Os dous tripulantes dun pesqueiro foron rescatados na mañá deste luns do mar tras chocar a súa embarcación cun buque na ría de Vigo, segundo informaron fontes de Salvamento Marítimo.   

Segundo relataron, os feitos sucederon sobre as 8,25 horas deste luns ao norte da illa de Toralla, na ría viguesa. O buque Intermares, de 79,2 metros de eslora, informou o Centro de Salvamento de Vigo, que coordinou o operativo, da presenza de dous náufragos na auga tras chocar co pesqueiro Romo Dous.   

Os tripulantes, que estaban na auga con aros salvavidas, foron rescatados pola embarcación Salvamar Mirach de Salvamento Marítimo, que os trasladou ao peirao da Laxe, no porto de Vigo.   

Colisión al Norte isla de Toralla entre el buque Intermares (79,2m eslora) y la embarcación pesquera Romo Dos (8,6 metros). Los 2 tripulantes del pequero rescatados del mar por la embarcación Salvamar Mirach y trasladados al muelle de A Laxe. El pesquero se ha hundido.

— SALVAMENTO MARÍTIMO (@salvamentogob) November 25, 2019

No porto vigués esperábaos unha ambulancia, que trasladou os náufragos a un centro sanitario para recibir asistencia, segundo sinalaron as mesmas fontes. 

Salvamento Marítimo concretou que o pesqueiro Romo Dous, de 8,6 metros de eslora, se afundiu tras o accidente.