Os veciños deste edificio de sete andares da avenida da Mariña en Vilagarcía foron os que chamaron a Policía Local porque escoitaron unha forte pelexa entre unha parella. Ao chegaren ao lugar, os axentes tiveron que intervir para que deixasen de lesionarse entre eles. A muller tiña feridas nun beizo e nunha orella, mentres que o home estaba ferido no pescozo, na boca e no nariz. Os dous amosaban síntomas de embriaguez e foron detidos.

Semella que durante a liorta entre eles, o seu fillo, un bebé de once meses, recibiu un golpe mentres estaba no colo da nai. O neno foi trasladado ao hospital do Salnés e descartouse que tivese lesións graves. Na vivenda residen ademais outros dous menores, un de 14 e outro de 7 anos, e unha muller, tía dun deles, que tamén alertou a policía do ocorrido.

Despois de activaren o protocolo de violencia de xénero, os axentes trasladaron os detidos ás dependencias da Policía Nacional, onde pasaron todo o día á espera de pasaren a disposición xudical. Están acusados dun delito de violencia no ámbito familiar. A Subdelegación do Goberno indicou que será unha familiar a que se faga cargo do bebé.