se ofrecerá o primeiro pase de todas as curtametraxes participantes na novena edición do certame Nós tamén creamos!, un concurso convocado conxuntamente pola Xunta de Galicia e a CRTVG e que conta coa colaboración de OQOeditora, cuxos gañadores se coñeceron o pasado mes de xaneiro.

As dez pezas, elaboradas coa técnica stop-motion por profesorado e alumnado de Infantil e 1º e 4º de Primaria de nove colexios galegos, están dispoñibles na sección infantil da páxina web da CRTVG e a partir do vindeiro luns ofreceranse tamén a través da segunda canle da Galega arredor das 19.00 h, na faixa do ‘Xabarín Club’ coñecida como a ‘Xabamerenda’.

Deste xeito, emitiranse ‘Paco o papón’ e ‘O oso e o corvo’, do CEIP Ramón Otero Pedrayo, da Laracha; ‘Paco o Papón’, do CEIP Santa María, de Lugo; ‘MariLuz Avestruz’, do CEIP Xesús San Luis Romero, de Carballo; ‘Quen pode vencer o virus’, do CEIP Virxe do Mar, de Narón; ‘Buscando o norte’, do CEIP San Roque, de Viveiro; ‘MariLuz Avestruz’, do CEIP Vilaxoán, de Vilagarcía; ‘Paco o papón’, do CEIP Benigno Quiroga Ballesteros, de Lugo; ‘MariLuz Avestruz’, do CEIP A Guía, de Moaña, e ‘Titiritesa’, do CEIP A Ponte, de Ourense.

A CRTVG colabora na realización destes premios, que promove a Consellería de Cultura, Educación e Ordenación Universitaria, para fomentar unha imaxe positiva da lingua galega, favorecer o seu uso en novos formatos e dar a coñecer as opcións de lecer en galego que lles ofrece aos rapaces e rapazas a web dos medios públicos galegos.

ler máis

María del Monte, Os Carunchos e El Combo Dominicano comparten o escenario de 'Luar' esta noite

05/03/2021

O programa ofrecerá tamén as actuacións de Alejandra Pais, Juan Dopico, Lis Teuntor e a asociación cultural Traspés

María del Monte, Os Carunchos e El Combo Dominicano comparten o escenario de 'Luar' esta noite

Santiago, 05.03.2021. Xosé Ramón Gayoso, Patricia F. Santana e Rocío Rodríguez Padín, dan a benvida esta noite a ‘Luar’ (21.55 h) a cantante de sevillanas e canción española María del Monte, quen interpretará algunhas das cancións de máis éxito do seu repertorio. Outras das actuacións deste venres terán como protagonistas os membros de El Combo Dominicano, que ofrecerá todo un espectáculo en cada unha das súas intervencións.

O grupo galego Os Carunchos vén este venres ao programa a presentar o seu sétimo traballo discográfico ‘Lingua de xigantes’, un álbum con 18 pezas en que reúne cancións antigas e novas, con poemas de autores como Rosalía, Celso Emilio e Eduardo Blanco Amor.
    
Tamén compartirán o escenario de ‘Luar’ intérpretes coñecidos polo seu paso por orquestras, os coruñeses Alejandra Pais e Juan Dopico, a cantante cubana asentada na Coruña Lis Teuntor e a asociación cultural Traspés.

Coma en cada edición, ‘Luar’ dará paso, amais, a unha nova edición do certame de novos talentos ‘Recantos’, en que competirán Jioa, en representación de Terras de Lugo, e Raquel Meleiro, de Vigo. Completan o elenco de convidados o humor dos cómicos Paco e Pepe e ‘Os Litos e As Salis’. O concurso telefónico parte hoxe cun bote de 3.000 euros.

ler máis

A CRTVG conmemora desde este sábado o Día da Muller cunha programación especial en todas as canles

04/03/2021

Un especial con figuras galegas do eido deportivo, a estrea o 8-M dun espazo coas voces de mulleres apoderadas como protagonistas e longametraxes, entre as propostas da Galega

A programación da RG o 8-M estará dedicada á celebración da efeméride, con información, entrevistas e propostas culturais con perspectiva feminina

A 'Carteleira G' da web da CRTVG programa a peza, ‘As mulleres do porvir', e catro longametraxes galegas

A CRTVG conmemora desde este sábado o Día da Muller cunha programación especial en todas as canles

Santiago, 04.03.2021.-   A Galega ofrecerá desde este sábado contidos especiais para celebrar o Día Internacional da Muller. Ademais da cobertura informativa dos actos que teñen lugar con motivo do 8 de marzo, na TVG e na G2 destaca a estrea dun espazo que recolle as experiencias de mulleres apoderadas; un programa sobre a visión feminina do deporte, en que intervirán destacadas figuras galegas; reportaxes coa muller como protagonista, e seis longametraxes con perspectiva feminina.

O propio día en que se conmemora a efeméride, a G2 estreará na faixa da noite ‘En feminino singular’, unha serie de 8 capítulos temáticos, que pretende sensibilizar a sociedade e as mulleres, en particular, sobre a necesidade de apoderarse para romper os vestixios da desigualdade existente entre xéneros e fomentar este apoderamento como escudo fronte á violencia de xénero. En cada entrega, catro mulleres visibilizarán as súas experiencias e traxectorias vitais que as levaron a erixirse como referentes nos seus ámbitos. Historias que mostrarán que é posible o desenvolvemento integral da muller, servindo de estímulo para outras mulleres.

A visión feminina do deporte

A Galega comezará esta programación especial o sábado na G2, coa emisión dun  espazo presentado pola xornalista Loreto Costa, en que mulleres galegas destacadas no eido deportivo tratarán variados temas, como a igualdade salarial, a visibilidade do deporte feminino, a maternidade e o deporte de alto nivel. En representación das deportistas participarán Patricia González ‘Peque’, xogadora do Pescados Rubén Burela e segunda mellor xogadora do mundo de fútbol sala; Begoña Fernández, medallista olímpica en Londres 2012 coa selección española de balonmán e actualmente é adestradora de balonmán, e Zulema González, árbitra internacional. Ademais contarase coas reflexións, entre outras, de Teresa Portela, piragüista; Susana Rodríguez Gacio, triatleta paralímpica; Elena Roca, primeira galega internacional en rugby; Bea Sánchez, xogadora do Durán Maquinaria Ensino de baloncesto; Patri, futbolista do Deportivo Abanca; Adiaratou Iglesias, atleta paralímpica; Julia Paradela, xogadora de voleibol do Arenal Emevé, e Desirée Vila, atleta paralímpica, entre outras.

Na TVG, esta mesma noite, tras a emisión de ‘Bamboleo’, ofrecerase un dos eventos musicais cun acento feminino máis forte na historia dos medios públicos galegos, a ‘Gala Matria Galega’, en que teñen presenza artistas dos máis variados xéneros e ofrece o testemuño de mulleres que destacan en diferentes ámbitos da sociedade.

Estrea de ‘Migas de pan’

Este sábado á noite a G2 estreará a longametraxe ‘Migas de pan’, unha coprodución uruguaia-galega baseada en feitos reais. Un drama inspirado no relato de Liliana Pereira, unha expresa política da última ditadura do Uruguai.

Na propia xornada do 8 de marzo, a TVG emitirá ‘Unha muller invisible’, en que María Bouzas interpreta a protagonista, unha muller de 44 anos que vive soa, se sente invisible e decide cambiar esta situación para atraer a atención dun vello amigo.
    
Un monográfico sobre a muller traballadora no ‘Vivir Aquí’

O domingo, na véspera do Día da Muller, o espazo de reportaxes sobre cuestións cotiás no día a día dos galegos, o ‘Vivir Aquí’, achegará na TVG un monográfico sobre o papel da muller desde distintos puntos de vista, co testemuño de profesionais, que contarán como lles está afectando a pandemia no plano laboral e vital; de  mulleres emprendedoras na pandemia, que malia a situación deste último ano decidiron abrir un negocio; sobre o labor a dunha recoñecida científica galega, e amosará unha ruta de mulleres galegas destacadas na Coruña, a primeira deste tipo que se desenvolve en España.

Forte presenza do 8-M nos contidos da Radio Galega

O Día da Muller tamén se verá reflectido nos contidos da Radio Galega ao longo de toda a xornada. No apartado informativo do ‘Galicia por Diante’ entrevistarase a conselleira de Igualdade, María Jesús Lorenzana, e a voceira do movemento 8-M, e en ‘A Crónica’, na edición das 20:00 h, contarase coa participación da secretaria xeral de Igualdade, Susana López Abella. O magazine dirixido por Kiko Novoa fará directos en todas as cidades galegas relacionados con actos do 8 de marzo, e o ‘Miolo do día’ e ‘A bóla extra’ tamén versarán sobre o Día da Muller.

ler máis

Repercusión internacional para a reportaxe en 'The Guardian' sobre o audiovisual galego

04/03/2021

O xornal británico analizou o fenómeno do xénero 'Galician noir' nunha reportaxe que foi celebrada por directivos de canles de toda Europa

Repercusión internacional para a reportaxe en 'The Guardian' sobre o audiovisual galego

Santiago, 04.03.2021.-  A reportaxe publicada este mércores polo xornal 'The Guardian' sobre o audiovisual galego e o fenómeno do novo xénero de misterio e suspense bautizado como 'Galician noir' tivo unha excelente acollida internacional. A CRTVG recibiu preto dun centenar de mensaxes de televisións europeas e institucións públicas e privadas felicitando a canle pública e o sector da produción audiovisual galega.

Foi o caso de directivos de Irlanda que manifestaron á CRTVG o interese “dun artigo moi inspirador para canles coma nós, que traballamos no eido rexional” e que salientaron a calidade das producións citadas, entre as que se atopaban  ‘O sabor das margaridas’ e ‘Auga seca’, producidas e emitidas pola Televisión de Galicia e que actualmente compiten pola atención do espectador nas plataformas dixitais Netflix e HBO, respectivamente.

Desde Inglaterra remitiron unha mensaxe sobre a importancia de que “por fin, a creatividade e os recursos dunha rexión como Galicia obteñen inversión e recoñecemento axeitados”, salientando o feito de que os espectadores máis novos atopan completamente natural o uso de subtítulos no visionado de producións noutras linguas, como o galego. Directivos do sector de Italia comentaron que este traballo “é a demostración de como ensalzar todo un territorio con ideas intelixentes e profesionalidade”. Desde Bulgaria observaron que é un “verdadeiro logro que Galicia lograse un oco en Netflix, onde a competencia é tan grande e intensa”.

A reportaxe publicada onte ‘Galician noir: como un recuncho chuvioso de España creou un novo xénero televisivo' analiza o fenómeno do novo xénero de misterio e suspense bautizado como 'Galician noir' e explica como Galicia atrae a atención das plataformas dixitais, salientando a proxección internacional do seu sector audiovisual “A tradición narrativa de Galicia vai da man de décadas de produción de cine e televisión apoiadas pola televisión rexional en lingua galega, que xogou o importante papel de apoio á industria”, sinala a reportaxe.  A reportaxe súmase deste xeito ás voces que falan de Galicia como punto de encontro de rodaxes e historias do audiovisual e na literatura.

ler máis

'Land Rober Tunai Show' propón hoxe un programa en chándal, que contará coa participación de Juan Muñoz e Víctor Fábregas

04/03/2021

O espazo presentado por Roberto Vilar recibirá tamén a visita da actriz Beatriz Serén

'Land Rober Tunai Show' propón hoxe un programa en chándal, que contará coa participación de Juan Muñoz e Víctor Fábregas

Santiago, 04.03.2021.-   A edición deste xoves de ‘Land Rober Tunai Show’ (21.50 h) estará dedicada á roupa de moda: o chándal. Nin Rosalía nin C. Tangana... Os galegos son os que marcan tendencia e o programa vai demostralo. Ata Roberto Vilar vai abandonar o traxe.

O equipo do ‘Land  Rober’ vai pintar a mona ao grande co actor Juan Muñoz, do dúo cómico Cruz y Raya, que vai coñecer as habilidades do público galego en ‘Non cho creo’. Ademais, o programa da TVG contará coa visita da actriz Beatriz Serén.

Por se fose pouco, Dosinda irá coas chatis facer a ruta do colesterol. En que acabará esta andaina? Volven ademais as trolas máis divertidas. Juan Muñoz, Víctor Fábregas e Rober enfrontaranse á mesa de ‘Mentira Cochina’. Cal dos tres contará unha anécdota real?

ler máis

A CRTVG inicia a xestión do Big Data, prevista na súa estratexia de dixitalización

03/03/2021

Konodrac e Crossmedia adxudícanse o servizo para a captación, análise e distribución do Big Data da Corporación

A nova plataforma permitirá a explotación dos contidos dixitais, a recollida dos datos xerados nas experiencias dos usuarios, e a creación de patróns de consumo para unha futura toma de decisións estratéxicas

A CRTVG inicia a xestión do Big Data, prevista na súa estratexia de dixitalización

Santiago, 03.03.2021.-  A Corporación de Radio e Televisión de Galicia confiou na solución proposta por Konodrac, xunto con Crossmedia, para levar a cabo o servizo de captación, análise e distribución Big Data para poder coñecer mellor aos seus usuarios e ofrecerlles un mellor servizo.

A CRTVG aposta por unha estratexia de transformación dixital, que contempla a integración de todas as fontes de datos dispoñibles (DataHub), tanto da súa audiencia lineal como dixital (televisión, radio e dixital), para unha óptima e eficiente xestión de datos. Considerada como unha das operacións máis críticas para unha organización, lanzou a finais do pasado ano un concurso para o servizo para a captación, análise e distribución do bigdata e servizo SaaS de explotación e mantemento dun Datahub para a Corporación.

Con esta plataforma, a Corporación disporá dunha ferramenta centralizada, que permita a explotación dos contidos dixitais, ao mesmo tempo que a recollida de todos os datos xerados nas experiencias dos usuarios, e conformar así patróns de consumo para proporcionar información cualificada de cara a unha futura toma de decisións estratéxicas.

Crossmedia e Konodrac foron os elixidos para desenvolver estes servizos que van permitir á CRTVG aplicar solucións de optimización nos procesos e na toma de decisións en determinados fluxos produtivos da Corporación, así como determinar patróns de consumo que permitan xerar insight para a toma de decisións.

Crossmedia é unha nova liña de negocio dentro de Crosspoint, especializada na integración de solucións OTT para broadcasters, telcos e compañías de vídeo online. Pola súa parte, Konodrac é unha enxeñaría de software avanzado, expertos en tecnoloxías de Big Data para televisión, addressable TV, HbbTV con adserver propio, analítica predictiva, motores de recomendación de contidos e seguridade de datos. Está focalizada na transformación dixital para os negocios do sector multimedia e audiovisual que requiren mellorar as súas canles de comunicación e interacción cos seus clientes e usuarios, e automatizar os fluxos de traballo.

ler máis